TLEN KINPALEUIS MOCHANEJKAUAN
Tlen uelis kichiuaskej ijkuak xnasikamatij
Pampa akin yononamiktijkej sejneka tlen kinekij, tlen kichiuaj niman ken tlanemiliaj uelis kinpiyaskej tlaueltin. San ika, uelis más kinpiyaskej tlaueltin ijkuak sejneka tlanemiliaj itech yejuin:
Kech tiempo kixelouaj para inchanejkauan
Kenon kitekitiltiaj intomintsin.
Kitlapejpeniskej tla kinpiyaskej inkoneuan.
¿Tlenon uelis kichiuaskej akin yononamiktijkej ijkuak xnasikamatiskej?
Tlen noneki kimatiskej
Maski san noijki tlen kuelitaj xkijtosneki ika san noijki ken tlanemiliaj. Maski tla akin yononamiktijkej san noijki tlen kuelitaj niman tlen kichiuaj, kemantika ijkuak nonekis kitlapejpeniskej kichiuaskej itlaj tlen ueyi kijtosneki, kanaj xnasikamatiskej.
“Desde nipitentsin nofamilia nochipa san sekan nosentlalianij. Itlamiyan semana nochipa tosentlaliayaj iuan noabuelos, notíos niman noprimos. San ika, ifamilia noueuentsin xijkon kichiuayaj. Ika yejon, tlamantik ken tiknekiyaj tikuiskej totiempo iuan tofamilia noso tiempo tlen tikuiskiaj para tikominotsaskej akin uejka chantij” (Tamara).
“Pampa tlamantik ken otechiskaltijkej, nosiuatsin niman nejua tlamantik ken tiktekitiltiayaj totomintsin. Ijkuak kemach otonamiktijkej, miyekpa otokualanijkej ipampa yejon. Niman xouel otikyektlalijkej tlauejli maski miyekpa yotonojnotskaj” (Tyler).
Omemej san noijki tlen konitstokej, san ika, tlamantik tlen kitaj. Noijki ijkon panoua iuan akin yononamiktijkej, kemantika tlamantik ken tlanemiliaj itech itlaj tlen kichiuaskej.
San ijkon tikauas se tlauejli, xtepaleuiya. Matikonnemilikan, ¿tlenon nenkichiuaskej tla se de nemotajuan kualoskia niman nonekiskia xtlajpiyatij? Niman, ¿tla se de nemejuamej kineki kipiyas ikoneuj, san ika, okse ka? a
“Nosiuatsin niman nejua miyekpa yotonojnotskaj itech tla tikinpiyaskej tokoneuan. Nesi ika yejua nochipa tlanemilijtika itech yejon, san ika, tlamantik ken titlanemiliaj. Xnikmati tlenon tikchiuaskej” (Alex).
Maski akin yononamiktijkej tlamantik ken tlanemiliaj, yejon xkijtosneki tla nonekis noxeloskej. Sekimej ixtlamatkej kijtouaj, ika tla xtimotlajtolnamiki iuan moixnamik ijkuak noneki itlaj nenkitlapejpeniskej, noneki itlaj tikchiuas para manochiua ijkon ken tejua tikneki, maski yejon makijtosneki timokauas iuan moixnamik. San ika, ijkuak akin yononamiktijkej ijkon kichiuaj, san itech tlanemiliaj, niman xkilnamikij ika ijkuak ononamiktijkej okijlikej toTajtsin ika maski san tlenon panoskia yejuamej san sekan nemiskiaj.
Tlen uelis kichiuaskej
Xchiuakan tlen onenkijtokej ijkuak onemonamiktijkej. Tla ijkon nenkichiuaj, mechpaleuis san sekan xkimixnamikikan tlaueltin niman maka xmotlauelitakan.
Texto tlen uelis mechpaleuis: “Yejua ika se tlakatl xuelis kixelos on tlen Dios okisentlalij” (Mateo 19:6).
Xnemilikan. Matikontlalikan ika se de nemejuamej kineki kipiyas ikoneuj, san ika, okse xkineki. Tla ijkon panoua, xtlanemilikan itech yejuin:
Xkitakan tla kuajli onka nemonamiktilis.
¿Nenueliskej nenkixnamikiskej maski san tlenon panos ijkuak nenkiskaltijtiaskej nemokoneuj?
Tlen noneki nenkichiuaskej tla inenkipiyaj nemokoneuj.
Tla nenkipiyaskej nemokoneuj xsan noneki nenkitlakualtiskej, nenkitlakentiskej noso nenkimakaskej kanon chantis.
Xkitakan tla mechajxilis nemotomintsin.
¿Nenueliskej nenkichiuaskej nochi tlen noneki ipan nemotekiyo, iuan nemofamilia noso okseki tlemach?
Texto tlen uelis mechpaleuis: “Cada se de nemejuamej yejuan kineki kichijchiuas sen torre, achtopa notlalia para kixtlaloua itomin tla kaxilis para tlamis on torre” (Lucas 14:28).
Kuajli xkitakan kenon uelis nenkiyektlaliskej tlauejli. Kanaj sekimej tlaueltin uelis nenkiyektlaliskej. Ken ijkuak nentlajtoskej itech tla nenkipiyaskej nemokoneuan, akin xkineki kipiyas uelis notlajtoltis yejuin:
“Ijkuak nikijtoua ika xnikneki nikpiyas nokoneuj, ¿nikijtosneki ika xkeman noso san amantsin ka?”.
“¿Xnikneki nikinpiyas nokoneuan pampa nikmachilia ika xuelis kuajli nikinyekanas?”.
“¿Ninomojtia niknemilis ika noixnamik xok más nechtlasojtlas?”.
Niman noijki, akin kineki kipiyas ikoneuj uelis notlajtoltis yejuin:
“¿Tiueliskej tikchiuaskej totekiyo ken tajtin?”.
“¿Techajxilis totomintsin para tikiskaltiskej tokoneuj?”.
Texto tlen uelis mechpaleuis: “Pero on yejuan kipiyaj itlamatkilis Dios, [...] nemij yolyemankej” (Santiago 3:17).
Maka xnemili tla moixnamik xkuajli tlanemilia. Matikonnemilikan ika omemej san sekan konitstokej se tepetl, san ika, tlamantik tlen kitaj. Noijki ijkon panoua iuan akin yononamiktijkej, tlamantik ken tlanemiliaj itech tlen kichiuaskej, ken ijkuak kitekitiltiskej intomintsin. Ijkuak peuas nentlajtoskej itech tlen tlamantik nenkinemiliaj, kachtopa xtlajtokan itech tlen san noijki nenkinemiliaj.
¿Tlenon san noijki nenkinekij nenkichiuaskej?
¿Tlenon nenkitaj uelis mechpaleuis itech tlen kinemilia cada se de nemejuamej?
Para kuajli nemouikaskej, ¿ueliskia se de nemejuamej, noso nenomemej, nenkipatlaskej tlen nenkinemiliaj niman ijkon moixnamik kuajli manomachili?
Texto tlen uelis mechpaleuis: “Maka yakaj kitejtemo on tlen kuajli san para yejua, yej ma kitejtemo on tlen kuajli para oksekimej” (1 Corintios 10:24).
a Achto ika nemonamiktiskej noneki nemonojnotsaskej itech tlen nenkinemiliaj nenkichiuaskej itech tlen más ueyi kijtosneki. San ika, kemantika uelis panos itlaj tlen xnenkinemiliayaj noso yaka uelis kipatlas tlen yokijtojka (Eclesiastés 9:11).