TLAMACHTIJLI 21
TLAKUIKAJLI 107 Matitetlasojtlakan ken toTajtsin
Kenijki uelis tiknextis akin ueliskia iuan timonamiktis
“Sen siuatl yejuan sanoyej tekimatki niman sanoyej kuajli nouika, ¿akinon uelis kinextis? ¡Sen siuatl kenon, más sanoyej tlajsojtli xken on tetsitsimej yejuan kualtsitsimej niman patiojkej!” (PROV. 31:10).
TLAJTOS ITECH:
Kenijki Biblia uelis kinpaleuis akin kinekij nonamiktiskej niman kenijki tokniuan uelis kinpaleuiskej.
1, 2. a) Tla se tokniuj kineki nonamiktis, ¿tlenon noneki kachtopa kitas? b) ¿Tlenon tikteneujtokej ijkuak tikijtouaj ika sekimej novios? (Xkita nota “Tlen noneki matikmatikan”).
¿TIKUELITASKIA timonamiktis? Ijkuak titelpochnemis noso tiichpochnemis melak tiyolpakis, maski ijkon miyekej tokniuan kinekij nonamiktiskej. Tla tejua tikneki timonamiktis, kachtopa noneki tikitas tla kuajli timouika iuan Jehová, tla xok titlanemilia ken se konetl niman tla mitsajxilia motomin (1 Cor. 7:36). a Tla ijkon tikchiua, melak tiyolpakis ijkuak timonamiktis.
2 Kemantika ouijtika tiknextis iuan akinon timonamiktis (Prov. 31:10). San ika, tla yotiknexti, aman kanaj timotlajtoltia kenijki uelis más kuajli tikixmatis. b Ipan yejuin tlamachtijli tikitaskej tlenon kinpaleuis akin xinonamiktiaj kuajli makitejtemokan iuan akinon nonamiktiskej. Noijki tikitaskej kenijki tokniuan akin nemij ipan tlanechikojli uelis kinpaleuiskej tokniuan akin kinekij nonamiktiskej.
TLEN MITSPALEUIS KUAJLI XTEJTEMO AKIN IUAN TIMONAMIKTIS
3. ¿Tlenon noneki kimatstos se tokniuj achto kitejtemos iuan akinon nonamiktis?
3 Achto tikpiyas novio noso novia, kachtopa noneki kuajli xmatsto tlenon tikneki niman kenijki yes moixnamik. Tla xijkon tikchiua, ueliskia xtikijlis noso xtikselis akin ueliskia iuan timasikamatis. Noijki, ueliskia san akinon tikijlijtiuetsis noso tiknankilijtiuetsis niman sakin tikitas ika xnemasikamatij. Ijkuak itipeuas tiktejtemos akin ueliskia iuan timonamiktis, kachtopa noneki tikitas tla yonoapolakti (1 Cor. 7:39). San ika, xsan yejon noneki tikitas. Melak kuajli tla noijki ijkin timotlajtoltia: “¿Tlenon nikneki nikchiuas ika tlayekapan? ¿Tlen kualneskayomej nikneki makinpiya akin iuan ninonamiktis? ¿Melak miyek tlen niktlajtlani?”.
4. ¿Tlenon kitlajtlaniliaj Jehová sekimej tokniuan akin xinonamiktiaj?
4 Kanaj yotikijli Jehová ika tikneki timonamiktis (Filip. 4:6). Maski Jehová xmitstejtemouilis se moixnamik, yejua kineki xkijli tlen tikneki niman tlen tikmachilia niman ijkon mitspaleuis ijkuak tiktejtemos. Kuakon, nochipa xkijlijto tlen tikneki niman tlen tikmachilia (Sal. 62:8). Xtlajtlanili Jehová mamitsmaka tlamachilistli niman mamitspaleui maka xmosiaujkaua (Sant. 1:5). Se tokniuj telpochtli akin chanti Estados Unidos niman itoka John c techijlia tlenon kitlajtlani ipan iteoyouan. Yejua kijtoua: “Nikijlia Jehová kenijki nikuelitaskia niknextis se nosiuauj. Noijki niktlajtlanilia manechpaleui manikixmati se tokniuj niman manechpaleui manikinpiya kualtsitsintin kualneskayomej para kuajli niteueuentsin yes”. Se tokniuj siuatl akin chanti Sri Lanka niman itoka Tanya kijtoua: “Niktlajtlanilia Jehová manechpaleui manimelajkanemi niman maniyolpaki chika niknextia yakaj akin uelis iuan ninonamiktis”. Tla ok xtiknextia iuan akinon timonamiktis, maka xmajmana pampa Jehová nochipa mitsmakas tlen mitspoloua niman kichiuas kuajli xmomachili (Sal. 55:22).
5. ¿Tlenon kinpaleuis akin xinonamiktiaj makimixmatikan tokniuan akin kitlasojtlaj Jehová? (1 Corintios 15:58; noijki xkita tlaixkopinajli).
5 Biblia kijtoua: “Nochipa xchiuakan itekiu toTEKO” (xpoua 1 Corintios 15:58). Tla tejua chikauak tiktekichiuilia Jehová ipan ikalpan, xsan tikimixmatis miyekej tokniuan, noijki kuajli imiuan timouikas niman uelis tikimixmatis sekimej akin xinonamiktiaj akin noijki chikauak kitekichiuilijtokej Jehová. Noijki, melak tiyolpakis pampa tikchiujtok tlen Jehová kuelita.
Tla chikauak tiktekichiuilijtok Jehová, melak miyekej tokniuan tikimixmatis, niman uelis tikixmatis yakaj akin noijki nonamiktisneki. (Xkita párrafo 5).
6. ¿Tlenon noneki kilnamiktoskej akin nonamiktisnekij?
6 San ika, maka sa ika xmokaua xtejtemojto iuan akinon timonamiktis (Filip. 1:10). Xkilnamiki ika tinochimej, maski tla xitonamiktiaj noso tla yotonamiktijkej, uelis tiyolpakiskej tla kuajli touikaj iuan Jehová (Mat. 5:3). Noijki, tla xnimantsin timonamiktia, uelis más chikauak tiktekichiuilis Jehová (1 Cor. 7:32, 33). Kuakon, xchiua nochi tlen tiuelis aman ika titelpochtli noso tiichpochtli. Jessica, akin chanti Estados Unidos, ononamikti ijkuak ikajxiltiskia 40 xiuitl. Yejua kijtoua: “Maski niknekiya ninonamiktis, nejua melak niyolpakiya pampa nochipa nitenojnotsaya”.
KACHTOPA XKITA TLEN KICHIUA AKIN TIKNEKI TIKNOTSAS
7. ¿Tleka más kuajli tla xnimantsin tiknotsa akin tikneki tikixmatis? (Proverbios 13:16).
7 ¿Tlenon uelis tikchiuas tla tikixmati se tokniuj akin tiknemilia ika uelis iuan timonamiktis? ¿Noneki nimantsin tikijlis ika tikneki tikixmatis? Ka, kachtopa noneki xkita kenijki yejua niman xkita tlenon kichiua, san ika, maka makimati ika tejua tiknemilijtika tiknotsas. Biblia kijtoua ika akin tlamachilise kachtopa nomachtia niman sakin kinemilia tlenon kichiuas (xpoua Proverbios 13:16). Tokniuj Albert, akin chanti Países Bajos, kijtoua: “Tlen tikmachilia uelis san panotikisas. Kuakon, maka nimantsin xkijlijtiuetsi tla nennovios yeskej, yej más kuajli tla timochia niman tikita tlen kichiua”. Noijki, tla tikita kenijki yejua, kanaj tikitas ika xyejua akin tiktejtemojtoya.
8. ¿Kenijki se tokniuj uelis kixmatis akin kuelita? (Noijki xkita tlaixkopinajli).
8 Kanaj aman timotlajtoltia: “¿Kenijki uelis nikixmatis akin nikuelita san ika maka makimati ika nikneki niknotsas?”. Uelis tikitas kenijki yejua niman tla kitlasojtla Jehová ipan tlanechikoltin noso kampa tokniuan san sekan nosentlaliskej. Melak mitspaleuis tla ijkin timotlajtoltia: “¿Akinomej imiuan nouika? ¿Itech tlenon tlajtoua? (Luc. 6:45). Tlen kineki kichiuas ika tlayekapan, ¿san noijki tlen nejua nikneki nikchiuas?”. Uelis tiktlajtoltis se tokniuj tlayekanketl akin nemi ipan itlanechikol kenijki yejon tokniuj noso xkintlajtolti sekimej tokniuan akin chikauak intlaneltok niman akin kuajli kixmatij (Prov. 20:18). Noijki uelis tikintlajtoltis kenijki kixmatij niman tlen kualneskayomej kinpiya (Rut 2:11). San ika, ijkuak tikitas akin tikneki tiknotsas, maka xchiua maka kuajli manomachili. Xtlakaita yejon tokniuj niman maka san nochipa xtokatinemi noso maka san nochipa itech xtetlajtoltijto.
Maka nimantsin xkijlijtiuetsi yakaj ika tikneki tikixmatis, kachtopa kuajli xkita kenijki yejua. (Xkimita párrafos 7 niman 8).
9. ¿Tlenon noneki kuajli tikmatstos achto yakaj tiknotsas?
9 Kuakon, ¿kech tiempo noneki titlamachias niman ijkon tikijlis akin tikuelita ika tikneki tikixmatis? Tla nimantsin tiknotsa, ueliskia kinemilis ika tejua xkuajli tiknemilia tlen tikchiuas niman san totoka itlaj tikchiujtikisa (Prov. 29:20). San ika, tla kita ika tejua tikuelita niman melak yotiuejkauj niman xtlaj tikijlia, uelis kinemilis ika xtikmati tlenon tikneki (Ecl. 11:4). Kuakon, tla tikneki yakaj tiknotsas, noneki tikmatstos ika itilisto para timonamiktis. Noijki, noneki tiknotsas akin tikita ika yejua uelis iuan timonamiktis. Niman maski nenpeuaskej ken novios, xkijtosneki tla aman kipiya para nemonamiktiskej.
10. ¿Tlenon uelis tikchiuas tla yotikitak ika se tokniuj kineki mitsnotsas?
10 ¿Tlenon uelis tikchiuas tla yotikitak ika se tokniuj kineki mitsnotsas? Tla tejua xtlaj iuan tikneki, xkititi ika xtlaj tikneki. Melak xkuajli yeskia tla tikchiua más mamitsuelita, san ika, tejua xtlaj iuan tikneki (1 Cor. 10:24; Efes. 4:25).
11. Tla kampa tichanti nochiua ijkon ken kijtoua párrafo, ¿tlenon noneki tikmatstos?
11 Ipan seki kalpamej, telpokamej noso ichpokamej nonamiktiaj iuan akin itajuan noso inchanejkauan kintlapejpeniliaj. Niman ipan okseki kalpamej, ichanejkauj noso iamigos san kitejtemouiliaj akin kinemiliaj ika ueliskia iuan nasikamatis niman kinsentlaliaj para manoixmatikan. Tla kampa tichanti ijkon nochiua niman mitstlajtlaniliaj yakaj xtejtemouili para iuan nonamiktis, kachtopa kuajli xkita tlenon kuelitaj niman tlenon kinekij akin tikneki manoixmatikan. Niman tla tiknemilia ika yotiknextili, kuajli xkita kenijki yejua, tlen kualneskayomej kinpiya niman kenijki nouika iuan Jehová. Xkilnamiki ika más noneki manouika iuan Jehová xijkon ken tla melak makipiya tomin noso tla melak onomachti. Noijki, xkilnamiki ika san telpochtli niman ichpochtli akin tikinpaleuijtika uelis kijtoskej tla nonamiktiskej noso ka (Gál. 6:5).
KEN UELIS NEMOCHIUASKEJ NOVIOS
12. ¿Kenijki ueliskia tikijlis akin tikuelitaskia manochiua monovia noso monovio?
12 Tla tikuelitaskia yakaj manochiua monovia, ¿kenijki uelis tikijlis? d Uelis tiknotsas kampa maka san nemejuamej ninemiskej noso uelis tikonnotsas ipan teléfono noso ika videollamada. Kuajli xkijli ika tikuelitaskia más tikixmatis (1 Cor. 14:9). Tla mitsijlia ika noneki kinemilis, xmaka tiempo (Prov. 15:28). Niman tla mitsijlia ika xkineki, maka xchiualti.
13. ¿Tlenon uelis tikchiuas tla yakaj mitsijlia ika kineki más mitsixmatis? (Colosenses 4:6).
13 ¿Tlenon uelis tikchiuas tla yakaj mitsijlia ika kineki más mitsixmatis? Kualtsin xnankili niman xtlakaita pampa yejua ononek noyolchikauas para mitsnotsas (xpoua Colosenses 4:6). Tla tikneki tiempo para tiknemilis, xkijli. San ika, xyejyeko maka melak xuejkaui (Prov. 13:12). Tla xtikneki iuan timoixmatis, kuajli xkijli niman san kualtsin xkijli. Tokniuj Hans, akin chanti Austria, techijlia tlenon okichiuj ijkuak se tokniuj siuatl okijli ika kinekiya más kuajli kixmatis. Yejua kijtoua: “San kualtsin onikijli ika xniknekiya iuan ninoixmatis niman noijki nimantsin onikijli para maka makinemili ika niknemilijtoya tla kema nikselis. Noijki más kuajli nikitaya kenijki niknotsas para maka itlaj makinemili”. San ika ¿tlenon uelis tikchiuas tla yotiknemili ika kema tikneki iuan timoixmatis? Xkijli ika tiknektok niman san sekan xkijtokan tlen nenkuelitaskiaj nenkichiuaskej ijkuak nenkistinemiskej ken novios. Melak kuajli tla ijkin nenkichiuaj pampa nemejuamej tlamantik ken nentlanemiliaj niman tlamantik ken onemoskaltijkej niman kanaj tlamantik tlen nenkuelitaskiaj nenkichiuaskej.
¿KENIJKI UELIS TIKINPALEUISKEJ AKIN XINONAMIKTIAJ?
14. ¿Kenijki uelis tikinpaleuiskej niman tikinyolchikauaskej tokniuan akin kinekij nonamiktiskej?
14 ¿Kenijki uelis tikinpaleuiskej niman tikinyolchikauaskej tokniuan akin kinekij nonamiktiskej? Kachtopa, kuajli matiknemilikan tlen tikimijliaj (Efes. 4:29). Matotlajtoltikan: “¿Nochipa nikinkamanaluiya akin xinonamiktiaj? Ijkuak nikita ika se tokniuj tlakatl niman se tokniuj siuatl nonojnotstokej, ¿nimantsin niknemilia ika kinekij noixmatiskej?” (1 Tim. 5:13). Noijki, maka matikimijlikan ika xuelis yolpakiskej pampa xnonamiktiaj. Hans, akin otikteneujkej ipan párrafo 13, kijtoua: “Sekimej tokniuan ijkin teijliaj: ‘¿Tleka xtimonamiktia? Melak itiueyi, itimokaujtok, sakin xok uelis timonamiktis’. Yejuin uelis kinyolkokos akin xinonamiktiaj niman uelis kimachiliskej ika xkintlasojtlaj niman ika inoneki nonamiktiskej”. Kuakon, ijkuak tiueliskej, matikimijlikan tlen makinyolchikaua (1 Tes. 5:11).
15. a) Ijkon ken kijtoua Romanos 15:2, ¿tlenon noneki tikmatstoskej achto tikpaleuiskej yakaj makinexti iuan akin nonamiktis? (Noijki xkita tlaixkopinajli). b) ¿Tlenon otikuelitak itech video? (Xkita nota).
15 ¿Tlenon uelis tikchiuaskej tla tikimixmatij omemej tokniuan akin tiknemiliaj ika ueliskia nasikamatiskej? Biblia kijtoua ika noneki titlanemiliskej itech kenijki nomachiliaj oksekimej (xpoua Romanos 15:2). Miyekej tokniuan akin xnonamiktiaj xkuelitaj makintejtemouilikan iuan akinon nonamiktiskej, niman noneki tikintlakaitaskej (2 Tes. 3:11). Oksekimej tokniuan kema kuelitaj matikintejtemouilikan iuan akinon nonamiktiskej, san ika, san uelis ijkon tikchiuaskej tla yejuamej techijliaj (Prov. 3:27). e Noijki, sekimej xkuelitaj manesi ika tikinpaleuijtokej makinextikan se tokniuj. Tokniuj Lydia, akin chanti Alemania, kijtoua: “Ijkuak itlaj tikchiuas imiuan tokniuan, noijki uelis tiknotsas tokniuj telpochtli niman tokniuj ichpochtli akin tikneki manoixmatikan. Tejua san xkinpaleui manoitakan niman yejuamej makitakan tlenon kichiuaskej”.
Akin xinonamiktiaj uelis nonojnotsaskej ijkuak tokniuan san sekan nosentlaliaj para tlakuaskej. (Xkita párrafo 15).
16. ¿Tlenon noneki kilnamiktoskej akin xinonamiktiaj?
16 Tinochimej uelis melak tiyolpakiskej maski tla yotonamiktijkej noso xitonamiktiaj (Sal. 128:1). San ika, tla timonamiktisneki niman xtiknextia iuan akinon timonamiktis, maka xmajmana niman ok chikauak xtekichiuilijto Jehová. Se tokniuj siuatl akin itoka Sin Yi niman chanti Macao kijtoua: “Xyolpaki niman xchiua nochi tlen tikuelita aman ika xitimonamiktia, pampa tla tikonnemilia kech tiempo tinemis ipan xochitlalpan iuan moueuentsin noso mosiuauj, tikitas ika xmiyek tiempo yotitelpochnen noso yotiichpochnen”. San ika ¿tlenon uelis tikchiuas tla yakaj yotikixmat niman yonemochiujkej novios? Ipan okse tlamachtijli tikitaskej tlenon uelis mechpaleuis kuajli xkisatij.
TLAKUIKAJLI 137 Siuamej yolmelajkej
a Melak mitspaleuis tla tikamapoua tlamachtijli tlen onka ipan jw.org tlen itoka “Ser novios. Parte 1: ¿Estoy listo para salir con alguien?”.
b TLEN NONEKI MATIKMATIKAN: Ipan yejuin tlamachtijli niman ipan on okse, ijkuak tikijtoskej ika sekimej novios, tikteneujtokej ijkuak se tlakatl niman se siuatl noixmatstokej para kitaskej tla nasikamatij niman ijkon nonamiktiskej. Se tlakatl niman se siuatl peuaj ken novios ijkuak noijliaj ika kinekij noixmatiskej. Ipan yejon tiempo uelis kijtoskej tla nonamiktiskej noso xok novios yeskej. Ipan seki kalpamej kijtouaj yopeuj kistinemij, yopeuj noixmatij noso yopeuj nonotsaj para kijtoskej ika sekimej inovios.
c Seki tokayomej yonopatlakej.
d Ipan seki kalpamej, se tokniuj tlakatl yejua akin kijlia tokniuj siuatl ika kineki kixmatis. San ika, se tokniuj siuatl noijki uelis yejua kinotsas se tokniuj tlakatl (Rut 3:1-13). Tla tikneki okseki tikmatis, xkita tlamachtijli “Los jóvenes preguntan. . . ¿Cómo le digo lo que siento por él?”, ipan ¡Despertad! del 22 de octubre de 2004.
e Ipan jw.org, xkita video Nokojtiliaj niman ijkon tlaneltokaj. Akin xnonamiktiaj.
