Nochi ye̱kti tajto̱l wi̱ts de Jehová. Yéj se̱ Dios yej yo̱lpa̱ki, inó̱n iga, kineki iga nochi familias mayo̱lpa̱kikan (1 Timoteo 1:11). Dios kitsi̱ntij na̱miktilis. Wan yej mona̱miktiáj ken kijtowaj tekiwajmej kitsi̱ntiáj ye̱kti ina̱miktilis, wan iní̱n kichi̱wa iga te̱tajmej wan ipilowa̱n mayo̱lpa̱kikan wan mamonekikan. Yej kitajto̱lkakij Dios, kua̱ mona̱miktiáj yawij kan tekiwajmej iga makimakakan se̱ a̱maʼ yej kine̱xtiá iga na̱miktijtokej. Tajto̱lti Lucas 2:1, 4, 5.

¿Té̱ kineki Dios iga yej na̱miktijtokej? Dios kineki iga nike̱man mamokajte̱wakan. Jesús kijtoj: «Yej Dios kiseka̱ntij, amo makisosolo nise̱ ta̱gaʼ» (Mateo 19:6). Jehová kineki iga ta̱gaʼ wan siwa̱ yej na̱miktijtokej amo mamokajkaya̱wakan (Hebreos 13:4). Jehová kijiya iga mamokajte̱wakan legalmente (Malaquías 2:16). Pero Jehová kikajte̱wa iga mamokajte̱wakan legalmente wan welij mamona̱mikti̱kan seuʼ biáj, si yej iwan na̱miktitoʼ mote̱ka wan seuʼ (Mateo 19:3-5). Jesús kijtoj: «Yej kikajte̱wa legalmente isiwa̱, siga ayéj iga mote̱kaʼ wan seuʼ, wan mona̱miktiá wan seuʼ siwa̱, kichi̱wa adulterio» (Mateo 19:9).

Jehová kichij ta̱gaʼ wan siwa̱ iga mamosenpale̱wi̱kan pan na̱miktilis (Génesis 2:18). Tawi̱kal yéj yej tayaka̱na pan icha̱n, inó̱n iga, moneki iga makimaka takual, tsotsol wan kan mamocha̱nti̱kan, wan no̱ moneki makine̱xtili de Dios ifamiliaj. Kine̱xtiá iga kineki isiwa̱, kua̱ kikajte̱wa sekin tejté̱ yej yéj kineki makichi̱wa iga makipale̱wi isiwa̱. Moneki iga ta̱gaʼ wan siwa̱ yej na̱miktijtokej, mamonekikan wan mamoye̱wi̱gakan. Wan iga, niágaj ayéj perfecto, moneki iga makelka̱wakan tejté̱ yej aye̱kti yej kichi̱waj, siga ijkó̱n kichi̱waj yawij yo̱lpa̱kitij. Pan Biblia kijtowa: «Sejse̱ de anmejeme̱n makineki isiwa̱ kensan yéj moneki, wan no̱ siwa̱ puxsan makiye̱ʼita itawi̱kal» (Efesios 5:33). Tajto̱lti Efesios 4:31, 32; 5:22-25 wan 1 Pedro 3:7.

Siga ta̱gaʼ wan siwa̱ mokuejkuesowaj pan ina̱miktilis, moneki mamotekitili̱kan iga mamoye̱no̱tsakan wan mamonekikan (1 Corintios 13:4, 5). Itajto̱l Dios ayá̱ kijtowa iga onoʼ ye̱kti iga mamokajte̱wakan yej na̱miktijtokej, kua̱ mokuejkuesowaj o ayá̱ moye̱wi̱gaj. Tajto̱lti 1 Corintios 7:10-13.

Jehová kineki iga te̱pilowa̱n mayo̱lpa̱kikan. Inó̱n iga, yéj kine̱xtiliá kén mayo̱lpa̱kikan kua̱ chokomej. Dios kineki iga te̱pilowa̱n makichi̱wakan ken itajmej kine̱xtiliáj, iga te̱tajmej kipiáj ma̱j tamatilis ke yejeme̱n (Colosenses 3:20). Jehová kineki iga te̱pilowa̱n mayo̱lpa̱kikan kua̱ tekipanowaj iga yéj wan iga ipiltsi̱n. Pan Biblia kijtowa: «Inó̱n iga xikejla̱miki Moweyi Dios yej mitschij, a̱man iga tichogo» (Eclesiastés 12:1). Tajto̱lti Eclesiastés 11:9, 10; Mateo 19:13-15, wan 21:15, 16.

Te̱tajmej moneki xitekipano̱kan iga xikmakakan anmopilowa̱n takual, tsotsol wan ka̱n mamocha̱nti̱kan (1 Timoteo 5:8). Pero iga mayo̱lpa̱kikan mopilowa̱n, moneki xikne̱xtili̱kan kén makinekikan Dios, wan makichi̱wakan yej yéj kineki (Efesios 6:4). Kua̱ mopilowa̱n kitaj iga anmejeme̱n ankinekij Dios, iní̱n kichi̱wa iga yejeme̱n no̱ makinekikan Dios. Kua̱ anmejeme̱n ken te̱tajmej, ankimachtiáj mopilowa̱n ken kijtowa Itajto̱l Dios, ankipale̱wiáj iga makipiakan se̱ ye̱kti tajla̱mikilis. Pan Biblia kijtowa: «Xikne̱xtili iojti chokotsi̱n, ijkó̱n kua̱ mawewejtiá akikajte̱was iní̱n ojti» (Proverbios 22:6). Tajto̱lti Deuteronomio 6:4-7.

Kua̱ mopilowa̱n kichi̱waj se̱ tejté̱ ye̱kti, moneki iga xikyo̱lketsakan wan xikijli̱kan iga kichijkej ye̱kti. Sekin biáj moneki iga xikno̱no̱tsakan wan xikmagakan (o achi xikwitegigan) mopilowa̱n, iga amo makichi̱wakan yej aye̱kti (Proverbios 22: 15). Te̱tajmej amo puxsan xikmagakan mopilowa̱n, amo nochipa xikajajwatokan wan nike̱man xikyokamagakan. Pan Biblia kijtowa: «Te̱tajmej, amo xikajajwatokan mopilowa̱n» (Colosenses 3:21).

Yej tajto̱lmoya̱waj de Jehová kipiáj miak libros, yej moijkuiloj iga makipale̱wi̱kan te̱tajmej wan ipilowa̱n. Nochi iní̱n moki̱xtij pan Itajto̱l Dios. Tajto̱lti Salmo 19:7, 11.