Tala Mooli Hagaao ke he Atua mo e Keriso

TĀ

Pete kua loga e atua ne tapuaki e tau tagata ki ai, tokotaha ni e Atua mooli. (Ioane 17:3) Ko ia “ne Mua ue atu,” ko e Tufuga he tau mena oti kana mo e Punaaga he moui. Ko ia ni tokotaha kua lata a tautolu ke tapuaki ki ai.—Tanielu 7:18; Fakakiteaga 4:11.

Ko Hai e Atua?

Kitia e higoa he Atua he vagahau fakamua KAVI KE HE 7,000

IEHOVA ko e higoa he Atua

IKI, ATUA, MATUA—Falu matahigoa ha Iehova

Ko Hai e Higoa he Atua? Pehē e Atua: “Ko au ko Iehova, ko e haku a higoa haia.” (Isaia 42:8) Ko e higoa he Atua ne kitia kavi ke laga 7,000 i loto he Tohi Tapu. Ka kua loga e fakaliliuaga he Tohi Tapu ne nakai hako he hukui e higoa nei aki e matahigoa, tuga e “Iki.” Manako e Atua ki a koe ke eke mo kapitiga haana, ti fakamafana e ia a koe “kia ui atu ā ke he hana higoa.”—Salamo 105:1.

Tau Matahigoa ha Iehova. Hagaao e Tohi Tapu ki a Iehova he tau matahigoa tuga e “Atua,” “Malolō Ue Atu,” “Tufuga,” “Matua,” “Iki,” mo e “Pule.” Loga e liogi ne fakamau he Tohi Tapu ne hagaao ki a Iehova he fakaaoga e matahigoa lilifu mo e higoa haana ko Iehova.—Tanielu 9:4.

Tuaga he Atua. Ko e Atua ko e agaaga ni a ia. (Ioane 4:24) Fakakite mai he Tohi Tapu kua “nakai fakai ni taha [ke] kitia e Atua.” (Ioane 1:18) Talahau he Tohi Tapu e tau logonaaga haana. Ti maeke e tau tagata ke fakahukia, po ke taute a ia ke “fiafia.”—Tau Fakatai 11:20; Salamo 78:40, 41.

Tau Aga Homo Ue Atu he Atua. Nakai fakamailoga he Atua e tau tagata he tau motu oti kana mo e tau tutupu maiaga. (Gahua 10:34, 35) Ko Ia foki kua “fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli.” (Esoto 34:6, 7) Ka e fā e aga he Atua kua mitaki pauaki.

Malolō. Ha ko ia ko e “Atua mana [Malolō Ue Atu],” ne malolō katoatoa a ia ke fakamooli e tau maveheaga oti haana.—Kenese 17:1.

Iloilo. Mua ue atu e iloilo he Atua ke he ha tagata. Kakano haia ne pehē e Tohi Tapu ko Ia kua “iloilo ne tokotaha.”—Roma 16:27.

Fakafili Tonu. Taute tumau he Atua e tau mena hako. Ko e tau gahua haana kua “katoatoa ni e mitaki,” ti “tonu hana tau puhala oti.”—Teutaronome 32:4.

Fakaalofa. Pehē mai e Tohi Tapu “ko e Atua ko e fakaalofa.” (1 Ioane 4:8) Fakakite he Atua e fakaalofa, mo e ko e fakaalofa a ia. Ko e fakaalofa mua ue atu kua omoomoi e tau gahua oti haana, ti loga e puhala kua aoga ki a tautolu.

Fakafetuiaga he Atua mo e Tau Tagata. Ko e Atua ko e ha tautolu a Matua fakaalofa he lagi. (Mataio 6:9) Ka tua a tautolu ki a ia, maeke a tautolu ke eke mo tau kapitiga haana. (Salamo 25:14) Uiina he Atua a koe ke fakatata ki a ia he liogi mo e “tuku atu kia ia e tau mena oti kua fakaatukehe ai . . . ha ko e mena kua manatu e ia a [koe].”—1 Peteru 5:7; Iakopo 4:8.

Ko e Heigoa e Kehekehe he Atua mo e Keriso?

Nakai ko e Atua a Iesu. Kehe pauaki a Iesu—ko ia ni hokoia ne tufugatia he Atua. Kakano ia ati fakahigoa he Tohi Tapu a ia ko e Tama he Atua. (Ioane 1:14) He mole e tufugatia a Iesu, fakaaoga e Iehova e tama uluaki haana mo “tufuga” ne mua he eke e tau mena oti kana mo e tau tagata.—Tau Fakatai 8:30, 31; Kolose 1:15, 16.

Nakai talahau e Iesu Keriso ko e Atua a ia. Ka e fakamaama e ia: “Ko e mena hau au ia ia [Atua] ni; ko ia foki ne fakafano mai au.” (Ioane 7:29) Magaaho ne tutala a Iesu ke he taha he tau tutaki haana ne ui e Iesu a Iehova ko e “haku a Matua mo e Matua ha mutolu” mo e “haku a Atua mo e ha mutolu Atua.” (Ioane 20:17) He mole e mate ha Iesu, fakaliu tu hake e Iehova a ia ke moui he lagi mo e lahi e pule ne tuku age ki a ia he lima matau Haana.—Mataio 28:18; Gahua 2:32, 33.

Maeke a Iesu Keriso ke Lagomatai a Koe ke Fakatata ke he Atua

Hau a Iesu ke he lalolagi ke fakaako ki a tautolu hagaao ke he Matua haana. Pehē a Iehova hagaao ki a Iesu: “Ko e haku a Tama fakahele hanā, kia fanogonogo a a mutolu kia ia.” (Mareko 9:7) Ko Iesu ni tokotaha ne iloa mitaki e Atua. Pehē a ia: “Nakai iloa foki e taha e Matua, ko e Tama hokoia, mo e tagata kua loto e Tama ke fakakite atu ki ai.”—Luka 10:22.

Mitaki katoatoa e puhala ne fakakite e Iesu e tau aga he Atua. Fifitaki mooli e Iesu e tau aga he Matua haana ti maeke a ia ke pehē: “Ko ia kua kitia au, kua kitia foki e ia e Matua.” (Ioane 14:9) Ne futiaki mai e Iesu e tau tagata ke he Atua he fakakite e fakaalofa he haana Matua ke he tau kupu mo e tau gahua. Pehē a ia: “Ko au nai ko e puhala, mo e kupu moli, mo e moui; nakai hau taha ke he Matua, ka noa mo au.” (Ioane 14:6) Pehē foki a ia: “Ko lautolu ne tapuaki fakamoli, to tapuaki a lautolu ke he Matua mo e agaga mo e fakamoli; ha ko e mena kumi e Matua kia pihia a lautolu ne tapuaki kia ia.” (Ioane 4:23) Manamanatu la ke he mena ia! Kua kumi a Iehova ke he tau tagata tuga a koe ne manako ke iloa e tala mooli hagaao ki a ia.