Tlen melauak itech tlen panos ika tlayekapan
¿Kemantika yotimotlajtoltijka tlenon panos ika tlayekapan? Biblia kijtoua ika tikitaskej miyek tlemach tlen tinochimej techijtlakos.
Jesús okijto kenon tejuamej ueliskia tikmatiskej ika “ye nisiu para Dios tlamandaros” (Lucas 21:31). Yejua okijto ika oniaskiaj miyek guerras, chikauak tlaloliniskia, oniaskia apistli niman uejueyi kokolistin, niman aman tikitaj ika ijkon nochiujtok (Lucas 21:10-17).
Biblia noijki kijtoua ika ipan itlamiyan tonaltin miyekej kichiuaskiaj tlen xkuajli. Xkamapoua yejuin tlen toTajtsin okijto ika panoskia ipan 2 Timoteo 3:1-5. Kanaj tejua kuajli tikita ika aman miyekej ijkon kichiujtokej.
¿Tlenon kijtosneki nochi yejuin? Ika xok uejkaujtipan iTekiuajyo toTajtsin kiyektlalis tlen panoua ipan tlaltikpaktli niman kichiuas ika kuajli matinemikan (Lucas 21:36). ToTajtsin yokijto ipan Biblia ika kiyektlalis yejuin tlaltikpaktli niman kinpaleuis akin ompa chantiskej. Matikitakan seki tlen kichiuas.
SE KUAJLI TEKIUAJ
Jesús “okimakakej poder para tlamandaros, yekteneualistli niman sen reinojyotl. Niman nochi tlakatl de nochimej naciones, niman nochimej on yejuan tlajtlajtouaj sesekneka tlajtoltin, kimauistiliayaj. Ipoder nochipa ijki yes, [...] niman ireinoyo xkaman kixoxotoniskej” (DANIEL 7:14).
Tlen kijtosneki. Ika toTajtsin yokitlali se Tekiuajyotl tlen kema kuajli tlayekanas ipan nochi tlaltikpaktli niman ika Jesús yejua akin Tekiuaj. Ijkuak yejon Tekiuajyotl techyekanas, nochipa tiyolpakiskej.
XOK YAKAJ KUALOS
“Xok yakaj kijtos: ‘Nikualo’” (ISAÍAS 33:24).
Tlen kijtosneki. Ika xok keman itlaj techkokos nion xok tikualoskej. Uelis nochipa tinemiskej niman xok keman timikiskej.
ONIAS YOLSEUILISTLI
ToTajtsin kichiuas “maka ma onyaj guerras” (SALMO 46:9).
Tlen kijtosneki. Ika xok yakaj kichiuas maonia tlauejli niman ika xok yakaj tlajyouis ipampa guerras.
SAN NEMISKEJ AKIN KUAJLI INYOJLO
“On xompayejyeuamej [noso xkuajkualtin] popoliuiskej. [...] Pero on yejuan yolyemankej itech toTEKO, kiseliskej on kuajli tlajli” (SALMO 37:10, 11).
Tlen kijtosneki. Ika xok nemiskej akin kichiuaj tlen xkuajli, san nemiskej akin kinekiskej kitlakamatiskej toTajtsin.
NOCHI TLALTIKPAKTLI YES SE XOCHITLALPAN
“Kinchijchiuaskej inkaluan niman kuajli ompa chantiskej, tlatokaskej ikan uvas, niman yejuamej kikuaskej itlakyo on uvas” (ISAÍAS 65:21, 22).
Tlen kijtosneki. Ika nochi tlaltikpaktli nochiuas se kualtsin xochitlalpan. ToTajtsin kichiuas tlen melak tiktlajtlaniliaj: manochiua tlen kineki “ipan in tlaltikpaktli” (Mateo 6:10).
