Biblia kijtoua ika on espíritu santo ikojtilis toTajtsin (Miqueas 3:8; Lucas 1:35). ToTajtsin kikui iespíritu santo niman ijkon kichiuas manochiua tlen yejua kineki (Salmo 104:30; 139:7).

 Ipan Biblia, tlajtojli “espíritu” ika hebreo noijtoua rúaj, niman ika griego pnéuma. Niman miyekpa ijkuak noteneuaj yejuin tlajtoltin tlajtotika itech ikojtilis toTajtsin noso espíritu santo (Génesis 1:2). San ika, kemantika Biblia noijki kinkui yejuin tlajtoltin para...

•   ... kiteneuas ijkuak yakaj nijyotia (Habacuc 2:19; Apocalipsis 13:15).

•   ... kiteneuas ajakatl (Génesis 8:1; Juan 3:8).

•   ... kiteneuas yejon kojtilistli tlen kichiua matiyoltokan niman mayoltokan yolkamej (Job 34:14, 15).

•   ... kiteneuas kenijki yakaj tlanemilia noso tlenon melak kinejneki yakaj (Números 14:24).

•   ... kiteneuas akin xueli tikimitaj, ken toTajtsin niman ángeles (1 Reyes 22:21; Juan 4:24).

 Yejuin tlen otikonteneujkej xueli tikitaj, san ika, kema ueli tikmachiliaj noso tikitaj tlen kichiua. Se diccionario kijtoua ika iespíritu toTajtsin “ijkon ken ajakatl, xueli tikitaj, xueli tikajsij niman melak kojtik” (Diccionario expositivo de palabras del Antiguo y del Nuevo Testamento exhaustivo, de William E.Vine).

 Biblia kijtoua ika espíritu santo yeskia ken imauan noso imajpiluan toTajtsin (Salmo 8:3; 19:1; Lucas 11:20; noijki xkita Mateo 12:28). Se konchijchiujketl kinkui imauan niman ijkon itlaj kichijchiuas. Noijki ijkon, toTajtsin okikuik iespíritu santo niman ijkon...

•   ... kichijchiuas universo (Salmo 33:6; Isaías 66:1, 2).

•   ... kichiuas makijkuilokan Biblia (2 Pedro 1:20, 21).

•   ... kinpaleuis itekipanojkauan akin yeuejkaui onenkej mauelikan makichiuakan milagros niman matenojnotsakan (Lucas 4:18; Hechos 1:8; 1 Corintios 12:4-11).

•   ... kinpaleuis itekipanojkauan makiteititikan ika kipiyaj kuajli inyojlo (Gálatas 5:22, 23).

Espíritu santo xse tlaltikpakchane

 Ijkuak Biblia kijtoua ika espíritu santo yeskia ken imauan, imajpiluan noso ijyo toTajtsin, kuajli nesi ika xtlajtojtika itech se tlakatl noso itech se siuatl (Éxodo 15:8, 10). Imauan se konchijchiujketl xueli itlaj kichiuaj tla on konchijchiujketl xkiminolinia. Noijki ijkon, espíritu santo xueli tekiti tla Jehová xkiyekana (Lucas 11:13). Biblia noijki kijtoua ika espíritu santo yeskia ken atl, totlaneltokil niman totlamachilis. Yejuin noijki techititia ika espíritu santo xse tlaltikpakchane (Isaías 44:3; Hechos 6:5; 2 Corintios 6:6).

 Biblia kijtoua ika toTajtsin itoka Jehová niman ika iKoneuj itoka Jesucristo, san ika, xkanaj kiteneua tla espíritu santo kipiya itoka (Isaías 42:8; Lucas 1:31). Ijkuak se inomachtijkauj Cristo, akin itoka katka Esteban, okititijkej se tlatlachalistli, yejua xyeyimej okimitak, san omemej okimitak. Biblia kijtoua: “Esteban yejuan yoltentikatka ikan Espíritu Santo ontlachix iluikak niman okitak iueyilis Dios, niman Jesús ompa ijkatikatka iyekmakopa Dios” (Hechos 7:55). Kuakon, yejuin techasikamachiltia ika toTajtsin san okikuik iespíritu santo niman ijkon kichiuas ika Esteban makita yejon tlatlachalistli.

 Tlen sekimej kinemiliaj: Miyekej kinemiliaj ika espíritu santo yakaj akin yoltika niman ika teuan itech Trinidad. Ijkon kineltokaj pampa yejuin tlen teasikamachiltiaj seki Biblias ipan 1 Juan 5:7, 8, ijkon ken Biblia Torres Amat niman Reina-Valera.

 Tlen melauak: Ipan 1 Juan 5:7, 8 itech Biblia Torres Amat kijtoua ika ne iluikak yeyimej nemij: toTajtsin, Tlajtojli niman espíritu santo; Niman yejuin yeyimej san no yejuamej. Niman ika yejuin yeyimej yejuamej akin temachtiaj ipan tlaltikpaktli. San ika, sekimej ixtlamatkej kuajli yokitakej ika apóstol Juan xokimijkuilo yejuin tlajtoltin niman ika xnonekiskia oniaskej ipan Biblia. Ixtlamatki Bruce M. Metzger okijto:“Xmelauak tlen kijtouaj yejuin tlajtoltin, niman [...] xkinamiki maoniakan ipan Nuevo Testamento” (Un comentario textual al nuevo testamento griego).

 Tlen sekimej kinemiliaj: Espíritu santo se tlaltikpakchane pampa Biblia kemantika ijkon kiteasikamachiltisneki.

 Tlen melauak: Maski Biblia kemantika kiteneua espíritu santo kentla se tlaltikpakchane, xkijtosneki tla se tlaltikpakchane. ¿Tleka ijkon tikijtouaj? Pampa Biblia kemantika noijki kijtoua ika on tlamachilistli, mikilistli niman tlajtlakojli yeskiaj ken se tlaltikpakchane (Proverbios 1:20; Romanos 5:17, 21). San matikonteneuakan yejuin, Biblia kijtoua ika tlajtlakojli yeskia ken se yakaj akin teyoltilana, san itech tlanemilia niman temiktiani (Mateo 11:19; Lucas 7:35; Romanos 7:8, 11).

 Ipan iEvangelio Juan, tikitaj ika Jesús okiteneuj espíritu santo ken se tlapaleuijketl. Okijto ika espíritu santo temachtiskia, tlajtoskia, tlakakiskia niman kimijliskia tlen melauak akin kichiuayaj ken Cristo, niman ika kichiuaskia makiueyiteneuakan Jesús niman ika itlaj kiseliskia. Sekimej kijtouaj ika pampa Juan okiteneuj espíritu santo ken se tlaltikpakchane, kuakon kanaj se tlaltikpakchane (Juan 16:7-15). San ika ¿yejon melauak? Ka. Pampa tlajtojli griego xijkon ken tlajtojli español. Tlajtojli griego kinpiya sustantivos niman pronombres tlen kiteititiaj tla tlajtojtika itech se tlakatl, se siuatl noso itech itlaj. Ijkuak apóstol Juan otlajto itech se tlapaleuijketl, okitekitilti sustantivo paráklētos, yejuin sustantivo nokui niman ijkon titeasikamachiltis ika tikteneujtika yakaj akin tlakatl, yejua ika, noijki okitekitilti se pronombre tlen nokui para tikteneuas se tlakatl. San ika, ijkuak otlajto itech espíritu santo, okitekitilti tlajtojli pnéuma, se tlajtojli tlen xkiteititia tla tlajtotika itech se tlaltikpakchane (Juan 14:16, 17).

 Tlen sekimej kinemiliaj: Espíritu santo se tlaltikpakchane pampa Biblia kijtoua ika noneki toapolaktiskej ika itoka.

 Tlen melauak: Ijkuak Biblia kijtoua ika yakaj kichiua itlaj ipampa itoka yakaj, kiteititia ika se ueli kichiua itlaj pampa yakaj yokikauili ijkon makichiua (Deuteronomio 18:5, 19-22; Ester 8:10). Kuakon, ijkuak yakaj noapolaktia ika itoka espíritu santo kijtosneki ika kasikamati ika yejuin espíritu melak kojtik niman ika toTajtsin kitekitiltia para kichiuas tlen yejua kineki.

 Tlen sekimej kinemiliaj: Inomachtijkauan Jesús niman apóstoles, kineltokayaj ika espíritu santo se tlaltikpakchane.

 Tlen melauak: Biblia niman tlen yeuejkaui opanok xyejon tlen techititia. Encyclopædia Britannica kijtoua ika miyekej opeuj kineltokaj ika espíritu santo se tlaltikpakchane pampa ijkon onoijto ipan Concilio de Constantinopla tlen onochiuj ipan xiuitl 381. Yejuin onochiuj kanaj ijkuak yopanokaj 250 xiujtin ika yomijka on sa ika apóstol.