Miyekej akin yononamiktijkej xok más kuajli nonojnotsaj. Maski san sekan nemij, ouijtika kitaj nonojnotsaskej. ¿Tleka ijkon inpan nochiua?

•  ¿Tleka xeliujtokej maski san sekan nemij?

•  Tlen uelis kichiuaskej

•  Tlen kijtouaj sekimej akin noijki yononamiktijkej

•  Tlen uelis san sekan kitaskej

•   “Melak tisiaujtokej”

   “Ijkuak tikpiyaj tiempo para san sekan tinemiskej niman tonojnotsaskej, nejua melak nisiaujtok noso noueuentsin yejua akin melak siaujtok. Niman ijkuak nisiaujtok, nochi nechkualania. Ika yejon, peua tikitaj tele” (Anna).

•   “Tecnología techkuilia totiempo”

   “Internet niman redes sociales uelis melak miyek tiempo mitskuiliskej. Nejua melak miyek tiempo ompa nikitstok nocelular niman hasta xniknotsa noueuentsin. Niman kemantika hasta niauj okse cuarto” (Katherine).

•   Xsan noyejua tlen tikuelitaj

   “Ijkuak noueuentsin yejko nochan peua kichiua tlen yejua kuelita niman yejon melak kuajli pampa yejua melak tekiti niman noijki noneki noseuis. San ika, nikuelitaskia más san sekan matinemikan” (Jane).

•   “Nochipa titekititokej”

   Pampa aman melak tijkuij tecnología nochiuiyan ueli titekititokej. Kemantika ijkuak ueliskia ninentos iuan nosiuauj, peua nikinnankilia mensajes noso correos de notekiyo” (Mark).

•   Xkilnamikikan ika melak noneki san sekan ninemiskej iuan nenmoixnamik.

   Texto tlen mechpaleuis: Noneki “nochipa nenkimatiskej kenijki nenkitlapejpeniskej on tlen más kuajli” (Filipenses 1:10).

   Xnemilikan yejuin: ¿Tlen nenkichiuaj kiteititia ika para nemejuamej más ueyi kijtosneki nemonamiktilis xken nemotekiyo noso on tlen nenkuelitaj nenkichiuaskej? ¿Noso kanaj yonemomatkej san sekan ninemiskej san ijkuak nenuelij?

   Xchiuakan yejuin: Xxelokan tiempo para san sekan xnemikan niman maka san ijkuak nenueliskej.

   “Melak nikuelita ijkuak noueuentsin kixeloua tiempo para san sekan matinemikan. Yejon nechasikamachiltia ika nechtlasojtla niman ika kuelita nouan nemis. Yejon kichiua noijki más maniktlasojtla” (Anna).

•   Xkijli mocelular noso motableta: “Aman ka”.

   Texto tlen mechpaleuis: “Nochi tlen nochiua [...] kipiya kamanon nochiuas” (Eclesiastés 3:1).

   Xnemilikan yejuin: ¿Kechpa ijkuak yejko se mensaje kichiua ika maka kuajli xkaki moixnamik?

   Xchiuakan yejuin: Xyejyekokan san sekan nentlakuaskej maski san sejpa ipan se tonajli niman xkinkauakan nenmoteléfonos ipan okse cuarto. Melak kuajli tla san sekan nentlakuaj pampa ijkuakon uelis nenmonojnotsaskej itech tlen onenkichiujkej ipan yejon tonajli.

•   Ijkuak nenueliskej san sekan xtekichiuakan noso san sekan xkouatij tlen mechpoloua nemochan.

   Texto tlen mechpaleuis: “Más kuajli omemej xken se san iselti, pampa más ueyi kiseliskej intlaxtlauil de on intekiu yejuan kichiuaj” (Eclesiastés 4:9).

   Xnemilikan yejuin: ¿Kechpa xsan sekan nenyauej ijkuak nenmontlakouaj noso nenmontlatlaxtlauaj?

   Xchiuakan yejuin: San sekan xmopaleuikan maski kampa xnonekiskia nenomemej nenkichiuaskej.

   “San sekan xtlakouatij, xkinpajpakakan platos, xkinkuelpachokan nemotlakenuan noso xkintlajpiyakan nemoplantas pampa yejon mechpaleuis más san sekan xnemikan” (Nina).

•    Xteasikamatikan niman maka xchiakan tlen xuelis mechmakaskej.

   Texto tlen mechpaleuis: “Nochimej tlaltikpakchanejkej mamechixmatikan ika kuajli nentlanemiliaj” (Filipenses 4:5, TNM).

   Xnemilikan yejuin: ¿Kenon uelis nenkimatiskej ika xnenkitlajtlaniliaj nenmoixnamik itlaj tlen xuelis mechmakas?

   Xchiuakan yejuin: Xtlajtlajtokan itech tlen tikuelita niman itech tlen kuelita moixnamik. Sakin, kuajli xkitakan tlenon uelis nenkichiuaskej para san sekan nenkichiuaskej tlen cada se de nemejuamej kuelita kichiuas para noyolpaktis.

   “Noueuentsin xsiaujkayo, san ika, pampa nejua san nikuajkualo nimantsin nisiaui. Kemantika nikijlia makisa niman makichiuati itlaj tlen yejua kuelita, para ijkon kuajli manomachili. Yejua konchiua ejercicio, niman nejua ninokaua nochan para ninoseuis. Ijkon tiomemej tiyolpakij” (Daniela).

 Kachtopa, nenmosejselti xkinnankilikan yejuin tlajtoltilistin niman sakin, xmoijlikan tlenon onentlanankilijkej.

•    ¿Tiknemilia ika melak miyek tiempo san sekan nenpanouaj?

•   ¿Tlenon tiktlasojkamati itech tlen kichiua moixnamik para san sekan xnemikan?

•   ¿Tlenon tikuelitaskia tlamantik makichiua moixnamik?

•   ¿Kechpa moteléfono noso motablet yokichiuj ika maka kuajli xkaki tlen mitsijlitika moixnamik?

•   ¿Tlenon uelis tikchiuas para tikititis moixnamik ika tikasikamati niman ika xtikchia mamitsmaka tlen xuelis mitsmakas?

•   ¿Tlenon ueliskia nenkipatlaskej yejuin semana para ijkon más miyek tiempo san sekan nenpanoskej niman maka itlaj mamechpajsolo?