1. ¿Tlenon nonekiya kichiuas akin kinekiya tlajtos iuan akin tekiuajtiya Persia?

XKONNEMILI kenon melak ouijtika tikitaskiaj titlajtoskej iuan se tekiuaj akin yeuejkaui nemiya, ken akin tlayekanaya Persia. Kachtopa nonekiskia tiaskej Susa, kampa chanti tekiuaj. San ika, nion xtiknemiliskiaj tikalakiskej kampa nemi tekiuaj tla yejua xtechijlia matikalakikan, pampa tla ijkon tikchiuaskiaj, tekiuaj tlanauatiskia matechmiktikan (Est. 4:11).

2. ¿Kenon kineki Jehová matiknotsakan?

² Melak tiyolpakij pampa Jehová xken tekiuajkej akin nemiyaj Persia. Maski más ueyixtika xijkon ken tekiuajkej ipan tlaltikpaktli, Jehová kinektika matiknotsakan maski san kemanon. Xkineki matomojtikan ijkuak tiknotsaskej. Maski tikixmatij Jehová ken toTlachijchiujkauj, akin nochi ueli kichiua noso ken toTeko, yejua techijlia ika ijkuak tiknotsaskej, uelis tikijliskej: toTaj noso toTajtsin (Mat. 6:9). ¿Xmelak ika techyolpaktia pampa Jehová kineki iuan matouikakan?

3. ¿Tleka uelis tiknotsaskej Jehová ken “toTaj” noso “toTajtsin”, niman tlenon tikitaskej ipan yejuin tlamachtijli?

³ Kinamiki matiknotsakan Jehová ken “toTaj” noso “toTajtsin” pampa yejua akin otechmakak tonemilis (Sal. 36:9). Yejua toTaj niman noneki matiktlakamatikan. Tla tikchiuaj tlen technauatia, melak techteochiuas (Heb. 12:9). Uelis techmakas se nemilistli tlen xkeman tlamis, uelis yes ne iluikak noso nikan ipan tlaltikpaktli. San ika, toTajtsin uelis techteochiuas desde aman tla tiktlakamatij. Ipan yejuin tlamachtijli, tikitaskej  kenon techititia Jehová ika yejua toTaj akin techtlasojtla niman tleka uelis kuajli tikmatstoskej ika xkeman techkauas. San ika, kachtopa matikitakan tleka kuajli tikmatij ika Jehová melak techtlasojtla niman techtlajpiya.

4. ¿Tleka miyekej xuelij kitaj Jehová ken inTaj?

⁴ ¿Xueli tikitaj Jehová ken toTaj? Sekimej kanaj kinemiliaj ika toTajtsin nion xkinpatiojkaita. Ometlamatij tla toTajtsin, akin nochi ueli kichiua, kita tlen topan nochiua. San ika, toTajtsin melak techtlasojtla niman xkineki ijkon matiknemilikan. Yejua akin otechmakak tonemilis niman kineki iuan matouikakan. Apóstol Pablo okimelajkaijto yejuin ijkuak nemiya Atenas, niman noijki okijto ika Jehová “xuejka nemi cada se de tejuamej” (Hech. 17:24-29). ToTajtsin kineki matiknotsakan ijkon ken se konetsintli kinotsa itaj akin melak kitlasojtla.

5. ¿Tlenon tiuelij itech tlen ipan onochiuj se tokniuj?

⁵ Kanaj sekimej xuelij kitaj Jehová ken se Tajtli pampa intaj xmás noso xkeman okintlasojtlak. Se tokniuj siuatl okijto: “Notaj melak nechtlajyouiltiaya. Ika yejon, ijkuak onipeuj ninomachtia Biblia, ouijtika nikitaya ninonisiuis itech toTajtsin iluikakchane. San ika, yejon onopatlak ijkuak kuajli onikixmat”. ¿Ijkon tomachiliaj ken yejuin tokniuj? Tla kema, maka matajmanakan. Ajsis tonajli ijkuak tikitaskej Jehová ken se Tajtli akin melak techtlasojtla.

6. Itech tlen kijtoua Mateo 11:27, ¿tlenon yokichiuj Jehová pampa kineki matikitakan ken se Tajtli akin techtlasojtla?

⁶ ¿Tlenon yokichiuj Jehová pampa kineki matikitakan ken se Tajtli akin techtlasojtla? Matikteneuakan se, yejua yokichiuj manotlali ipan Biblia tlen Jesús okijto niman tlen okichiuj (xpoua Mateo 11:27). Jesús melak kuajli okiteititi kenon toTajtsin, ika yejon, hasta okijto: “On yejuan nechita, no kita on noTajtsin” (Juan 14:9). Ipan naui Evangelios, yejua melak miyekpa okiteneuj Jehová ken “noTajtsin”. ¿Tleka melak miyekpa otlajto itech Jehová? Pampa yejua kinekiya ika oksekimej makitakan Jehová ken se Tajtli tetlasojtlani (Juan 17:25, 26).

7. ¿Tlenon tiuelij itech Jehová ijkuak tikitaj tlen okichiuj ipampa iKonetsin, Jesús?

⁷ ¿Tikilnamikij tlenon okichiuj Jehová ipampa iKonetsin, Jesús? Matitlajtokan itech yejuin niman matikitakan tlenon tiuelij itech Jehová. ToTajtsin xsan kikakiya iKoneuj ijkuak kichiuiliaya teoyotl, noijki kinankiliaya (Juan 11:41, 42). Maski Jesús okixnamik miyek tlen ouijtika, yejua nochipa okitak kenon iTajtsin okipaleui niman okitlasojtlak (Luc. 22:42, 43).

8. ¿Kenon Jehová okitlajpix Jesús?

⁸ Jesús kuajli okijto ika iTajtsin yejua akin okimakak inemilis niman nochi tlen kichiuaya mayolto. Yejua okijto: “Nejua itechkopa ninemi” (Juan 6:57). Jesús otlaneltokak itech iTajtsin, niman Jehová okimakak tlen kipolouaya. Noijki okitlajpix kampa más nonekiya, kema, Jehová okipaleui Jesús mamelajkanemi (Mat. 4:4).

9. ¿Kenon okiteititi Jehová ika kitlasojtlaya Jesús?

⁹ Jehová okiteititi ika yejua se Tajtli tetlasojtlani pampa okichiuj ika Jesús kuajli makimatsto ika nochipa kipaleuiskia (Mat. 26:53; Juan 8:16). Melauak ika xokichiuj maka matlajyoui, san ika, kema okipaleui makixiko tlen kixnamikiya. Jesús kimatiya ika tlen kixnamikiskia san panoskia (Heb. 12:2). Jehová melak kuajli okiteititi ika kitlajpiaya iKoneuj, kema, yejua okikak, okimakak tlen  kipolouaya, okimachti niman okipaleui (Juan 5:20; 8:28). Aman matikitakan kenon Jehová techtlajpiya ijkon ken okitlajpix Jesús.

10. Ken kijtoua Salmo 66:19, 20, ¿kenon techititia Jehová ika techtlasojtla?

¹⁰ Jehová kinkaki toteoyouan (xpoua Salmo 66:19, 20). Yejua xkineki matiknemilikan ika xnochipa uelis tikchiuiliskej teoyotl, yej kineki nochipa matiknotsakan (1 Tes. 5:17). Uelis tiknotsaskej Jehová ika tetlakaitalistli maski san kemanon niman maski san kanon pampa yejua nochipa kipiyas tiempo niman ijkon techkakis. Ijkuak tikasikamatij ika Jehová kinkaki toteoyouan, más tiktlasojtlaj. Se salmista okijto: “Nejua niktlajsojtla toTEKO pampa yejua okak noueyikatsajtsilis” (Sal. 116:1).

11. ¿Kenon Jehová kinnankilia toteoyouan?

¹¹ ToTaj Jehová xsan kinkaki toteoyouan, yejua noijki kinnankilia. Apóstol Juan okimelajkaijto: “Tikneltokaj ikan nochi toyojlo, ika Dios san tlinon tiktlajtlaniliskej ken yejua kineki, yejua techkakis” (1 Juan 5:14, 15). Melauak, Jehová xnochipa technankilia ken tejuamej tiknekiskiaj. Yejua kimatstika tlenon melauak techpaleuis, ika yejon, kemantika xtechmaka tlen tiktlajtlaniliaj, noso kemantika techijlia matitlamachiakan (2 Cor. 12:7-9).

12, 13. ¿Kenon techmaka Jehová tlen techpoloua?

¹² Jehová techmaka tlen techpoloua. Jehová kinmakatika ikoneuan tlen kinpoloua, yejua kichiua ken kinnauatia nochimej tajtin (1 Tim. 5:8). Kimatstika ika tinochimej tiknekij tikpiyaskej tlenon tijkuaskej, tlenon ika totlakentiskej niman kanon tichantiskej. San ika, yejua xkineki melak matajmanakan ipampa nochi yejon (Mat. 6:32, 33; 7:11). Kema, pampa yejua techtlasojtla, hasta yokitak maka itlaj matechpolo ika tlayekapan.

¹³ San ika, tlen más ueyi kijtosneki, yejua techmakatok tlen noneki niman ijkon kuajli iuan matouikakan. Ipan iTlajtol yotechmachti kenon yejua, tlenon kineki kichiuas, tleka otexchijchiuj niman tlenon panos ika tlayekapan. Pampa yejua okinek techpaleuis toseselti, okintekitilti totajuan noso oksekimej tokniuan niman ijkon matikixmatikan. Niman hasta aman techmachtijtika itechkopa tlayekankej niman oksekimej tokniuan akin chikauak intlaneltokil. Noijki kintekitiltia tlanechikoltin niman ijkon tinochimej akin tiitekipanojkauan más matikixmatikan. Ipampa nochi yejuin, kuajli tikitaj ika Jehová techititia ika yejua se Tajtli akin kineki kuajli matinemikan (Sal. 32:8).

14. ¿Tleka techmelajkatlalia Jehová, niman kenon kichiua?

¹⁴ Jehová techmelajkatlalia. Jesús xtlajtlakole katka, san ika, tejuamej kema. Ika yejon, toTajtsin Jehová techmelajkatlalia ijkuak noneki pampa kineki matikchiuakan tlen kuajli. ITlajtol techilnamiktia ika yejua kimelajkatlalia akin kitlasojtla (Heb. 12:6, 7, TNM). Niman yejua tlatlamantik ken techmelajkatlalia. ¿Kenon kichiua? Kanaj tlen tikamapouaskej ipan Biblia noso tlen tijkakiskej ipan tlanechikojli techasikamachiltis ika noneki topatlaskej. Jehová noijki uelis kintekitiltis tlayekankej niman ijkon matechpaleuikan. Maski san kenon techmelajkatlalis Jehová, matikilnamikikan ika yejua ijkon kichiua pampa techtlasojtla (Jer. 30:11).

15. ¿Kenon techtlajpiya Jehová?

¹⁵ Jehová techpaleuiya matitlaxikokan ijkuak titlajyouiyaj. ToTajtsin iluikakchane techtlajpiya ijkuak tikixnamikij tlen ouijtika, ijkon ken kichiua se tajtli akin kintlasojtla  ikoneuan. Jehová kitekitiltia iespíritu santo niman ijkon techpaleuis matimelajkanemikan (Luc. 11:13). Noijki kitlajpiya totlamachilis. Techijlia ika melak kuajli tinemiskej ika tlayekapan, niman yejon techpaleuiya matitlaxikokan. Yemelak ika ijkuak itlaj tikixnamikij, melak titlajyouiyaj, san ika, maka matikilkauakan ika Jehová kichiuas oksejpa matinemikan ika toyojlo. Tlen tikixnamiktokej san panos, san ika, tlen Jehová techmakas xkeman tlamis (2 Cor. 4:16-18).

16. ¿Tlenon opanok ijkuak Adán xokitlakamat iTajtsin?

¹⁶ Jehová nimantsin itlaj okichiuj ijkuak Adán otlajtlako, ijkon otechititi ika techtlasojtla. Pampa Adán xotetlakamat, yejua niman ikoneuan xok yeskiaj ichanejkauan Jehová (Rom. 5:12; 7:14). San ika, ijkuak ijkon opanok, Jehová nimantsin okitak kenon kiyektlalis yejon.

17. ¿Tlenon nimantsin okichiuj Jehová ijkuak Adán xokitlakamat?

¹⁷ Maski Jehová okitlajtlakolmakak Adán, ikoneuan xsan ijkon okinkauj. Nimantsin okijto ika nochimej akin kitlakamatiskiaj oksejpa ueliskiaj yeskej ichanejkauan (Gén. 3:15; Rom. 8:20, 21). Niman yejuin uelis nochiuas pampa yejua okitemakak iKoneuj, Jesús, ken tlaxtlauijli. Ijkon okiteititi ika melak techtlasojtla (Juan 3:16).

18. ¿Tleka kuajli tikmatstokej ika Jehová techtlasojtla ken ikoneuan maski kanaj yotiktlalkauijkej?

¹⁸ Maski titlajtlakolejkej, Jehová kineki techitas ken ichanejkauan niman xkeman kinemilia tla san tikajmanaj. Kanaj yotikyolkokojkej noso kanaj yotiktlalkauijkej, san ika, yejua xkinemilia tla xok keman tokuepaskej itech. Jesús okiteneuj se tlamachtijli kampa otlajto itech se tekoneuj akin okitlalkauijka itaj niman okinenpoloto nochi tlen kipiaya. Ika yejon tlamachtijli okiteititi ika Jehová  melak techtlasojtla (Luc. 15:11-32). Ipan yejon tlamachtijli, tajtli xkeman okinemili tla ikoneuj xok nokuepaskia. Niman ijkuak ikoneuj onokuep, yejua melak kuajli okiseli. Tla tejuamej yotiktlalkauijkej toTaj Jehová niman yotoyolkuepkej, kuajli matikmatstokan ika yejua kinektika oksejpa techselis.

19. ¿Tlenon kichiuas Jehová niman ijkon kiyektlalis tlen okijtlako Adán?

¹⁹ ToTaj Jehová kiyektlalis nochi tlen okijtlako Adán. Ijkuak Adán xotetlakamat, toTajtsin okijto ika kintlapejpeniskia ken ikoneuan 144,000 tlaltikpakchanejkej akin tekiuajtiskiaj niman teopixkej yeskiaj iuan iKoneuj. Jesús niman akin iuan tekiuajtiskej kinpaleuiskej tlaltikpakchanejkej akin tetlakamatkej maka ok makipiyakan tlajtlakojli ipan yenkuik tlaltikpaktli. Sakin, ijkuak sa ika tlami kintlatlataskej tlaltikpakchanejkej, Jehová kinmakas akin melajkanemiskej se nemilistli tlen xkeman tlamis. Ijkuakon, toTaj Jehová melak yolpakis pampa kitas ika ipan tlaltikpaktli san nemij ikoneuan akin xok kipiyaj tlajtlakojli. ¿Xmelak ika kualtsin yes?

20. ¿Kenon Jehová yotechititi ika melak techtlasojtla, niman tlenon tikitaskej ipan okse tlamachtijli?

²⁰ Jehová yotechititi ika melak techtlasojtla. Xnemi okse Tajtli ijkon ken yejua. Yejua kinkaki toteoyouan, techmaka tlen techpoloua niman noijki techpaleuiya kuajli iuan matouikakan. Techmelajkatlalia niman techpaleuiya. Noijki, yokijto ika melak techteochiuas ika tlayekapan. ¿Xmelak ika techyolpaktia tikmatiskej ika toTajtsin techtlasojtla niman techtlajpiya? Ipan okse tlamachtijli, tikitaskej kenon uelis tikititiskej toTaj Jehová ika tiktlasojkamatij ika techtlasojtla.