IJKUAK Jesús otlejkok iluikak, opanok majtlaktli tonaltin niman ijkuak iluichiuayaj judíos ipan Pentecostés, xiuitl 33, kanaj ciento veinte inomachtijkauan Jesús onosentlalijkej ipan se kajli ne Jerusalén. Ijkuak ompa nemiyaj, onokak kentla melak chikauak oajakak, niman inomachtijkauan Cristo opeujkej tlajtouaj okseki tlajtoltin tlen xkimixmatiyaj. ¿Tlenon panouaya? ToTajtsin okiminmakak iespíritu santo.

Ipan yejon ueyikalpan nemiyaj miyekej tlaltikpakchanejkej akin ualeuayaj ipan oksekimej países, oiluipanotoj. Nochimej omojkatlachixkej ijkuak opeuj kikakij ika inomachtijkauan Cristo opeujkej kiminojnotsaj ika imintlajtol. Pedro opeuj kimintomilia tlen opanok niman okimijli tlen teotlajtoketl Joel yokijkuilojka, ika toTajtsin kiminmakaskia iespíritu santo itekipanojkauan niman ijkon kichiuaskiaj miyek milagros (Joel 2:28, 29). Ika nochi milagros tlen okichiujkej, okiteititijkej ika yejuamej melauak katkaj itlanechikol toTajtsin, xijkon ken opanok iuan ikalpan Israel, akin xok kipiayaj itlateochiualis toTajtsin. Ijkon, maski san akinon kinekis kitekichiuilis toTajtsin nonekiya makichiua ken Cristo.

Kuakon, akin kimintlauelitayaj inomachtijkauan Cristo opeuj kinmintlaueltokaj. Se tonajli sekimej okintsajkej, san ika se iluikaktekitketl ika yeuajli okiminmakauj niman okimijli ika oksejpa matenojnotsakan. Ijkuak otlanes, okalajkej teopan niman opeujkej tlajtouaj itech Jesús. Tlayekankej ipan tlanauatijli melak okualankej, okiminauatijkej maka sa matenojnotsakan. Itlatitlankauan Jesús, ika yolchikaualistli okiminankilijkej: “Kimelaua tiktlakamatiskej achtoj Dios xken nemejuamej yejuan san nentlakamej” (Hechos 5:28, 29).

Akin kinmintlaueltotokaj xonoteltijkej, ika ueyi tlauejli opeujkej kintlajyouiltiaj inomachtijkauan Cristo. Sekimej judíos okiteixpantijkej Esteban niman okijtokej ika okiuijuikalti toTajtsin, kuakon okitemojmotlakej niman okimiktijkej. Saulo chanej Tarso okitak kenon okimiktijkej, yejuin telpochtli kimintlauelitaya nochimej akin kichiuayaj ken Cristo. Ijkuak yopanoka yejuin, oyaj ipan ueyikalpan Damasco, pampa kinekiyaj kintsakuas nochimej akin kichiuayaj ken Cristo. Ipan ojtli, se tlauijli tlen ualeuaya iluikak okichiuj maka sa matlachia. Kuakon okikak se tlajtojli tlen kijliaya: “Saulo, saulo, ¿tleka tinechtlauelita niman tinechtlajyouiltijtinemi?”. Maski nomojtiaya okitlajtolti: “¿Akin tejua[...]?”. Kuakon yejon tlajtojli okijli: “Nejua niJesús” (Hechos 9: 3-5).

Opanok yeyi tonajli, kuakon Jesús okititlan inomachtijkauj Ananías makipajtiti Saulo ixtololouan. Saulo onoapolakti niman opeuj tenojnotsa ika miyek paktli. Sakin ijkuak opanok miyek xiujtin, okixmatkej kentla Pablo itlatitlankauj Cristo, se tlanojnotsketl itech kuajli tlajtoltin akin kichiuaya ken Cristo niman xkeman siauiya.

Kachtopa, akin kichiuayaj ken Cristo san kiminojnotsayaj itech iTekiuajyo toTajtsin akin judíos katkaj niman samaritanos. San ika se tonajli, se iluikaktekitketl onoteititi itech Cornelio, tlayekanketl itech sekimej soldados romanos akin melak kitlakaitaya toTajtsin, yejua okinauati makinotsati Pedro, se itlatitlankauj Cristo. Yejua oajsik iuan oksekimej akin kichiuayaj ken Cristo niman opeuj kinojnotsa Cornelio iuan ichanejkauan. Ijkuak Pedro kiminojnotstoya, okiselijkej espíritu santo, niman Pedro otlanauati makiminapolaktikan ipampa itoka Jesús. Kuakon ompa opeuj ika, maski san akinon niman maski san kanon machanej, uelis kiselis nemilistli tlen xkeman tlamis. Yejon kuajli tlajtoltin noteijlis ipan nochiuiyan tlaltikpaktli.

(Onokixti itech Hechos 1:1–11:21.)