Kuajli tikmatstokej ika tla kemantika tikpiyaj se tlauejli, akin yemelak iuan touikaj nimantsin techpaleuiskia. Yejua ika, miyekej kijtouaj ika toTajtsin xtouan nouika pampa kinemiliaj ika xitlaj kichiua topampa. San ika, yejua melak miyek yokichiuj topampa, niman sa achijtsin poliui ijkuak kichiuas itlaj niman ijkon kinpopolos totlaueluan niman tlen techtlajyouiltia. ¿Tlenon kichiuas?

ToTajtsin kipopolos akin kichiua maonia tlen xkuajli. Biblia techijlia akinon kichiua ika maonia tlen xkuajli, kijtoua: “On diablo ipan ima kimpiya nochimej on tlakamej de in tlaltikpaktli” (1 Juan 5:19). Jesús okijto ika Diablo yejua akin “kimandaroua in tlaltikpaktli” (Juan 12:31). Satanás yejua akin kichiua ika tlaltikpakchanejkej inpan manochiua tlen xkuajli. ¿Tlenon kichiuas toTajtsin?

ToTajtsin Jehová, itechkopa Jesucristo, kixoxotonis noso kipopolos “on diablo” (Hebreos 2:14; 1 Juan 3:8). Niman Biblia kijtoua ika Diablo kimatstika “ika xok uejkajtika” ika kipopoloskej (Apocalipsis 12:12). ToTajtsin noijki kinpopolos akin kichiuaj tlen xkuajli (Salmo 37:9; Proverbios 2:22).

Sakin tla yokipopolo tlen xkuajli, toTlachijchiujkauj kichiuas tlen yokijtoka, kuakon, tlaltikpakchanejkej nochipa nemiskej ipan se xochitlalpan. ¿Kenon nemiskej akin kiseliskej yejon tlateochiualistli?

Nochipa onias yolseuilistli. “Pero on yejuan yolyemankej itech toTEKO, kiseliskej on kuajli tlajli. Niman sanoyej pakanemiskej ikan yolseuilistli pampa xitlaj kimpajsolos” (Salmo 37:11).

Onias miyek tlakuajli. “Onias miyek trigo ipan nochi tlaltikpaktli; inkuatipan tepemej melak tlatlakis” (Salmo 72:16, TNM).

Kuajli yes kampa chantilos niman onias tekitl tlen teyolpakti. “Kinchijchiuaskej kaltin niman ompa chantiskej, niman kitokaskej uvas niman kikuaskej itlakilyo. [...] Tlen kichiuaskej ika imauan notlapejpenijkauan melak kinyolpaktis” (Isaías 65:21, 22).

¿Xtikuelitaskia ompa tinemis? Sa achijtsin poliui ijkuak nochi yejuin nochiuas.

Aman tinochimej tikualoj niman timikij, san ika, xnochipa ijkon yes. Sa achijtsin poliui ijkuak tikseliskej “nemilistli para nochipa” pampa toTajtsin “okitemakak isenteKonetsin para nochi on akin kineltokas xpoliuis” (Juan 3:16). ¿Tlenon kijtosneki yejuin?

Xok onias kokolistli. “Xok yakaj yejuan nemi kijtos: ‘Nikualo’. To Teko kintlapojpoluilis imintlajtlakoluan” (Isaías 33:24).

Xok onias mikilistli. ToTajtsin Jehová “para nochipa kixoxotonis on mikilistli niman nochimej kimixayopojpouas” (Isaías 25:8).

Tlaltikpakchanejkej kipiyaskej nemilistli tlen xkeman tlamis. “Itetlayokolil Dios kitemaka nemilistli yejuan para nochipa. Niman on nemilistli tikseliaj itechkopa toTEKO” Jesucristo (Romanos 6:23).

Akin yomijkej yoliuiskej. “On mikatsitsimej yoliuiskej nochimej yejuan yolmelajkej niman on yejuan xyolmelajkej” (Hechos 24:15). Pampa Jesús okitemakak inemilis ken tlaxtlauijli, akin yomijkej uelis yoliuiskej.

¿Kenon kichiuas toTajtsin nochi yejuin?

Itechkopa se tekiuajyotl tlen onka iluikak kampa Jesucristo yejua Tekiuaj, toTajtsin kichiuas tlen kineki inpampa tlaltikpakchanejkej niman ipampa tlaltikpaktli (Salmo 110:1, 2). Yejuin sa no yejua Tekiuajyotl tlen Jesús okimijli inomachtijkauan makitlajtlanikan ika yejuin tlajtoltin: “ToTajtsin akin tinemi ne iluikak [...]. Mauajla motekiuajyo” (Mateo 6:9, 10, TNM).

ITekiuajyo toTajtsin tlayekanas ipan nochi tlaltikpaktli niman kipopolos ajmantli niman tlen kichiua matitlajyouikan. Xonka okse Tekiuajyotl ken yejuin tlen kinpaleuis tlaltikpakchanejkej. Yejua ika, Jesús melak onokojtili kiteijlis kuajli tlajtoltin itech Tekiuajyotl ijkuak ouajla ipan tlaltikpaktli niman okimijli inomachtijkauan ika noijki makichiuakan (Mateo 4:23; Mateo 24:14, TNM).

Jehová yokijto ika kichiuas nochi yejuin tlen melak kualtsin pampa sajnoye techtlasojtla. ¿Xmitsyolmapeua yejuin ika xneki más kuajli tikixmatis niman iuan timouikas? ¿Katlejua tlateochiualistin tikselis tla ijkon tikchiua? Matikitakan ipan okse tlamachtijli.