“Xtlapojpoluikan tla yakaj xkuajli itlaj mechchiuilia” (COLOSENSES 3:13).

Pampa tinochimej topopolouaj, kemantika tikinyolkokouaj oksekimej noso yejuamej techyolkokouaj. Ika yejon, noneki tikintlapopoluiskej niman yejuamej matechtlapopoluikan. Ijkuak titetlapopoluiyaj, xok tikilnamikij tlen xkuajli otexchiuilijkej. Noijki, xtotlakuepiltiaj niman xkeman tikilnamiktiaj akin otechyolkoko tlen xkuajli otexchiuili (Romanos 12:17). San ika ¿tlenon tikchiuaskej tla yakaj melak yotechyolkoko niman xueli tiktlapopoluiyaj? Noneki san iselti iuan titlajtoskej. Matikyektlalikan tlauejli niman maka iuan matokualanikan (Romanos 12:18).

“Ikan yolyemanilistli xmomatikan ika oksekimej más uejueyixtokej xken nemejuamej” (FILIPENSES 2:3).

Miyekej kinekiskej touan nouikaskej tla tikintlakaitaj niman tla tiyolyemankej, pampa yejuamej kimatstokej ika kuajli tikinnotsaskej niman ika xkeman tikinchiuiliskiaj tlen xkuajli. San ika, tla toueyimatij niman nochipa tiknekij tikchiuaskej tlen tejuamej tiknekij, uelis kichiuas imiuan matokualanikan niman xok yakaj kinekis touan nouikas.

“Dios xkichikoita se tlakatl iuan okse, yej kiselia san akinon yejuan kitlakaita niman kuajli nouika maski ualeua san katlejua país” (HECHOS 10:34, 35).

ToTajtsin yejua xtechikoita. Yejua xkita tla kanon tiualeuaj, kenon titlachiaj, tla tikpiyaj tomin noso tla titlajtouaj okse tlajtojli. “Yejua okixtij itech san se tlakatl nochi kech tlakamej nemij ipan in países” (Hechos 17:26). Yejuin kijtosneki ika tinochimej tikniujtin. Ijkuak tikintlakaitaj oksekimej niman kuajli tikinnotsaj, yejuamej yolpakij, tejuamej tiyolpakij niman toTajtsin noijki yolpaki.

“Xmouikakan ikan [...] kuajli tenotsalistli” (COLOSENSES 3:12).

Tla xnimantsin tikualanij, oksekimej kinekiskej touan nouikaskej niman hasta uelis techyektlaliskej, pampa kimatstokej ika xnimantsin tikualaniskej. Niman, tla yakaj touan kualani, tejuamej noneki kuajli tiknotsaskej niman ijkon tikpaleuiskej mayolseui. Proverbios 15:1 kijtoua: “Tla se teyemankanankilia, kitlauelseuiya yakaj, pero tla tetlauelnankilia, kichiua para se más ma kualani”.

“Más paki yejuan kitemaka xken on yejuan kiselia” (HECHOS 20:35).

Miyekej tlaltikpakchanejkej san intech tlanemiliaj niman kinekij más miyek tlemach kipiyaskej. San ika, tla tikuelitaj tiktemakaskej, melak tiyolpakiskej (Lucas 6:38). Akin kuelitaj kitemakaskej tlen kipiyaj más yolpakij pampa kiteititiaj ika más kintlasojtlaj oksekimej xken tlen kipiyaj. Niman yejon kichiua ika yejuamej más matetlasojkamachilikan ijkuak oksekimej itlaj kintlayokoliaj (Colosenses 3:15). Xmotlajtolti: “¿Akinon nikuelitaskia iuan ninouikas? ¿Iuan yakaj akin tetlasojkamachilia niman kuelita kitemakas tlen kipiya, noso iuan yakaj akin xtetlasojkamachilia niman xtlaj kuelita kitemakas?”. Tejuamej noneki tiktechiuiliskej ijkon ken tikuelitaskiaj matexchiuilikan (Mateo 7:12).