Yohani 20:1-31
20 Nihiku noopacerya na esumana, Mariya Matalena aya onihiye* wooxixelo ene, ohaakumve oxavo, nave aahoona wi nluku na va nihiye* naapirikixiwavo.
2 Vaavaa, aachimaka aya amuleela Simoni Petru, vamoha ni oohuserya mukina yoowo Yesu aamukhweleiye vancipale, owo aahi wa yaawo: “Aavihiwamo Apwiya mu nihiyeni nave hinsuwenle weiwo akuhiwaayawo.”
3 Hiihaa, Petru ni oohuserya mukina yaaya onihiye.
4 Oopiili yaapacerya ochimaka vamoha, nto oohuserya yoole mukina aachimaka ampwaha Petru nave taari oopacerya ophiya onihiye.
5 Aathurumenleiyemo, owo aahoona ikuwo sa eliinyu iri mwemmo nto haavolonwemo.
6 Voocharela, Simoni Petru yoowo aamuchara aaphiya tho, nave aavolowa mu nihiye. Owo aahoona ikuwo sa eliinyu saari mwemmo.
7 Ekuwo yeeyo yaahuruweliweno muru awe hiyaari vamoha ni ikuwo ikina nto yuupaanyeriwe makupa makina.
8 Voocharela, oohuserya yoole mukina, yoowo aaphin’ye woopaceryani o nihiyeni, aavolowa tho, oona nave eemererya.
9 Vawi awo nlelo hiyiiwexexa makupa a soorepa yaawo yaaloca wi owo onnaphwanela oviihiwa mookhwani.
10 Mwawiihiiha, oohuserya yaakookela mmawannyaya.
11 Nto Mariya aahala waacamela onihiyeni ananla. Anlaka hiihale, aahuurama anathurumela onihiyeni,
12 nave owo aawoona ankeelo apiili ewanre saweela, ekiranthe nipuro waarivo mwiili wa Yesu, mmoha waamuru mukina waameco.
13 Awo yaahi wa yoowo: “Muthiyana, oninlelani?” Owo aawaakhula ii: “Aamukuxamo Pwiya aka, nave nkisuwenle weiwo amukunhaayawo.”
14 Aalonceiye yeela, aarukunuwa amoona Yesu eemenle vaavale, nto haasuwela wi aari Yesu.
15 Yesu aahi wa muthiyana: “Muthiyana, oninlelani? Onamwaavya aani?” Owo uupuwelaka wi aari mwaneene a emaca aahi wa yoowo: “Pwiya, waakhanle wi ti nyuwaano mmukunxe, mukileele mmukunhaanyuwo wi kiyewo kamukuxe.”
16 Yesu aahi wa yoowo: “Mariya!” Arukunuwaka, Mariya aaloca ni yoowo mu Ehepiri ariki: “Raponi!” (nenlo nnataphulela “Muhusiha!”)
17 Yesu aahi wa yoowo: “Ohikiphare, woona wi nlelo nkiwenle kiyaaka wa Atiithi. Nto hawe wa asinnaka waaleele: ‘Kinaya wa Atiithi aka ni Atiithi anyu, wa Muluku aka ni Muluku anyu.’”
18 Mariya Matalena aarowa, akuxa michaka wa oohuserya: “Koowoona Apwiya!” Nave aahaaleela yaawo soothene Yesu aalonceiye.
19 Nihiku nenle noopacerya na esumana, wiilalevo, oohuserya yaari mpa, ewanle masele, ewoovaka ahooleli a Ayuta. Yesu aarwa, eemela veeri vaya, aloca wa yaawo ariki: “Murecele okhale ni nyuwo.”
20 Amanle oloca yeela, owo aawooniha matata awe ni mpararini mwawe. Oohuserya yaatepa ohakalala va owoona Apwiya.
21 Yesu aaloca tho wanaawiili ni yaawo ariki: “Murecele okhale ni nyuwo. Hiiha ntoko Atiithi akirummaaya miyo, miyo tho kinnoorumaani nyuwo.”
22 Amanle oloca yeela, aahaaveerela yaawo miwiya nave alocano ariki: “Mwaakhele munepa waweela.
23 Wakhala wi mookhurumuwela soocheka sa muchu, iho sookhurumuweliwa; wakhala wi himukhurumuwenle soocheka sa muchu, iho hikhurumuweliwe.”
24 Nyenya Tomasi, mmoha a oohuserya Khumi Napiili, yoowo tho iichaniwa Maphapo, haari vamoha ni yaawo vaavaa Yesu oonen’yeiye.
25 Mwawiihiiha, oohuserya akina yaanamuleela eriki: “Noowoona Apwiya!” Nyenya owo aahi wa yaawo: “Wakhala wi nkonne mmatani mwaya eneneeryo ya ipereko, nave kaahiphara ni ikatha saka vaavaa saavolonwaayavo ipereko naari ophara mpararini mwaya, nkirwa keemererya.”
26 Evinre mahiku mathanu nararu, oohuserya yaari tho vamoha, nave Tomasi aari vamoha ni yaawo. Yesu aahooneya wa yaawo naamwi milako saawaliwe nave eemela veeri vaya, aloca ariki: “Murecele okhale ni nyuwo.”
27 Voocharela, owo aahi wa Tomasi: “Okuhe ikatha saa va, nave woone matata aka, wookole nwono aa okuhe mpararini mwaka. Ohiye okhwa minikwa* nto ororomele.”
28 Tomasi aakhulaka, aahi wa yoowo: “Pwiya aka ni Muluku aka!”
29 Yesu aahi wa yoowo: “Onaroromela nthowa nawi wookoona? Oohakalala taale ahonne nave naamwi hiiha, eroromela.”
30 Chiryene, Yesu tho aaheerano ineneeryo ikina sincipale vamiithoni va oohuserya awe, seiho ihirempwale mu eroolu yeela.
31 Nto, iha soorempwa wi muroromele wi Yesu ti Kristu, Mwaana a Muluku, nave moorweela wa ororomela wanyu, mukhaleno ekumi yoohimala mu nsina nawe.
Inoota
^ Naari: “nihiye nnuupuweliwa.”
^ Naari: “nihiye nnuupuweliwa.”
^ Mu Ekriki, “Ohikhale oohiroromela.”
