Ka, xkeman ijkon tikchiuaj. Tlen kema, ijkuak tikitaj ika tlen tikneltokaj xijkon kijtoua ipan Biblia, tikpatlaj.

 Nochi tlen tikneltokaj kisa itech iTlajtol toTajtsin. Niman maski ok xtikpiayaj Traducción del Nuevo Mundo de las Santas Escrituras tlen onochijchiuj ipan 1950, kuajli tomachtiayaj Biblia. San ika, tikintekitiltiayaj okseki biblias tlen yonochijchiujkaj. Matikitakan seki tlen itikneltokayaj ijkuak ok xtikpiayaj Traducción del Nuevo Mundo, niman xkita tla melauak ijkon temachtia Biblia.

1.   Tlen tikneltokaj: ToTajtsin xse Trinidad. Revista Zion’s Watch Tower (tlen aman ika español itoka La Atalaya) tlen okis ipan julio, 1882 kijtouaya: “Akin kinpouaj toamatlajkuiloluan kimatstokej ika maski tikneltokaj toTajtsin Jehová, Jesús niman espíritu santo, xtikneltokaj ika nemi yeyi toTajtsin niman ika yejuin yeyi nochiuaj san se toTajtsin, noso ken sekimej kijtouaj, se toTajtsin itech yeyimej, pampa yejuin tlamachtijli xuajlauj ipan Biblia”.

     Tlen Biblia kijtoua: “Jehová toTajtsin, Jehová san se” (Deuteronomio 6:4, Reina-Valera [RV], 1865). “Nemi san se toTajtsin, yejua Tajtli, akin okichijchiuj nochi tlemach, niman tejuamej ipampa tinemij; niman se toTeko, Jesucristo.” (1 Corintios 8:6, RV, 1865; onoijkuilo ken aman noijkuiloua.) Jesús okijto: “NoTajtsin [...] más ueyixtikaj xken nejua” (Juan 14:28, In Yencuic Iyectlajtoltzin Dios).

2.   Tlen tikneltokaj: Akin xkuakualtin xtlajyouiyaj nochipa ika tlitl. Ipan revista Zion’s Watch Tower tlen onochijchiuj ipan junio, 1882 tlajtouaya itech “Tlajtlakojli notlaxtlaua ika mikilistli” tlen uajnestiuj ipan Romanos 6:23. Yejuin texto onokixti ipan King James Version (Versión del Rey Jacobo) niman ipan yejon revista okijto: “¡Melak kuajli nasikamati yejuin tlajtoltin! Miyekej tlaltikpakchanejkej kijtouaj ika Biblia iTlajtol toTajtsin, san ika, xkinekij kineltokaskej yejuin tlajtoltin; kineltokaj niman kimelajkaijtouaj ika Biblia temachtia ika tlajtlakojli notlaxtlaua ijkuak titlajyouijtos nochipa ika tlitl.

     Tlen Biblia kijtoua: “Alma akin tlajtlakoua, yejua mikis” (Ezequiel 18:4, 20, RV, 1865) Ijkuak toTajtsin tetlajtlakolmakas xkintlajyouiltis itlauelikniuan ika tlitl, kichiuas “ika tlapopolouilistli” noso “xoxotonilistli para nochipa” ken kijtoua Biblia In Yencuic Iyectlajtoltzin Dios ipan 2 Tesalonicenses 1:9.

3.   Tlen tikneltokaj: ITekiuajyo toTajtsin yemelak se tekiuajyotl, maka itlaj tlen tikpiyaj ipan toyojlo. Ijkuak otlajto itech iTekiuajyo toTajtsin, revista Zion’s Watch Tower tlen onochijchiuj ipan diciembre, 1881 okijto: “Ijkuak notlalis yejuin Tekiuajyotl kijtosnekis, ika popoliuiskej nochi tekiuajyomej ipan nochi tlaltikpaktli”.

     Tlen Biblia kijtoua: “Ipan itonaluan yejon tekiuajyomej toTajtsin iluikakchane kikuiteuas se tekiuajyotl, tlen xkeman kipopoloskej, niman yejuin tekiuajyotl xpanos itech okse kalpan: kinxoxotonis niman kintlamis nochi yejuin tekiuajyomej: niman yejua nochipa nemis” (Daniel 2:44, Scío de San Miguel, 1850; onoijkuilo ken aman noijkuiloua).

 Ka. Iteixpantijkauan Jehová tikintekitiltiaj miyek biblias tlen ika tikinmachtiaj oksekimej makimatikan tlen tikneltokaj. Yemelak ika tikintekiuiltiaj tlaltikpakchanejkej se Traducción del Nuevo Mundo tlen xnotlaxtlaua ijkuak tikomintlajpalouaj inchan manomachtikan itech Biblia. San ika, tla yakaj kineki nomachtis ika se Biblia tlen kipiya, xtlaj tlenon.