SECCIÓN 8
Ijkuak panoua itlaj tlen melak xkuajli
“Nemejuamej sanoyej nempakij maski kas nenkijyouiskej keski tonaltin miyek tlajtlamach tetlatlatalistli.” (1 Pedro 1:6)
Maski melak timochikauas tinemis ika pakilistli iuan moixnamik niman iuan mochanejkauan, kemantika panos itlaj tlen kichiuas maka sa xpaki (Eclesiastés 9:11). San ika, toTajtsin techpaleuiya ijkuak tikixnamikij tlemach tlen ouijtika. Tla nenkintlakamatij tlajtolyekanalistin tlen uajlauej ipan Biblia, tejua iuan mochanejkauan uelis nenkixikoskej hasta tlen melak teyolkoko.
1 XTLANELTOKA ITECH JEHOVÁ
TLEN BIBLIA KIJTOUA: “Xmaktilikan Dios nochi on tlajtlamach yejuan san nenkomatstokej pampa yejua kineki mechpaleuis” (1 Pedro 5:7). Nochipa xkilnamiki ika toTajtsin xkipiya tlajtlakojli itech tlen tikixnamiki (Santiago 1:13). Tla tiknisiuiya, melak mitspaleuis (Isaías 41:10). “Ixpan xtlapouilikan nemoyojlo.” (Salmo 62:8.)
Noijki mitsyolseuis tla tikpoua niman timomachtia Biblia mojmostla. Tla ijkon tikchiua, tikitas ika Jehová yemelak “techyoltlalia ipan nochi on tlin techpajsoloua” (2 Corintios 1:3, 4; Romanos 15:4). Yejua kijtoua ika mitsmakas “yolseuilistli [...] más ueyi de nochi kech se tlakatl uelis kajsikamatis” (Filipenses 4:6, 7, 13).
TLEN UELIS TIKCHIUAS:
-
Xtlajtlanili Jehová mamitspaleui maka melak xmotekipacho niman mamitskauili kuajli xtlanemili
-
Xkita nochi tlen uelis tikchiuas niman xtlapejpeni tlen melak mitspaleuis
2 XMOTLAJPIYA TEJUA NIMAN NOIJKI XKINTLAJPIYA MOCHANEJKAUAN
TLEN BIBLIA KIJTOUA: “Iyojlo akin kuajli kasikamati kipiya tlaixmatilistli, niman inakas akin tlamachilise kitejtemoua kinextis tlaixmatilistli” (Proverbios 18:15). ¿Tlenon kinpoloua moixnamik niman mokoneuan? Kuajli xkita tleka ijkon nomachiliaj. Imiuan xtlajto niman xkinkaki (Proverbios 20:5).
Aman, ¿tla miki se akin tiktlasojtla? Maka xpinaui tikteititis tlen tikmachilia. Xkilnamiki ika hasta “Jesús ochokak” (Juan 11:35; Eclesiastés 3:4). Noijki melak noneki kuajli timoseuis niman tikochis (Eclesiastés 4:6). Tla ijkon tikchiua, mitspaleuis tikixnamikis tlen nemopan nochiujtika.
TLEN UELIS TIKCHIUAS:
-
Xmomati iuan xtlajto mochanejkauan ijkuak ok xpanoua tlen xkuajli. Ijkon, ijkuak itlaj panos, uelis mitsijliskej tlen melauak kimachiliaj
-
Xtlajto imiuan akin noijki ijkon inpan yonochiuj
3 XTEJTEMO TLAPALEUILISTLI TLEN MITSPOLOUA
TLEN BIBLIA KIJTOUA: “Se akin melauak kuajli iuan touikaj nochipa techtlasojtla, niman nochiua ken tokniuj ijkuak tikpiyaj tlajyouilistli” (Proverbios 17:17). Akin imiuan timouika kinekij mitspaleuiskej, san ika, kanaj xkimatij kenon kichiuaskej. Xkimijli tlenon mitspoloua (Proverbios 12:25). Noijki, xkintejtemo akin kuajli kixmatij Biblia mamitspaleuikan. Tlapaleuilistli tlen mitsmakaskej ika Biblia, mitspaleuis tikixnamikis tlauejli (Santiago 5:14).
Tla nochipa timosentlalia imiuan akin melauak tlaneltokaj itech toTajtsin niman kineltokaj itech tlen yokijto kichiuas, tiknextis tlapaleuilistli tlen mitspoloua. Noijki melak mitsyolseuis tla tikinpaleuiya akin najmantokej. Xkinnojnotsa itech motlaneltokil tlen tikpiya itech Jehová niman itech tlen yejua yokijto kichiuas. Nochipa xchiua itlaj inpampa oksekimej niman maka xkintlalkaui akin mitstlasojtlaj niman najmanaj mopampa (Proverbios 18:1; 1 Corintios 15:58).
TLEN UELIS TIKCHIUAS:
-
Xtlajto iuan akin melak kuajli timouika niman xkauili mamitspaleui
-
Xmelajkaijto tlenon mitspoloua
