1. ¿Kenon nomachilia Jehová inpampa itekipanojkauan?

 JEHOVÁ kitstika nochi tlen topan nochiua. Kuajli kimatstika ijkuak tiyolpakij niman ijkuak tajmanaj (Sal. 37:18). Ijkuak kita ika tokojtiliaj tiktekichiuiliskej maski melak tajmanaj, yejua melak yolpaki. Niman xsan yejon, yejua kinektika techpaleuis niman techyolseuis.

2. ¿Tlenon kichiua Jehová inpampa akin najmanaj, niman tlenon noneki tikchiuaskej tla tiknekij matechpajti?

² Salmo 147:3 kijtoua ika Jehová “kinyoltlalia yejuan sanoyej najmanaj” niman “kimpajtia kampa nokokouaj”. Yejuin tlaxelojli kuajli kiteititia ika Jehová kinpajtia ika tlasojtlalistli akin melak noyolajmanaj. San ika ¿tlenon noneki tikchiuaskej tla tiknekij matechpajti? Matontlanemilikan itech yakaj akin onokoko. Yejua noneki yas kampa tlapajtijketl, san ika, tla kineki pajtis, noneki kichiuas nochi tlen kijlia tlapajtijketl. Ipan yejuin tlamachtijli, tikitaskej tlenon kimijlia Jehová akin noyolkokouaj itechkopa iTlajtol niman tikitaskej kenon uelis tikchiuaskej tlen yejua techijlia.

JEHOVÁ KUAJLI TECHIJLIA IKA TECHPATIOJKAITA

3. ¿Tleka sekimej kinemiliaj ika xakaj kintlasojtla?

³ Melak teajman ika aman miyekej xok tetlasojtlaj. Miyekej melak xkuajli tlen kitechiuiliaj niman kichiuaj ika oksekimej makinemilikan ika xtlaj ika tepaleuijkej. Se tokniuj akin itoka Helen a kijtoua: “Imiuan nochanejkauan xtoititiayaj ika totlasojtlaj.  Notaj melak tlauele katka niman mojmostla techijliaya ika xtlaj ika titepaleuijkej”. ¿Tejua noijki ijkon mopan yonochiuj? Kanaj xkuajli mitsnotsayaj, xkuajli tlen mitschiuiliayaj noso kichiuayaj xnemili ika xakaj mitstlasojtla. Tla ijkon mopan onochiuj, kanaj hasta aman xueli tikneltoka tla nemi yakaj akin melauak mitstlasojtla.

4. ¿Tlenon kuajli yotechijli Jehová ipan Salmo 34:18?

⁴ Maski sekimej melak xkuajli tlen yomitschiuilijkej, kuajli xmatsto ika Jehová melak mitstlasojtla niman mitspatiojkaita. Yejua “nemi nisiu para kinyoltlalia on yejuan sanoyej noyolkokouaj” (xpoua Salmo 34:18). Tla tejua melak timoyolkokoua, xkilnamiki ika Jehová okitak tlen kuajli tikpiya ipan moyojlo niman okinek xtekichiuili (Juan 6:44). Yejua nochipa mouan nemis para mitspaleuis pampa melak mitstlasojtla.

5. ¿Tlenon tiuelij itech ken Jesús okimitak tlaltikpakchanejkej?

⁵ Tlen Jesús okichiuj techititia kenon nomachilia Jehová. Ijkuak Jesús nemiya ipan tlaltikpaktli, okitak kenon sekimej melak xkuajli kimitayaj, niman yejua okimikneli (Mat. 9:​9-12). Ijkuak se siuatsintli akin melak kualouaya okikitski itlaken pampa kinemiliaya ika ijkon pajtiskia, Jesús okiyolseui niman okijli ika melak kuajli ika ijkon okichiuj pampa okiteititi ika melak tlaneltokaya (Mar. 5:​25-34). Jesús okichiuj ijkon ken iTaj (Juan 14:9). Kuakon, kuajli xmatsto ika Jehová melak mitspatiojkaita niman kita tlen kualtsin tikchiua, yejua kita ika melak titlaneltoka niman ika melak tiktlasojtla.

6. ¿Tlenon uelis tikchiuaskej tla tiknemiliaj ika xakaj techtlasojtla?

⁶ ¿Tlenon uelis tikchiuas tla tikmachilia ika xtlaj ika titepaleui? Xkinamapoua tlaxeloltin ipan Biblia kampa kijtouaj ika Jehová  melak mitspatiojkaita niman itech xtlanemili (Sal. 94:19). b Tla xouel otikchiuj tlen tiknekiya noso xueli tikchiua tlen oksekimej kichiuaj, maka xmajmana nion maka xnemili ika xtlaj ueli tikchiua. Xkilnamiki ika Jehová mitsajsikamati niman yejua xmitstlajtlanilis xchiua tlen xok tiuelis (Sal. 103:​13, 14). Tla yeuejkaui omitschiuilijkej tlen xkuajli, maka xmotlajtlakolti, tejua xotikmotejtemouili para ijkon mamitschiuilikan. Xkilnamiki ika Jehová xkintlajtlakolmakas akin kintlajyouiltiaj, yej kintlajtlakolmakas akin kitechiuiliaj tlen xkuajli (1 Ped. 3:12). Sandra, akin okitlajyouiltijkej ijkuak pitentsin katka, kijtoua: “Nochipa niktlajtlanilia Jehová manechpaleui manikita tlen kualtsin nechitilia”.

7. ¿Kenon uelis techpaleuis tlen topan onochiuj yeuejkaui niman ijkon tiktekichiuiliskej Jehová?

⁷ Maski kemantika xtikneltokas, Jehová uelis mitstekitiltis niman ijkon kinpaleuis oksekimej. Yejua yomitsmakak se kualtsin tekitl: xtenojnotsa (1 Cor. 3:9). Kanaj ipampa tlen omitspanok yeuejkaui, aman más titeiknelia niman más titeajsikamati. Kuakon, uelis melak titepaleuis. Helen, akin otikteneujkej ipan párrafo 3, melak okipaleuijkej niman aman más yekimati kenon uelis kinpaleuis oksekimej. Yejua kijtoua: “Achto nikmachiliaya ika xtlaj ika nitepaleui, san ika, Jehová yonechititi ika melak nechtlasojtla niman ika nitepaleui”. Helen aman tekiti ken precursora niman melak yolpaki.

JEHOVÁ KINEKI MATIKITAKAN IKA YOTECHTLAPOJPOLUI

8. ¿Tlenon kuajli techijlia Jehová ipan Isaías 1:18?

⁸ Sekimej itekipanojkauan toTajtsin ok melak xkuajli nomachiliaj ipampa tlen xkuajli okichiujkej ijkuak xenoapolaktiayaj noso ijkuak yonoapolaktijkaj. San ika, matikilnamikikan ika Jehová okitemakak isenteKonetsin pampa melak techtlasojtla. Kuakon, kuajli matikmatstokan ika yejua kineki matikselikan tlen okichiuj topampa. Jehová techijlia: “Xuajlakan, ma tikitakan ken tikchiuaskej para tikixtiskej in tlen xkuajli”. c Niman yejua techijlia ika ijkuak yotikchiujkej yejuin, yejua kintlapojpoluis totlajtlakoluan (xpoua Isaías 1:18). Melak tiktlasojkamatij ika toTaj akin melak techtlasojtla kilkaua tlen xkuajli otikchiujkej yeuejkaui. San ika, yejua xkeman kilkauas tlen kuajli yotikchiujkej (Sal. 103:​9, 12; Heb. 6:10).

9. ¿Tleka melak tepaleui tla san titlanemiliaj itech tlen ueli tikchiuaj aman niman tlen uelis tikchiuaskej ika tlayekapan?

⁹ ¿Tlenon mitspaleuis tla melak xkuajli timomachilia ipampa tlen xkuajli otikchiuj yeuejkaui? Xtlanemili itech tlen ueli tikchiua aman niman itech tlen uelis tikchiuas ika tlayekapan. Xtlanemili itech apóstol Pablo. Yejua melak noyolkokouaya pampa okintlaueltokak tokniuan, san ika, kuajli kimatstoya ika Jehová yokitlapojpoluijka (1 Tim. 1:​12-15). Niman ijkon ken xsan kinemilijtoya nochi tlen ouel okichiuj ijkuak fariseo katka, noijki xsan kinemilijtoya nochi tlajtlakoltin tlen yokichiujka (Filip. 3:​4-8, 13-15). Yejua, yej nokojtiliaya chikauak tenojnotsas niman tlanemiliaya itech tlen ueliskia kichiuas ika tlayekapan. Ijkon ken Pablo, tejua xok uelis tikpatlas tlen yeuejkaui otikchiuj, san ika, uelis tiknemilis kenon uelis tikueyichiuas Jehová aman niman ika tlayekapan, ijkuak tinemis kampa toTajtsin yomitsijli.

10. ¿Tlenon uelis tikchiuaskej tla yotiteyolkokojkej?

 ¹⁰ Kanaj melak xkuajli timomachilia tla tlen otikchiuj melak okinyolkoko oksekimej. ¿Tlenon uelis tikchiuas? Xkintlajtlanili mamitstlapojpoluikan niman xmokojtili xchiua tlen kinpaleuis maka sa melak manoyolkokokan (2 Cor. 7:11). Xtlajtlanili Jehová makinpaleui akin otikinyolkoko. Jehová uelis mitspaleuis niman kinpaleuis akin otikinyolkoko para xyolseujtokan.

11. ¿Tlenon tiuelij itech Jonás? (Noijki xkita tlaixkopinajli).

¹¹ Xueli itech tlen xkuajli otikchiuj niman xkauili Jehová mamitstekitilti ijkon ken yejua kinekis. Xontlanemili itech teotlajtojketl Jonás. ToTajtsin okinauatijka mauiya Nínive, san ika, yejua oksekan oyaj. Jehová okiyektlali, niman Jonás ouel itech tlen xkuajli okichiujka (Jon. 1:​1-4, 15-17; 2:​7-10). Jehová ok okitekitilti Jonás ken teotlajtojketl niman oksejpa okontitlan Nínive, niman aman Jonás kema otetlakamat. Yejua oksejpa okiseli tekitl tlen Jehová okimakak maski najmanaya pampa kachtopa xotetlakamat (Jon. 3:​1-3).

JEHOVÁ TECHYOLSEUIYA IKA IESPÍRITU SANTO

12. ¿Kenon techyolseuiya Jehová ijkuak topan nochiua itlaj tlen melak xkuajli? (Filipenses 4:​6, 7).

¹² Ijkuak topan nochiua itlaj tlen melak xkuajli, Jehová techyolseuiya ika iespíritu santo. Ijkon onomachilijkej tokniuj Ron niman Carol ijkuak intelpoch onomikti, yejuamej kijtouaj: “Yotikixnamijkaj miyek tlen xkuajli, san ika, ijkuak onomikti totelpoch, yejon tlen más otechyolkoko. Miyekpa xtiueliyaj tikochiyaj, ika yejon, tiknotsayaj Jehová niman yejua techyolseuiaya ijkon ken kijtoua ipan Filipenses 4:​6, 7” (xpoua). Tla tikixnamiktok itlaj tlen melak ouijtika niman melak timoyolkokoua, xkijli Jehová nochi tlen tikmachilia. Uelis miyekpa tiknotsas niman uelis tiuejkauis iuan timonojnotsas maski san kech tiknekis (Sal. 86:3; 88:1). Nochipa xtlajtlanili iespíritu santo, niman kuajli xmatsto ika yejua mitskakis ijkuak tiknotsas (Luc. 11:​9-13).

13. ¿Kenon uelis techpaleuis espíritu santo maka matijkajkauakan ika tiktekichiuiliaj Jehová? (Efesios 3:16).

¹³ ¿Yotikixnamik itlaj tlen melak xkuajli niman tikmachilia ika xok uelis titlaxikos? Tla kema, kuajli xmatsto ika espíritu santo mitsmakas kojtilistli para uelis nochipa timelajkanemis itech Jehová (xpoua Efesios 3:16). Matitlajtokan itech tlen ipan opanok tokniuj Flora. Yejua niman iueuentsin katkaj misioneros, san ika, iueuentsin okikajkayauj niman onokaujkej. Tokniuj Flora kijtoua: “Tlen onechchiuili noueuentsin melak nechyolkokouaya niman nochipa san yejon niknemilijtoya, ika yejon, niktlajtlaniliaya Jehová manechmaka iespíritu santo niman ijkon uelis nitlaxikos. Jehová onechyolseui niman onechpaleui manikxiko tlen nikixnamiktoya maski niknemiliaya ika xniueliskia nikxikos”. Yejua kimachilia ika toTajtsin okipaleui más itech matlaneltoka, niman kuajli kimatstok ika Jehová kipaleuis maski san tlenon makixnamiki. Niman noijki kijtoua: “Jehová onechpaleui manitlanemili ijkon ken kijtoua Salmo 119:32: ‘Ikan nochi noyojlo nikintlakamatis motlanauatiluan, pampa otinechpaleuij para nikinkajsikamati’”.

14. ¿Tlenon noneki tikchiuaskej niman ijkon tikseliskej espíritu santo?

¹⁴ Tla yotiktlajtlanili Jehová mamitsmaka iespíritu santo, ¿tlenon noneki tikchiuas? Xchiua tlen mitspaleuis xseli espíritu santo: xuiya tlanechikoltin niman xtenojnotsati. Noijki mojmostla xpoua moBiblia para uelis titlanemilis ijkon ken Jehová (Filip. 4:​8, 9). Ijkuak tikamapoujtias, xkitstiuj tlen yeuejkaui okixnamijkej itekipanojkauan Jehová  niman xtlanemili itech kenon Jehová okinpaleui matlaxikokan. Sandra, akin otikteneujkej ipan párrafo 6, okixnamik miyek tlen ouijtika. Yejua kijtoua: “Tlen ipan opanok José melak nechyolseuiya. Yejua nochipa onouikak iuan Jehová maski okixnamik tlen xkuajli niman maski okichiuilijkej tlen xkinamiki” (Gén. 39:​21-23).

JEHOVÁ TECHYOLSEUIYA ITECHKOPA TOKNIUAN

15. ¿Akinomej uelis techyolseuiskej, niman kenon? (Noijki xkita tlaixkopinajli).

¹⁵ Ijkuak titlajyouiyaj, tokniuan techyoltlaliaj (Col. 4:11). Jehová kintekitiltia tokniuan niman ijkon techititis ika melak techtlasojtla. Yejuamej uelis techyolseuiskej tla touan nemij niman tla kuajli techkakij ijkuak tikimijliaj kenon tomachiliaj. Kanaj techpouiliskej se tlaxelojli ipan Biblia noso touan kichiuaskej teoyotl (Rom. 15:4). d Kanaj se tokniuj uelis techilnamiktis kenon tlanemilia Jehová, niman yejon techpaleuis maka melak matajmanakan niman kuajli matomachilikan. Tokniuan noijki uelis techpaleuiskej ika okseki tlemach, kanaj techmakaskej tlen tikuaskej.

16. ¿Kanaj tlenon nonekis tikchiuaskej tla tiknekij matechpaleuikan?

¹⁶ Kemantika, kanaj nonekis tiktlajtlanis mamitspaleuikan. Tokniuan melak mitstlasojtlaj niman kinekij mitspaleuiskej (Prov. 17: 17). San ika, kemantika tokniuan xkimatij kenon timomachilia noso kenon tikneki mamitspaleuikan (Prov. 14:10). Tla melak timajmantok, xkintejtemo tokniuan akin chikaujtok intlaneltok niman xkimijli kenon timomachilia. Melak kuajli tla tikimijlia tlenon tikneki makichiuakan mopampa. Uelis titlajtos iuan se tlayekanketl noso imiuan omemej tlayekankej akin imiuan timouika. Sekimej tokniuan siuamej más kuelitaj tlajtoskej iuan se insiuaikniuj akin chikaujtok itlaneltok.

17. ¿Tlenon uelis kichiuas maka matechyolchikauakan niman tlenon uelis tikchiuaskej?

¹⁷ Ijkuak tajmanaj, kanaj xtiknekij yakaj iuan tinemiskej, san ika, xyejyeko maka xmoxelo. Kanaj tokniuan xmás mitsajsikamatiskej noso kijtoskej itlaj tlen xtikuelitas (Sant. 3:2). San ika, maka xkauili ika yejon makichiua xkintlalkaui tokniuan pampa Jehová uelis kintekitiltis para mamitsyolchikauakan. Se tokniuj tlayekanketl akin itoka Gavin niman kipiya depresión, ijkin kijtoua: “Miyekpa, san noselti nikneki ninemis”. Maski ijkon, nokojtilia nemis imiuan iamigos niman yejon melak kipaleuiya. Se tokniuj siuatl akin itoka Amy, kijtoua: “Ipampa tlen yonikixnamik, xmás ueli nitlaneltoka intech oksekimej. San ika, aman ninokojtilijtika nikintlasojtlas nokniuan niman intech nitlaneltokas, ijkon ken Jehová kichiua. Yejon kiyolpaktia Jehová niman nejua noijki nechyolpaktia”.

MELAK TECHYOLSEUIYA TLEN JEHOVÁ KICHIUAS TOPAMPA

18. ¿Tlenon kualtsin tikchiaj ika tlayekapan, niman tlenon uelis tikchiuaskej aman?

¹⁸ Melak techyolpaktia ika sa achijtsin poliui ijkuak Jehová techpajtis, kichiuas kuajli matomachilikan niman kipopolos nochi tlen techtlajyouiltia (Apoc. 21:​3, 4). Ipan Xochitlalpan, nochi tlen otechyolkoko xok tikilnamikiskej (Is. 65:17). Ken yotikitakej, Jehová techyolseuiya. Yejua melak techtlasojtla niman miyek tlemach techmaka para techyoltlalis. Kuakon, ¡xkauili mamitspaleui! ¡Kuajli xmatsto ika Jehová melak mitstlasojtla! (1 Ped. 5:7).