“¡Nikuikaya 19 xiuitl ika nikchiatoya!”. ¿Tlenon kichiatoya yejuin tokniuj? Traducción del Nuevo Mundo de las Escrituras Griegas Cristianas ika itlajtol, bengalí. Miyekej noijki ijkon kijtouaj ijkuak nochijchiua Traducción del Nuevo Mundo ika intlajtol. San ika ¿yotimotlajtoltijka kech tekitl nochiua ijkuak nochijchiuaj yejuin Biblias?

 Kachtopa, Grupo akin kiyekana tlen Noijkuiloua, kimijlia tlenon kichiuaskej tokniuan akin tlajtolkuepaskej. ¿Kech uejkaui ika kitlajtolkuepaj Biblia? Nicholas Ahladis, akin tekiti ipan Servicios de Traducción ipan Warwick (Nueva York), techijlia: “Onka miyek tlen noneki noitas, kentla kechmej tokniuan akin tlajtolkuepaj uelis tlapaleuiskej, tla ouijtika yejon tlajtojli, tla kuajli kasikamatij tlen noteneua ipan Biblia niman noijki tla yejon tlajtojli miyek nopatla ipan okseki kalpamej. Yotikitakej ika uejkaui kanaj se noso yeyi xiuitl ika kitlajtolkuepaj san Escrituras Griegas Cristianas, niman kanaj naui xiuitl noso más ika kitlajtolkuepaj nochi Biblia. Niman más uejkaui notlajtolkuepa ika señas”.

 Ijkuak notlajtolkuepa Biblia, xsan tlapaleuiyaj akin tlajtolkuepaj. Noijki, noneki se grupo kampa manemikan tokniuan akin tlaamapouaskej niman kitaskej tla kuajli nasikamati tlen yonotlajtolkuep, ipan yejuin grupo nemij tokniuan akin ualeuaj ipan tlamantik noso sesejneka kalpamej. Tlen yejuamej kijtouaj kinpaleuiya akin tlajtolkuepaj makitakan kenon uelis más kuajli nasikamatis Biblia. Se tokniuj akin kinmachtia akin tlajtolkuepaj Biblia ne Sudáfrica, techijlia: “Akin tlajtolkuepaj kimachiliaj ika kipiyaj se ueyi tekitl ixpan Jehová niman akin kipouaj Biblia”.

 Ijkuak yotlan notlajtolkuepa Biblia, aman noneki nokixtiskej Biblias ipan imprenta. Para kinkixtiskej noneki amatl, tlapajli, tlen ika noixpantsakua Biblia, tlen ika nopepechoua, listones tlen ika notlajkoxelouaj, película de plata niman itlaj tlen kipaleuiya maka isiujkan manomakaua. Ipan 2019, onopopolo ipantsin 20 millones de dólares san para manokixtikan Biblias. Noijki ipan yejon xiuitl tokniuan otekitkej ipantsin 300,000 horas niman ijkon kinchijchiuaskej Biblias niman komintitlaniskej.

 ¿Tleka melak chikauak titekitij niman tikpopolouaj tomin ipan yejuin? Tokniuj Joel Blue, akin tekiti ipan Departamento Internacional de Impresión, kijtoua: “Pampa itech nochi amatlajkuiloltin tlen tikinchijchiuaj, Biblia on tlen más ueyi kijtosneki”. Noijki kijtoua: “Tiknekij ika toBiblia kualtsin manesi para manoueyichiua Jehová niman tlen tikteijliaj ijkuak titenojnotsaj”.

 Noijki tikinchijchiuaj Biblias Traducción del Nuevo Mundo para akin xtlachiaj, tsauktokej noso xtlakaki. Biblia Traducción del Nuevo Mundo ika braille onka ika 10 tlajtoltin. Se Biblia ika Braille uejkaui kanaj 8 horas para kichijchiuaj, pampa xeliujtika ika miyekej amoxtsitsintin, tlen san sekan kipiyaj 2.3 metros ika patlauak. Noijki, tikinchijchiuaj Biblias tlen noixpantsakuaj san ika amatl, pampa akin tsauktokej san yejuin kinkauiliaj makitekitiltikan.

 Akin kipouaj Traducción del Nuevo Mundo melak kinpaleuiya. Matikitakan tlen inpan opanok tokniuan akin tlajtouaj Kiluba, akin ualeuaj La Tombe (República Democrática del Congo). Yejuin kalpan uejka ipantsin 1,700 kilómetros (1,000 millas) itech capital. Ompa ltokniuan kipiayaj san se Biblia ika Kiluba, san ika xmás kasikamatiyaj. Niman pampa san se Biblia kipiayaj, tokniuan san notlaneujtiayaj para nochimej nomachtiskiaj tlen noitaskia ipan tlanechikojli. San ika, ipan agosto de 2018, nochimej tokniuan opeuj kiseliaj Biblia itech Traducción del Nuevo Mundo ika Kiluba, tlen melak kuajli kasikamatij.

 Se tokniuj siuatl, akin tlajtoua alemán, yejuin tlen techijlia itech Traducción del Nuevo Mundo tlen okis ika itlajtol: “Aman xok nikijtoua ika noneki nikpouas Biblia. Aman sa nikitstika kemanon uelis oksejpa nikpouas”. Se tlakatl akin tsauktika okijkuilo: “Melak onechpaleui pampa onechmakakej Biblia Traducción del Nuevo Mundo. Nejua xmás kuajli nikasikamatiya Biblia, san ika, ijkuak opeuj nikpoua yejuin traducción melak kuajli onikasikamat. Niknekiya nikmatis más itech iteixpantijkauan Jehová, niman itech tlenon nonekiya nikchiuas para uelis imiuan ninosentlalis”.

 Akin kipouaj Traducción del Nuevo Mundo melak kitlasojkamatij nochi donaciones tlen notemakaj pampa ijkon ueli nochijchiua yejuin libro. Yejuin donaciones nochiuaj kampa kijtoua “obra mundial”, niman miyek ken uelis tiktemakaskej totomintsin, ijkon ken kijtoua ipan donate.mt1130.com. Tiktlasojkamatij pampa nenkuelitaj nenkitemakaskej nemotomintsin.