Iteixpantijkauan Jehová xnokalaktiaj ipan política ipampa tlen kineltokaj, itech tlen Biblia temachtia. Xtiktlapejpeniaj se partido noso akin kineki nochiuas tekiuaj, xtiktejtemouaj matechtlapejpenikan ken tlanauatijkej nion xtiktejtemouaj tikinpatlaskej tlanauatijkej. Tejuamej tikneltokaj ika iTlajtol toTajtsin kuajli techijliaj tlenon tikchiuaskej.

•   Tikchiuaj ijkon ken Jesús, akin xonokalakti ipan política (Juan 6:​15). Yejua okijto ika inomachtijkauan “xnouikaj ken on tlaltikpaktlakamej” niman kuajli okimijli ika xkipiya nokalaktiskej ipan política (Juan 17:14, 16; 18:36; Marcos 12:13-​17).

•   Tejuamej tiknekij tiyolmelaujkanemiskej itech iTekiuajyo toTajtsin, tlen Jesús okiteneuj ijkuak okijto: “Niman yejuin kuajli tlajtoltin itech Tekiuajyotl notenojnotsas ipan nochi tlaltikpaktli” (Mateo 24:14, TNM). Akin tikteijlitokej ika iyejkotika iTekiuajyo toTajtsin, xtokalaktiaj ipan política itech país kampa tichantij nion itech okseki países (2 Corintios 5:​20; Efesios 6:​20).

•   Pampa xtokalaktiaj ipan política, tiuelij titlajtouaj iuan nochimej tlaltikpakchanejkej akin tlaneltokaj itech se partido político, niman ijkon tikinnojnotsaj itech tlen kualtsin kichiuas iTekiuajyo toTajtsin. Ika tlen tikchiuaj niman ika totlajtoluan tikyejyekouaj tikteititiskej kenon san iTekiuajyo toTajtsin kiyektlalis nochi tlauejli ipan tlaltikpaktli (Salmo 56:11).

•   Pampa xtechxeloua política, san sekan touikaj iuan nochimej tokniuan akin nemij ipan nochi tlaltikpaktli (Colosenses 3:​14; 1 Pedro 2:​17). Xtikchiuaj ijkon ken oksekimej tlaneltokiltin akin nokalaktiaj ipan política niman xsan sekan nouikaj imiuan akin nosentlaliaj (1 Corintios 1:​10).

 Tikintlakaitaj tlanauatijkej. Maski xtokalaktiaj ipan política, tikintlakaitaj akin tlanauatiaj kampa tichantij. Tikchiuaj ijkon ken kijtoua iTlajtol toTajtsin: “Nochi tlakatl ma tetlakamati intech on tekiuajkej” (Romanos 13:1). Tikintlakamatij intlanauatiluan, tiktlaxtlauaj tlen kitlajtlanij niman titlapaleuiyaj itech tlen tekiuajkej kitejtemouaj kenon kuajli matinemikan kampa tichantij. Tejuamej xtiktejtemouaj tikimixnamikiskej tlanauatijkej, tiktlakamatij tlen techijlia iTlajtol toTajtsin: “Xchiuakan oraciones impampa on yejuan reyes niman nochimej on yejuan tekiuajkej”. Tiktlajtlanij ipan toteoyouan ika tekiuajkej matechkauilikan matikueyichiuakan toTajtsin (1 Timoteo 2:​1, 2)

 Tejuamej noijki tiktlakaitaj tlen oksekimej kitlapejpeniaj itech política. Ken ijkuak kitlapejpeniaj akinon tekiuajtis, tejuamej xtikimijliaj akinon tiknekij makitlapejpenikan nion xtokalaktiaj ijkuak yakaj kitlapejpenijtokej.

 ¿Kemach opeuj ika xtokalaktiaj ipan política? Ka. Itlatitlankauan Jesús niman inomachtijkauan xonokalaktijkej ipan política. Se amoxtli kijtoua: “Maski kineltokayaj ika nonekiya kintlakaitaskej tlanauatijkej, akin kachtopa opeujkej kichiuaj ken Cristo xkineltokayaj ika nonekiya nokalaktiskej ipan política” (Beyond Good Intentions—A Biblical View of Politics [Xsan tlen kuajli noneki nochiuas. Tlen Biblia kijtoua itech política]). Noijki, Orígenes, se tlakatl akin onomachti itech toTajtsin niman onen kanaj ipan xiujtin 185-254, okijkuilo: “Akin kichiuaj ken Cristo xkinekij kiseliskej makintlalikan ken tlanauatijkej”.

 ¿Xtokalaktiaj ipan política pampa tiknekij tikchiuaskej itlaj tlen xkuajli ipan topaís? Ka. Tejuamej tiktejtemouaj maonia yolseuilistli, ika yejon, tekiuajkej xkipiyaj ika ijkon kinemiliskej. Xkita tlen okijto Academia Nacional de Ciencias de Ucrania ipan 2001. Ijkuak otlajto ika xtokalaktiaj ipan política okijto: “Kanaj ipan yejuin tonajli xnochimej kuelkakij tlen kichiuaj iteixpantijkauan Jehová. Ika yejon, nazis niman comunistas okintsajkej”. San ika, ompa noijki okijto ika maski xkuajli okinchiuilijkej soviéticos, iteixpantijkauan Jehová “xokikajkaujkej kintlakaitaj tlanauatiltin”. “Otekitkej chikauak niman ken kimelaua ipan tlaltin kampa miyekej tekitiyaj niman ipan uejueyimej fábricas niman comunistas xkipiayaj tleka kinmakasiskiaj”. Academia Nacional de Ciencias de Ucrania sa ika otlamito okijto yejuin itech tlen kineltokaj niman tlen kichiuaj iteixpantijkauan Jehová ipan yejuin tonajli ika xkinekij “kijtlakoskej tlen kuajli kitejtemoua se país”.