Ijkuak noilnamiki imikilis Cristo tepaleuiya san sekan matinemikan
“¡Xkitakan! ¡Melak kuajli niman teyolpakti ika ikniujtin san sekan manemikan!” (SAL. 133:1).
1, 2. ¿Tlenon panos tlen kichiuas manosentlalikan melak miyekej tlaltikpakchanejkej ipan xiuitl 2018, niman tleka melak ueyi kijtosneki? (Xkita tlaixkopinajli kampa peua tlen tomachtijtokej).
IPAN marzo 31, xiuitl 2018, ijkuak ikalaktias Tonajli melak miyekej itekipanojkauan toTajtsin niman akin kemach peuaj nomachtiaj, nosentlalijtiaskej niman ijkon kilnamikiskej iTlakualis toTeko. Ijkuak noilnamiki imikilis Cristo, tlen nochiua san sejpa ipan se xiuitl, kinsentlalia tlaltikpakchanejkej ken xkichiua itlaj okse ipan tlaltikpaktli.
2 Jehová niman Jesús kanaj melak yolpakij ijkuak kitaj melak miyekej tlaltikpakchanejkej nosentlaliaj ipan yejuin tonajli tlen melak ueyi kijtosneki tlen nochiua ipan nochi tlaltikpaktli. Biblia yokijtoka ika melak miyekej tlaltikpakchanejkej akin “xakaj ueliya kimpouaya” itech “nochiuiyan países, nochi raza, nochi pueblo niman nochi sesetlamantik tlajtoltin” kijtoskiaj: “Totemakixtilis tikseliaj itech toDios yejuan yeuatikaj ipan iueyixtikaj trono niman itech on Borreguito” (Apoc. 7:9, 10). Melak kualtsin ika nochi xiujtin miyekej tlaltikpakchanejkej kiueyiteneuaj Jehová niman Jesús ijkuak noilnamiki imikilis Cristo.
3. ¿Katlejua tlajtoltilistin tikinnankiliskej ipan yejuin tlamachtijli?
3 Ipan yejuin tlamachtijli, tikinnankiliskej naui tlajtoltilistin. Kachtopa, ¿kenon uelis toyektlaliskej niman topaleuiskej itech tonajli ijkuak tikilnamikiskej imikilis Cristo? Ome, ¿tleka ijkuak noilnamiki imikilis Cristo tepaleuiya ika ikalpan toTajtsin san sekan manemi? Yeyi, ¿kenon uelis titlapaleuiskej san sekan matinemikan? Niman naui, ¿yejkos tonajli ijkuak sa ika tlamis tikilnamikiskej imikilis Cristo? Tla kema ijkon, ¿kemanon yes?
KENON TOYEKTLALISKEJ NIMAN TOPALEUISKEJ IJKUAK TIKILNAMIKISKEJ IMIKILIS CRISTO
4. ¿Tleka melak ueyi kijtosneki matikchiuakan nochi tlen tiueliskej niman ijkon tonechikoskej ijkuak noilnamikis imikilis Cristo?
4 ¿Tleka melak ueyi kijtosneki matonechikokan ijkuak noilnamikis imikilis Cristo? Matikilnamikikan ika totlanechikoluan noijki tlen ika tikueyichiuaj toTajtsin. Niman uelis tikmatstoskej ika Jehová niman Jesús kuajli kitstokej akinomej nokojtiliaj yaskej ipan yejuin tlanechikojli tlen melak ueyi kijtosneki itech nochi xiuitl. Tiknekij makitakan ika ompa tinemiskej, niman ika san ueliskia techteltis se kokolistli tlen melak ueyi noso okse itlaj melak ouijtika. Ijkuak ika tlen tikchiuaj tikteititiaj ika totlanechikoluan ueyi kijtosnekij, nochi yejon kichiua ika Jehová makipiya totokayo ipan “amoxtli tlen tetlalnamiktia”. Yejuin amoxtli, tlen noijki kitokayotiaj “tlajkuilolamatl yejuan kijtoua akinomej kipiaj yenkuik nemilistli”, kipiya intokayo nochimej akin Jehová kineki kinmakas nemilistli tlen xkeman tlamis (Mal. 3:16; Apoc. 20:15).
5. Ipan tonaltin achto yejkos ijkuak tikilnamikiskej imikilis Cristo, ¿kenon uelis totlatlataskej niman ijkon tikitaskej tla timelajkanemij ipan totlaneltokil?
5 Ipan tonaltin achto yejkos ijkuak tikilnamikiskej imikilis Cristo, uelis tikxeloskej tiempo niman ijkon tikchiuaskej teoyotl niman kuajli tikitaskej kenon touikaj iuan Jehová (xpoua 2 Corintios 13:5). ¿Kenon uelis tikchiuaskej? Pablo okijto ika noneki matotlatlatakan niman ijkon tikitaskej tla timelajkanemij ipan totlaneltokil. Uelis tikchiuaskej yejon tla totlajtoltiaj: “¿Yemelak nikneltoka ika ninemi ipan ikalpan Jehová tlen yejua kitekitiltia niman ijkon kichiuas tlen kineki? ¿Nikchiua nochi tlen niueli ika nitenojnotsas niman nitemachtis kuajli tlajtoltin itech Tekiuajyotl? ¿Nikteititia ika tlen nikchiua ika yemelak nikneltoka ika tinentokej ipan itlamiyan tonaltin niman iyejkotika ijkuak tlamis itlayekanalis Satanás? ¿Ok nitlaneltoka itech Jehová niman Jesús ijkon ken ijkuak oninosentemakak?” (Mat. 24:14, TNM; 2 Tim. 3:1; Heb. 3:14). Titlanemiliskej itech ken nonankiliaj yejuin tlajtoltilistin techpaleuis ok matikteititijtokan tiakinomej.
6. a) ¿San kenon uelis tikseliskej nemilistli tlen xkeman tlamis? b) ¿Kenon noyektlalia se tlayekanketl nochi xiujtin achto ika noilnamikis imikilis Cristo, niman kenon noijki uelis tikchiuaskej ken yejua?
6 Se ken uelis toyektlaliskej achto ika yejkos ijkuak tikilnamikiskej imikilis Cristo yejua tikpouaskej tlamachtiltin itech Biblia tlen matlajtokan itech kenon yejuin melak ueyi kijtosneki niman intech titlanemiliskej (xpoua Juan 3:16; 17:3). San uelis tikpiyaskej nemilistli tlen xkeman tlamis tla kuajli tikixmatij Jehová niman titlaneltokaj itech Jesús, isenteKonetsin toTajtsin. Ijkuak tikilnamikiskej imikilis Cristo uelis toyektlaliskej ika tomachtiskej itech, tlen techpaleuis matiknisiuikan Jehová niman Jesús. Matitlanemilikan itech tlen kichiua se tlayekanketl akin chikauak itlaneltokil. Youejkauj ika yejua kimejyeua tlamachtiltin itech Amatl Tekakistilijketl tlen tlajtoua itech imikilis Cristo niman itech tlasojtlalistli tlen yotechititijkej Jehová niman Jesús. Nochi xiujtin, ipan semanas achto ika noilnamikis imikilis Cristo, oksejpa kinpoua tlamachtiltin niman tlanemilia itech kech ueyi kijtosneki yejuin tonajli. Kemantika, okse kitlalia ipan tlen ikejyeujtika itech yejon tlamachtiltin. Tokniuj yokitak ika pampa yonomat oksejpa kimitas tlamachtiltin, kipouas Biblia tlen noneki ijkuak noilnamiki imikilis Cristo niman tlanemilis itech tlen yokipouj, kikauilia maueli okseki tlen yenkuik nochi xiujtin. San ika, tlen melak ueyi kijtosneki yejua ika kimachilia ika mojmostla ueyiya kech kintlasojtla Jehová niman Jesús. Tomachtiskej ijkon ken yejua, uelis kichiuas ika maueyiya ken tikintlasojtlaj niman matikinpatiojkaitakan, niman yejuin kichiuas ika melak matopaleuikan itech tonajli ijkuak tikilnamikij imikilis Cristo.
IJKUAK NOILNAMIKI IMIKILIS CRISTO TEPALEUIYA SAN SEKAN MATINEMIKAN
7. a) ¿Tlenon okitlajtlan Jesús ipan se teoyotl ipan yeuajli ijkuak kachtopa onochiuj itlakualis toTeko? b) ¿Kenon tikmatij ika Jehová yokinankili iteoyouj Jesús?
7 Yeuajli ijkuak onochiuj kachtopa iTlakualis toTeko, Jesús okitlajtlan ipan se teoyotl ika inomachtijkauan noijki kualtsin manouikakan ijkon ken yejua niman iTaj nouikaj (xpoua Juan 17:20, 21). Yemelak, Jehová yokinankili yejon teoyotl tlen okichiuili ikonetsin akin kitlasojtla. Niman ijkon ken xueli kichiua okse tlanechikojli, ijkuak tikilnamikij imikilis Cristo kuajli kiteititia ika iteixpantijkauan Jehová san sekan tinemij. Yejon tonajli, melak miyekej tlaltikpakchanejkej itech miyek países niman razas nosentlaliaj ipan nochi tlaltikpaktli niman kiteititiaj ika kineltokaj ika Jehová okuajtitlan ikonetsin. Ipan seki kalpamej, xmiyekpa noita noso hasta xkuajli kitaj ijkuak tlaltikpakchanejkej akin ualeuaj itech okseki razas nosentlaliaj ipampa intlaneltokil. San ika, Jehová niman Jesús kitaj melak kualtsin ika san sekan tinemij.
8. ¿Ika tlen tlajtoltin Jehová okijli Ezequiel ika ikalpan san sekan nemiskia?
8 Itekipanojkauan Jehová xtechmojkatlachialtia ika kualtsin san sekan tinemij. Jehová yokijtoka ika panoskia yejuin ipan tlajtoltin tlen okimakak teotlajtoketl Ezequiel. Tlen okijli kijtouaya ika ome tlakotl, se iyaxka Judá, niman okse iyaxka José, nosentlaliskiaj niman nochiuaskiaj san se (xpoua Ezequiel 37:15-17). * Ipan sección “Preguntas de los lectores”, itech La Atalaya julio 2016 otetomili: “Jehová okimakak Ezequiel tlajtoltin itech tlamachialistli: okijli ika kisentlaliskia kalpan Israel ijkuak uajnokuepaskiaj ipan tlajli tlen yokimijlika kinmakas sakin ika okinuikakaj ipan okse kalpan. Ika yejuin tlajtoltin, noijki okijto ika ikalpan toTajtsin san sekan nemiskia ipan itlamiyan tonaltin”.
9. ¿Kenon nochi xiujtin kuajli nesi ika teotlajtojli tlen okijto Ezequiel yemelak nochiujtika ijkuak noilnamiki imikilis Cristo?
9 Ipan 1919, Jehová kachtopa oksejpa okinyektlali niman okinsentlali ika yolik tlapejpeniltin, akin katkaj kentla tlakotl tlen “iyaxka Judá”. Sakin melak miyekej tlaltikpakchanejkej akin kichiaj nemiskej ipan tlaltikpaktli opeujkej inuan nosentlaliaj, yejuamej kentla tlakotl tlen “iyaxka José”. Jehová okijtoka ika kinsentlaliskia yejuin ome tlakotl niman nochiuaskia san “se tlakotl” ipan ima (Ezeq. 37:19). Yejua okichiuj ika tlapejpeniltin niman okseki borreguitos san sekan manemikan (Juan 10:16; Zac. 8:23). Ipan yejuin tonajli, yejuin ome grupos san sekan kitekichiuiliaj san se Tekiuaj, Jesús akin yokiueyichiujkej, akin toTajtsin okitokayoti “notekipanojkauj David” ipan teotlajtojli tlen okijto Ezequiel (Ezeq. 37:24, 25). Nochi xiujtin, ken kualtsin san sekan nemij ijkon ken okijtoka Ezequiel, kuajli nesi ijkuak akin ok nokauaj itech tlapejpeniltin niman okseki borreguitos nosentlaliaj niman kilnamikij imikilis Cristo. Aman tej, ¿tlenon uelis tikchiuaskej tisesentemej niman ijkon tiktlajpiyaskej niman titlapaleuiskej san sekan matinemikan?
KENON TITLAPALEUIYAJ SAN SEKAN MATINEMIKAN
10. ¿Kenon uelis titlapaleuiskej san sekan manemi ikalpan toTajtsin?
10 Se ken uelis titlapaleuiskej ika san sekan manemi ikalpan toTajtsin yejua tla tochiuaj tiyolyemankej. Ijkuak Jesús onen ipan tlaltikpaktli, okimijli inomachtijkauan ika nonekiya yolyemankej yeskej (Mat. 23:12). Tlaltikpakchanejkej miyekpa kinemiliaj ika uejueyixtokej xijkon ken oksekimej. San ika, tla tejuamej tiyolyemankej, tikintlakaitaskej tokniuan akin kiyekanaj tlanechikojli. Tla tiknekij ika ipan tlanechikojli san sekan matinemikan, melak noneki matitetlakamatikan. San ika, tlen melak ueyi kijtosneki yejua ika toyolyemanilis kiyolpaktis Jehová, pampa yejua “xkinselia on yejuan noueyimatkej, pero yejua kimpaleuiya ikan iteiknelilis on yejuan yolyemankej” (1 Ped. 5:5).
11. ¿Tleka ijkuak noilnamiki imikilis Cristo niman titlanemiliaj itech tlen kijtosneki pan niman vino techpaleuiya san sekan matinemikan?
11 Ika ome ken uelis titlapaleuiskej matinemikan san sekan yejua kuajli titlanemiliskej itech tlenon kijtosneki pan niman vino tlen notekitiltia ijkuak noilnamiki imikilis Cristo. Noneki matikchiuakan achto ika yejkos yejon yeuajli ijkuak tikilnamikiskej, niman melak noneki ipan yejon yeuajli (1 Cor. 11:23-25). Pan tlen xkipiya tlaxokolilistli kijtosneki itlalnakayo Jesús tlen xkipiya tlajtlakojli niman tlen okitemakak ken uentli, niman vino kijtosneki iyesyo tlen okitoyauj. San ika, xsan noneki matikasikamatikan tlen kijtosneki yejuin. Matikilnamikikan ika pampa Jesús onotemakak, onoteititi ome tlasojtlalistli tlen melak ueyi kijtosnekij: tlasojtlalistli tlen Jehová okiteititi ijkuak okitemakak iKonetsin niman ijkon techmakixtis, niman tlasojtlalistli tlen Jesús okiteititi ijkuak okinek kitemakas inemilis topampa. Kuajli titlanemiliskej itech yejuin kipiya ika techyolchikauas noijki matikintlasojtlakan. Niman tlasojtlalistli tlen tikmachiliaj ipampa Jehová niman ipampa tokniuan kentla se mekatl tlen techsentlalia niman techpaleuiya san sekan matinemikan.
Ijkuak titetlapopoluiyaj, titlapaleuiyaj san sekan matinemikan. (Xkita párrafos 12 niman 13).
12. Ipan neskayotl itech tekiuaj niman itlakeualuan, ¿kenon kuajli okiteititi Jesús ika Jehová kichia matikintlapopoluikan tokniuan?
12 Ika yeyi ken uelis titlapaleuiskej matinemikan san sekan yejua tla tikintlapopoluiyaj oksekimej. Ijkuak tikintlapopoluiyaj akin techyolkokouaj, tikteititiaj ika tiktlasojkamatij ika Jehová ueli techtlapopoluiya itechkopa imikilis Cristo. Matitlanemilikan itech se neskayotl tlen Jesús okiteneuj niman onka ipan Mateo 18:23-34. Matotlajtoltikan: “¿Nechyolchikaua yejuin neskayotl manikchiua tlen Jesús otemachti? ¿Nikimijyouiya niman nikimasikamati tokniuan? ¿Niknektika nikintlapopoluis akin nechyolkokouaj?”. Melauak ika seki tlajtlakoltin uejueyimej niman okseki ka. Noijki, tinochimej titlajtlakolejkej niman ouijtika tiktlapopoluiyaj seki tlen texchiuiliaj. San ika, itlajtoluan Jesús kiteititiaj tlen Jehová kichia matikchiuakan (xpoua Mateo 18:35). Jesús kuajli techititia ika Jehová xtechtlapopoluis tla xtikintlapopoluiyaj tokniuan ijkuak onka tlen techititia ika noneki tikchiuaskej. Yejuin itlaj tlen noneki kuajli itech matitlanemilikan. Ijkuak tiktlakamatij Jesús niman tikintlapopoluiyaj oksekimej, tiktlajpiyaj ken san sekan tinemij niman titlapaleuiyaj ijkon matinemikan.
13. ¿Kenon titlapaleuiyaj san sekan matinemikan ijkuak tikchiuaj maonia yolseuilistli imiuan tokniuan?
13 Ijkuak tikintlapopoluiyaj tokniuan, tikchiuaj imiuan matikpiyakan yolseuilistli. Matikilnamikikan ika apóstol Pablo okijto: “Xkauilikan on Espíritu ma mechmaka yolseuilistli yejuan mechsentlalia semej iuan oksekimej” (Efes. 4:3). Ipan tonaltin ijkuak iyejkos ika noilnamikis imikilis Cristo niman ipan yejon yeuajli ijkuak panotos, kuajli matitlanemilikan itech kenon touikaj iuan oksekimej. Matotlajtoltikan: “¿Nikteititia ika tlen nikchiua ika xnitetlauelitstinemi? ¿Uelij kitaj oksekimej ika nikchiua nochi tlen niueli ika maonia yolseuilistli niman ika san sekan matinemikan?” Ipan yejon tonaltin, matitlanemilikan itech yejuin tlen melak ueyi kijtosneki.
14. ¿Kenon uelis tikteititiskej ika toijyouiyaj semej iuan oksekimej ika tlasojtlalistli?
14 Ika naui ken uelis titlapaleuiskej san sekan matinemikan yejua tikteititiskej tlasojtlalistli ijkon ken kichiua Jehová, toTajtsin akin yejua tetlasojtlalistli (1 Juan 4:8). Maka keman matikijtokan itlaj ken yejuin: “Nikmatstika ika noneki nikinxikos tokniuan, san ika, xkipiya ika imiuan kuajli ninouikas”. Titlanemilis ijkon kixnamiki itlajtoluan Pablo tlen kijtoua ika akin kichiuaj ken Cristo kipiya noijyouiskej semej iuan oksekimej “ika on tetlajsojtlalistli” (Efes. 4:2). Matikitakan ika xsan okijto matoijyouikan semej iuan oksekimej, okijto matoijyouikan “ika on tetlajsojtlalistli”. ¿Xmelak ika yejuin ome xsan noijki? Jehová yokichiuj mauajlakan ipan tlanechikojli tlaltikpakchanejkej akin tlatlamantikej (Juan 6:44). Ijkon tej, yejua kita miyek tlen ika kintlasojtlas. Kuakon, ¿kenon tiueliskiaj tikijtoskej ika se tokniuj xkimelaua matiktlasojtlakan? Xakaj kipiya tikteltiliskej tlasojtlalistli tlen Jehová technauatia matikteititikan (1 Juan 4:20, 21).
¿KEMANON SA IKA TLAMI NOILNAMIKIS IMIKILIS CRISTO?
15. ¿Tleka tikmatij ika yejkos tonajli ijkuak sa ika tlami noilnamikis imikilis Cristo?
15 Yejkos tonajli ijkuak sa ika tlami noilnamikis imikilis Cristo. ¿Tleka tikmatij? Ipan kachtopa amatlajkuilojli tlen Pablo okimijkuilouili corintios, okijto yejuin itech tlapejpeniltin niman akin nochi xiujtin kilnamikij imikilis: “Nenkipantlantijtiaskej hasta keman toTeko oksejpa uajlas ika yejua nemopampa omik” (1 Cor. 11:26). Ipan teotlajtojli itech itlamiyan tonaltin, Jesús noijki otlajto itech tonajli ijkuak yejkoskia, noso uajlaskia. Okijto yejuin itech ueyi tlajyouilistli tlen iyejkotika: “Kemaj ne ipan cielo kitaskej notlamajuisol, nejua yejuan oninochiu Tlakatl. Niman ijkuakon nochi tlajtlakoltlakatl kipias ueyi ajmantli, niman nechitas nejua yejuan oninochiu Tlakatl, niuajlas ikan noueyi poder niman noueyilis. Niuajlas ipan on moxtli yejuan kisa ne iluikak. Kemaj ika on trompeta chikauak kipitsaskej, nikinuajtitlanis on noiluikaktekitkauan para kinsentlaliskej nochimej on yejuan Dios yokintlapejpenij nochiuiyan ipan in tlaltikpaktli” (Mat. 24:29-31). Jesús kinsentlalis akin toTajtsin “yokintlapejpenij” ijkuak kinuikas iluikak akin ok nemiskej ipan tlaltikpaktli. Yejuin panos sakin ika peuas ueyi tlajyouilistli, san ika, yes achto ika peuas Armagedón. Ipan yejon guerra, Jesús niman 144,000 kintlaniskej tekiuajkej ipan tlaltikpaktli (Apoc. 17:12-14). Tonajli ijkuak noilnamikis imikilis Cristo achto ika Jesús uajlas niman kinuikas tlapejpeniltin iluikak, yejon yes sa ika tlami.
16. ¿Tleka yotikijto tejua ika xtimopolouilis tonajli ijkuak noilnamikis imikilis Cristo yejuin xiuitl?
16 Matikchiuakan nochi tlen tiueliskej ika maka topolouiliskej ijkuak noilnamikis imikilis Cristo ipan marzo 31, xiuitl 2018. Niman matiktlajtlanilikan Jehová matechkauili matitlapaleuijtokan ika ikalpan san sekan manemi (xpoua Salmo 133:1). * Maka matikilkauakan ika yejkos ijkuak tiaskej ipan sa ika tlami tonajli ijkuak noilnamikis imikilis Cristo. Niman aman ika xiyejko yejon tonajli, matikpatiojkaitakan ika kualtsin san sekan tinemij ijkuak noilnamiki imikilis Cristo.
^ párr. 8 Ezequiel 37:15-17: “Itlajtol Jehová oksejpa notech ouajla, okijto: ‘Niman tejua, ikoneuj se tlaltikpakchane, xkajsi se tlakotl niman ipan xkijkuilo, “tlen iyaxka Judá niman inyaxka tlaltikpakchanejkej itech Israel akin iuan nemij”. Sakin xkitski okse tlakotl niman ipan xkijkuilo, “iyaxka José, itlakouj Efraín, niman nochi ikal Israel akin iuan nemij”. Sakin xkinsentlali niman ijkon manochiuakan san se tlakotl ipan momaʼ”.
^ párr. 16 Salmo 133:1: “¡Xkitakan! ¡Melak kuajli niman teyolpakti ika ikniujtin san sekan manemikan!”.
