“Ne mau a maua mo Sophia a ke molea e 39 e tau ato mate a ia he leva e gagao. Lahi e lagomatai mai he tau kapitiga mo e lavelave tumau au. Ka e he taha e tau katoa, ne logona hifo e au e mavehe ua. Ne hake hifo e tau logonaaga haaku, mo e hikihiki tumau. Pete kua teitei tolu e tau he mole e mate a ia, ne momoko lahi agaia au he falu magaaho, mo e amanaki ni ti tupu ai.”​—Kostas.

Kua fai fakahele nakai a koe ne kua mate? Ka fai, to liga maama e koe e tau talahauaga ha Kosta. Mua atu e fakaatukehe mo e loto malipilipi he mate e hoa mau, tagata he magafaoa, po ke kapitiga fakahele. Ti talia foki he tau pulotu ne kumikumi ke he momoko lahi ne tupu mai he maanu. Ko e vala tala ne tohi he The American Journal of Psychiatry ne pehē “ko e mate ko e galo ne tumau ni mo e mua atu e momoko.” He fehagai mo e momoko lahi mahaki pihia he galo e fakahele, liga manamanatu a ia ne maanu: ‘To fiha la e leva he tau logonaaga nei? To liu foki nakai au ke fiafia? Maeke fēfē au ke moua e fakatotoka?’

Ko e tau tali ke he tau hūhū ia to fakatutala he fufuta nei he Ala! Ko e vala tala ka mui mai to fakatutala ke he tau mena ka liga feleveia mo koe he mate laia e fakahele haau. He tau vala tala ka mumui mai to fakamaama e tau puhala ka lagomatai a koe ke fakatotoka he maanu.

Amanaki lahi a mautolu ko e tau vala tala nei ka fakamafanatia mo e lagomatai ha tagata ne fehagai mo e momoko lahi he maanu.