TLAMACHTIJLI 37

¿Kuajli yes tla ninoapolaktia?

Xkijto tla melauak noso xmelauak:

Nochimej akin kichiuaj ken Cristo noneki noapolaktiskej.

□ Melauak

□ Xmelauak

Ijkuak yakaj noapolaktia kiteltia ika tlajtlakoua.

□ Melauak

□ Xmelauak

Ijkuak yakaj noapolaktia kijtosneki ika peua nomakixtia.

□ Melauak

□ Xmelauak

Tla xninoapolaktia, toTajtsin xnechtlajtlakolmakas.

□ Melauak

□ Xmelauak

Pampa noamigos yonoapolaktijkej, nejua noijki noneki ninoapolaktis.

□ Melauak

□ Xmelauak

¿TIMOYEKANA ika tlen kijtoua Biblia? ¿Timokojtilia niman ijkon uelis timouikas iuan toTajtsin? ¿Tikinnojnotsa oksekimej itech tlen tikneltoka? Tla otikijto kema niman xitimoapolaktia, kijtosneki ika tiknemilijtika timoapolaktis. San ika, kachtopa noneki tikitas tla iuelis timoapolaktis. Tla kuajli otiknankili tlen kachtopa otikteneujkej, kijtosneki ika kanaj iuelis ijkon tikchiuas.

● Nochimej akin kichiuaj ken Cristo noneki noapolaktiskej.

Melauak. Yejon tlen okijto Jesús makichiuakan inomachtijkauan (Mateo 28:19, 20, TNM). Jesús noijki onoapolakti. Ika yejon, tla tikneki tikchiuas ijkon ken Cristo, tejua noijki noneki timoapolaktis ijkuak ikuajli titlanemilis niman ijkuak kisas ipan moyojlo.

● Ijkuak yakaj noapolaktia kiteltia ika tlajtlakoua.

Xmelauak. Ijkuak yakaj noapolaktia san kimititia oksekimej ika yonosentemakak itech Jehová. Niman ijkuak yakaj nosentemaka itech Jehová, ijkon kichiua pampa kineki nemis ijkon ken toTajtsin technauatia, niman xsan pampa xkineki kichiuas itlaj tlen xkuajli maski yejua kuelitaskia kichiuas.

● Ijkuak yakaj noapolaktia kijtosneki ika peua nomakixtia.

Melauak. Biblia kijtoua ika melak noneki toapolaktiskej para uelis tomakixtiskej (1 Pedro 3:21, TNM). San ika, tejua xsan noneki timoapolaktis pampa tikneki timakisas, yej noneki ijkon tikchiuas pampa tiktlasojtla Jehová niman tikneki tiktekichiuilis para nochipa ika nochi moyojlo (Marcos 12:29, 30).

● Tla xninoapolaktia, toTajtsin xnechtlajtlakolmakas.

Xmelauak. Santiago 4:17 kijtoua ika tla “sen tlakatl yejuan kimati tlen kuajli para kichiuas niman xkichiua, tlajtlakoua”, maski tla yonoapolakti noso ka. Kuakon xkonnemili yejuin: ¿Tikasikamati nochi tlen toTajtsin kineki xchiua? ¿Kuajli titlanemilia niman ueli tiktlapejpenia tlen kuajli ipan monemilis? Tla ijkon, kanaj iuelis titlajtos iuan motajuan noso iuan se tokniuj akin chikauak itlaneltokil. Yejuamej uelis mitspaleuiskej tikchiuas tlen noneki niman ijkon uelis timoapolaktis.

● Pampa noamigos yonoapolaktijkej, nejua noijki noneki ninoapolaktis.

Xmelauak. Ijkuak tiktlapejpenis timoapolaktis, noneki tikchiuas ika nochi moyojlo (Salmo 110:3). Niman san noneki tikchiuas ijkuak yotikasikamat tlenon kintlajtlanilia Jehová iteixpantijkauan niman ijkuak kuajli yotikasikamat tlen noneki kichiuas akin yonoapolakti (Eclesiastés 5:4, 5).

Itlaj tlen ueyi kijtosneki

Ijkuak timoapolaktis nopatlas monemilis niman toTajtsin melak mitsteochiuas. San ika, noijki ijkuak ijkon tikchiuas tikpiyas se ueyi tekitl. ¿Katlejua? Tikchiuas nochi tlen otikijli Jehová ijkuak itech otimosentemakak.

¿Iyejkotika tonajli ijkuak timoapolaktis? Tla kema, tikmatstokej ika melak tipaki. ¡Melak kualtsin ika ueli tiktekichiuiliaj Jehová ika nochi toyojlo niman ika mojmostla san yejua tikueyichiuaj! (Mateo 22:36, 37).

TEXTO TLEN MITSPALEUIS

“Xmotemaktilikan itech Dios ken itlaj uentli yejuan yoltikaj niman yektli ijkon ken yejua kineki. Tla ijkon nenkichiuaskej, nenkimauistiliskej Dios ken noneki” (Romanos 12:1).

TLEN UELIS TIKCHIUAS

Xkintlajtolti motajuan katlejua tokniuj akin nemi ipan motlanechikol uelis mitspaleuis más xchikaua motlaneltok (Hechos 16:1-3).

¿TIKMATIYA YEJUIN?

Ijkuak timoapolaktis peuas tikpiyas yejon “neskayotl” tlen noneki para timakisas (Ezequiel 9:4-6).

¡XCHIUA TLEN YOTIUEL!

Tlen noneki más nikasikamatis itech tlen temachtia Biblia niman ijkon uelis ninoapolaktis: ․․․․․

¿Tlenon nikneki niktlajtoltis notaj noso nonan itech tlen ninomachtijtika? ․․․․․

¿TEJUA TLENON TIKNEMILIA?

● ¿Tleka noneki kuajli tiknemilis tla tikneki timoapolaktis?

● ¿Tleka sekimej noapolaktiaj ijkuak xiuejueyimej?

● ¿Tleka sekimej telpokamej xnimantsin nosentemakaj itech Jehová niman xnoapolaktia?

[Comentario]

Melak nechpaleuiya nikilnamikis ika yoninoapolakti pampa ijkon xninokalaktia ipan tlauejli’’ (Noemí).

[Recuadro/Tlaixkopinajli]

Tlen miyekej notlajtoltiaj itech apolaktilistli

¿Tlenon kineskayotia ijkuak se noapolaktia? Ijkuak mitspolaktiaj ijtik atl kentla timikiskia, kijtosneki ika tijkajkaua nochi tlen xkuajli tikchiuaya. Niman ijkuak tiuajkisas ijtik atl kentla oksejpa tiuajnemiskia, san ika, aman para tikchiuas tlen Jehová kineki noso tlen yejua mitsnauatia.

¿Tlenon kijtosneki timosentemakas itech Jehová? Kijtosneki ika aman xok sa tejua tikijtos tlenon tikchiuas ipan monemilis, aman tikmaktilia Jehová (Mateo 16:24). Ika yejon, achto ajsis tonajli ijkuak timoapolaktis, noneki tikchiuilis se teoyotl Jehová kampa tikijlis ika nochipa kachtopa tikchiuas tlen yejua kineki.

¿Tlenon noneki nikchiuas achto ninoapolaktis? Noneki tiktlakamatis tlen kijtoua Biblia niman tikinnojnotsas oksekimej itech tlen tikneltoka. Noijki noneki timouikas iuan toTajtsin niman para tikchikauas motlaneltok noneki timomachtis niman tikchiuas teoyotl. Noneki tiktekichiuilis Jehová ika nochi moyojlo niman xsan pampa oksekimej mitsijliaj ijkon xchiua.

¿Kech xiuitl noneki nikpiyas para ninoapolaktis? Xmás noneki tikitas kech xiuitl tikpiya, yej noneki tikitas tla ikuajli titlanemilia niman ijkon tikasikamatis tlenon kijtosneki timosentemakas itech toTajtsin.

¿Tlenon noneki nikchiuas tla nikneki ninoapolaktis, san ika, notajuan nechijliaj maninochia? Tla yejuamej mitsijliaj ika noneki timochias niman ijkon más kuajli tiktlakamatis tlen kijtoua Biblia, xkintlakamati niman xtekitilti yejon tiempo para más kuajli timouikas iuan Jehová (1 Samuel 2:26).

[Recuadro]

Tlen uelis tikchiuas

¿Tiknemilijtika timoapolaktis?

Tlen amantsin tikitaskej mitspaleuis xkita tla iuelis timoapolaktis. Niman maka xkilkaua tikinamapouas textos achto titlanankilis.

¿Titlaneltoka itech Jehová? ¿Kenon tikteititia? (Salmo 71:5). ․․․․․

¿Tiueli tiktlapejpenia tlen kuajli itech tlen xkuajli? ¿Kemanon ijkon yotikchiujka? (Hebreos 5:14). ․․․․․

¿Nochipa tiknotsa toTajtsin?. ․․․․․

Ijkuak tiknotsa toTajtsin, ¿kuajli tikasikamachiltia tlenon tikijlisneki? ¿Nesi ika tiktlasojtla Jehová ika tlen tikijtoua ipan moteoyouan? (Salmo 17:6). ․․․․․

¿Tlenon tikuelitaskia tikchiuas niman ijkon más kuajli tiknotsas toTajtsin? ․․․․․

¿Miyekpa timomachtia Biblia? (Josué 1:8). ․․․․․

¿Itech tlenon timomachtia ijkuak san moselti timomachtia? ․․․․․

¿Tlenon tikneki tikchiuas ijkuak san moselti timomachtia? ․․․․․

¿Tikijtoskia ika kuajli ken titenojnotsa? (San xkonnemili: ¿Ueli tikimijlia oksekimej itech tlamachtiltin itech Biblia tlen xmás ouijtika tikinmasikamatis? ¿Oksejpa tikomintlajpaloua akin kuajli omitskakej? ¿Tikyejyekojtika tiknextis akin tikmachtis itech Biblia?)

□ Kema □ Ka

¿Tiauj tontenojnotsa maski xyauej motajuan? (Hechos 5:42).

□ Kema □ Ka

¿Tlenon más tikneki tikchiuas ijkuak titenojnotsa? (2 Timoteo 2:15). ․․․․․

¿Nochipa tiauj ipan tlanechikoltin, noso miyekpa xtiauj? (Hebreos 10:25). ․․․․․

¿Titlanankilia noso titlapaleuiya ijkuak tiauj tlanechikoltin? ․․․․․

Tla motajuan mitskauiliaj, ¿tiauj tlanechikoltin ijkuak yejuamej xueli yauej?

□ Kema □ Ka

¿Mitsyolpaktia tikchiuas tlen Jehová kineki? (Salmo 40:8).

□ Kema □ Ka

¿Tikilnamiki ijkuak xotikchiuj itlaj tlen mitschiualtisnekiyaj akin imiuan timomachtia? (Romanos 12:2). ․․․․․

¿Tlenon tikuelitaskia tikchiuas niman ijkon xkeman tijkajkauas ika tiktlasojtla Jehová? (Judas 20, 21). ․․․․․

Tla motajuan noso moamigos kikauaskiaj Jehová, ¿tejua ok tiktekichiuiliskia? (Mateo 10:36, 37).

□ Kema □ Ka

[Tlaixkopinajli]

Timoapolaktis noijki yeskia ken timonamiktis: xnoneki san tikauilmatis