Salmu 98:1-9
-
Yehova, Mvuluxa ni Muthoriha awookololowa
-
Nivuluxo na Yehova nnamusuweliwa (2, 3)
-
Salmu.
98 Mmwiipele Yehova ncipo nvyaani,Woona wi owo onnapaka ichu sootikhiniha.
Ntata nawe noolopwana, nwono awe waweela, wooruuha nivuluxo.*
2 Yehova oosuweliha nivuluxo nawe;Owo ohuupulula wookololowa wawe vamiithoni va maloko.
3 Owo ohuupuwela osivela wawe woororomeleya ni ororomeleya wawe ntakhara empa ya Isarayeli.
Makupa oothene elapo ekotenlaayawo ahoona nivuluxo na* Muluku ahu.
4 Mukhuwele moohakalala wa Yehova, elapo yoothene.
Muchape, mukhuwele moohakalala nave mwiipe macipo.*
5 Mmwiipele macipo* Yehova ni chakare,Ni chakare vamoha ni oruma waphaama wa ncipo.
6 Ni mapeca vamoha ni oruma wa aposina,Mukhuwele moohakalala vamiithoni va Mwene, Yehova.
7 Ephareya erume ni soothene siri mwemmo,Elapo yavathi vamoha ni yaawo anakhala mwemmo.
8 Mihice soope makuphi;Miyaako sikhuwele moohakalala vamoha
9 Vamiithoni va Yehova, woona wi owo onnarwa* wi athorihe elapo.
Owo onahaala othoriha elapo yavathi mwawookololowaVamoha ni achu mweekhaikhai.
Inoota
^ Naari: “woomvaha ovootha.”
^ Naari: “ovootha wa.”
^ Naari: “mpake ncipo.”
^ Naari: “Mumpakele ncipo.”
^ Naari: “oophiya.”
