Yohani 13:1-38
13 Ehaakumve efesta ya Paska, Yesu aasuwela wi elukuluku yaaphiya wi ahiye elapo nave aye wa Atiithi. Hiihaa, aasivenleiye awawe yaari mweelaponi, owo aahaasivela ophiyerya wuukuchulani.
2 Elukuluku ya yoolya, Musaserya aarihela muupuwelo woomveleela Yesu mmurimani mwa Yutasi Iskariyoti, mwaana a Simoni.
3 Mwawiihiiha, Yesu aasuwenleiye wi Atiithi yamvaha ichu soothene mmatani mwawe nave wi owo aarwenle wa Muluku, nave wi aaya wa Muluku,
4 owo aavinya vameesa arula malaya* awe akuha okhwipi nave aakuxa ekuwo ya wiipupuchano, amakelela* muyuununi mwawe.
5 Voocharela, aahela maahi mpasiyani apacerya orapiha inaani sa oohuserya awe ni apupucha ni ekuwo ya wiipupuchano aamakelenleiye muyuununi mwawe.*
6 Hiihaa, Yesu aamwaacamela Simoni Petru. Owo aamukoha Yesu: “Pwiya, munachuna orapiha inaani saka?”
7 Yesu aamwaakhula ariki: “Yeeyo kineeraaka, hiihaano weyo honiiwexexa nto onarwa wiiwexexa muhoolo mwaya.”
8 Petru aahi: “Nyuwo hamurwa murapiha inaani saka.” Yesu aamwaakhula yoowo: “Kaahoorapiha, weyo hiwaanono echu ni miyaano.”
9 Simoni Petru aahi wa yoowo: “Apwiya, yaari yeeyo, murapihe ohiya pahiru inaani saka nyenya tho mata aka ni muru aka ene.”
10 Yesu aahi wa yoowo: “Yoowo orampe tahi woochuneya orapa wanaawiili, voohikhala inaani pahi. Nto nyuwo moorapa, nyenya tahi oothene.”
11 Tiwi owo aanamusuwela yoowo aahaala omveleela. Ti nthowa nene aalonceiye ariki: “Tahi wi oothene moorapa.”
12 Aarapinheiye inaani saya, aawara malaya* awe, akookela vameesa* nave aloca wa yaawo ariki: “Apwanne mohiiwexexa yeeyo kiweerenlaakaani?
13 Nyuwo munakeera ‘Muhusiha’ ni ‘Apwiya,’ nave chiryene ti yeeyo, woona wi ka yoowo.
14 Mwawiihiiha, waakhanle wi miyaano, Apwiya ni Muhusiha koorapiha inaani sanyu, nyuwo tho munaphwanela orapiha inaani sa mukina ni mukhwaawe.
15 Vawi kohoovahani yootakiherya, wi hiihaa ntoko kiweerenlaakaani, nyuwo tho munaphwanela weerano.
16 Mweeparipari kinnooleelaani wi, kapuro tahi mutokweenexa ompwaha pwiyawe, naari yoowo onarummwa tahi mutokweenexa ompwaha yoole omurumme.
17 Mwaasuwenle ichu seiha, munamukhala oohakalala mwaanachariha.
18 Nkinaloca sa nyuwo oothene; kohaasuwela yaale kaathanlilaaka. Nto yoheereya yeela wi yaakhwanele yeele yaarempwe: ‘Yoole aalyile epaau aka ookirukunuwela.’*
19 Kinooleelaani yeela hiihaano, ehaakumve weereya, wi yeereya, muroromele wi ka yoowo.
20 Mweeparipari kinnooleelaani wi, yoole onamwaakhela yoole kimurummaaka onakaakhela tho miyo, nave yoole onakaakhela miyo, onamwaakhela tho Yoole okirumme.”
21 Amanle oloca ichu seiha, Yesu aahuukhuwaxa nave avaha onamoona ariki: “Mweeparipari kinnooleelaani wi mmoha a nyuwo onamukiveleela.”
22 Oohuserya yaapacerya owehana mukina ni mukhwaawe, ehaaleeliheya voohimusuwela taani aamwaaheiye.
23 Mmoha a oohuserya awe, yoowo Yesu aamusiveleiye, aakiranthe waacamela* vaavale Yesu aareiyevo.
24 Mwawiihiiha, Simoni Petru aamvaha eneneeryo oohuserya yoola nave alocano ariki: “Onleele taani Yesu onamuloceiye.”
25 Hiihaa, owo aamuhaamela Yesu vachirima nave amukoha ariki: “Apwiya taani yoowo?”
26 Yesu aahaakhula: “Ti yoowo kineeraaka kimvahe epaau yeeyo kineeraaka kirerye mparathoni.” Mwawiihiiha, owo aakuxa epaau, arerya nave aamvaha Yutasi, mwaana a Simoni Iskariyoti.
27 Amanle Yutasi okuxa epaau, Satana aavolowa mwa yoowo. Hiihaa, Yesu aahi wa yoowo: “Weereno mwawaakuveya yeeyo oneeraawe.”
28 Nto, haavo mwa yaale yaahaamenle meesa yaasuwela mathowa yaamweerinhe Yesu omulocela yeela.
29 Mweeparipari, woona wi Yutasi taakhapelela ekaaxa ya ikhorowa, akina yuupuwela wi Yesu aaloca ni yoowo ariki: “Wathume yeeyo nnachunaahu ntakhara efesta,” naari wi owo aaphwanela waavaha echu alipa oohaawa.
30 Mwawiihiiha, Yutasi aakhenleiye epaau, owo aakhuma mwawaakuveya. Waari ohiyu.
31 Vaavaa Yutasi aakhummeiye, Yesu aahi: “Vano Mwaana a muchu onnacicimihiwa, nave Muluku onnacicimihiwa moorweela mwa yoowo.
32 Muluku mwaneene onammucicimiha yoowo, nave onammucicimiha moohilekela.
33 Anamwane oosiveliwa, miyo kiri ni nyuwo mu elukuluku vakhaani. Nyuwo munamukaavya, nave hiihaa ntoko kaaloncaaka ni Ayuta, kinnooleelaani nyuwo tho kiriki: ‘Weiwo kinayaakawo, nyuwo hamunawerya oyawo.’
34 Kinnoovahaani nlamulo mvyaani: Musivelaneke mukina ni mukhwaawe; hiihaa ntoko koosivenlaakaani, nyuwo tho musivelaneke mukina ni mukhwaawe.
35 Oothene enarwa esuwela wi mwa oohuserya aka moorweela mwa ela: mwakhalano osivela mukina ni mukhwaawe.”
36 Simoni Petru aamukoha ariki: “Pwiya, munaya woowi?” Yesu aamwaakhula: “Weiwo kinayaakawo, weyo honawerya okichara hiihaano, nto onarwa okichara muhoolo.”
37 Petru aamukoha ariki: “Pwiya, ntakhara heeni kihinaweryaaka woocharaani hiihaano? Miyo kinamuleva okumi aka wanthowa nanyu.”
38 Yesu aamwaakhula: “Weyo onarwa oleva okumi aa wanthowa naka? Mweeparipari kinnooleela wi: muthupi ohaakumve wiipa, weyo onamukikhooca ikwaha raru.”
Inoota
^ Naari: “ekaapa.”
^ Naari: “apicikelela.”
^ Naari: “iipicikelenleiye muyuununi.”
^ Naari: “ekaapa.”
^ Naari: “ahaamela vameesa.”
^ Mu Ekriki, “ookivonya munyethe ni nsica nawe.”
^ Mu Ekriki, “waacamela va naakhoopeni va Yesu.”
