“HOLO e pasi ka e ai uta e tagata Saina!” Pihia e tala ne logona e Alexandra he nofo i loto he pasi, mo e fakatali ke o atu ke he taha motu ni i South America. Ne hū mai a ia he pasi ke kitia e mena ne tupu ti mailoga ko e fuata taane Saina kua taufetului ke vagahau Sepania he lali ke fakamaama e matematekelea haana ke he tagata ne leveki e tau katofia. Ha kua fano a Alexandra he fakapotopotoaga vagahau Saina he Tau Fakamoli a Iehova, ne foaki noa e ia ke lagomatai ke fakahokohoko.

Pehē e tagata Saina na fakaatā a ia ke nofo he motu ka kua kaihā he faoa e tau tohi fakamooli mo e tau tupe haana. He magaaho fakamua, ne nakai talia he tagata leveki e tala nei ti tuahā foki kua putoia a Alexandra he fefakafuaaki he tau tagata. Fakahiku ai, ne talia he tagata leveki e fakamaamaaga he tagata Saina, ka kua lata a ia ke totogi e fakahala he nakai hako e tau tohi fakamooli. He nakai fai tupe e tagata Saina, ne foaki e Alexandra ke age $20 ki a ia to totogi. Ne fakaaue lahi mahaki e tagata Saina ti pehē to molea e $20 ka totogi age e ia. Fakamaama e Alexandra kua nakai kumi palepale a ia; kua fiafia a ia ke lagomatai he manatu a ia ko e mena hako ke taute. Age e ia ke he tagata Saina falu tohi faka-Tohi Tapu ti fakamafana a ia ke fakaako e Tohi Tapu mo e Tau Fakamoli.

Kua mafanatia mooli ke logona e mahani fakamokoi ke he tau tagata kehe, ti nakai noa kua pihia foki e fakamokoi ne fakakite he tau tagata he tau lotu oti mo e tau tagata ne nakai fai lotu. To makai nakai a koe ke foaki e koe a koe he puhala lahi mahaki? Kua latatonu e hūhū ia ha kua pehē a Iesu: “Kua mua e monuina hana ke foaki atu, ke he monuina hana ke talia mai.” (Gahua 20:35) Kua mailoga mitaki foki fakasaiene ha kua moua he tau tagata kumikumi ko e mena mitaki e aga foaki ma haau. O mai la ke kitia e tau puhala ati pihia ai.

Fakakite he mena ne tupu ko e aga foaki mo e fiafia kua matutaki lahi. Tohi he aposetolo ko Paulo “kua fakaalofa e Atua kia ia kua foaki mo e fakamakai.” Ne tutala a ia hagaao ke he tau Kerisiano ne lahi e mena fakaalofa ke lagomatai e tuaga uka he tau matakainaga. (2 Korinito 8:4; 9:7) Nakai pehē a Paulo kua foaki e lautolu kakano kua fiafia. Ka ko e manatu mooli, kua fiafia a lautolu kakano kua maeke a lautolu ke foaki.

Mooli ai, hagaao ke he taha kumikumiaga, ko e aga foaki kua “fakagahuahua e tau vala he uho ulu ne matutaki mo e fiafia, fakafetuiaga fakalataha, mo e falanaki, ti fakatupu mai e lauiaaga ‘mafanatia’ hokulo lahi.” Taha kumikumiaga foki ne moua “ko e age e tupe ke he taha tagata kua fakamalagaki e fiafia lahi mahaki he tagata ne age he nakai fakaaoga ni e ia ki a ia.”

Kua fa logona hifo nakai e koe ha ko e tuaga haau ati nakai lahi e mena haau ka taute? Ko e tala mooli na maeke e tau tagata oti ke logona e fiafia he “foaki mo e fakamakai.” Ka foaki mo e manatu hako, nakai lata ke lahi e tupe. Taha he Tau Fakamoli a Iehova ne fakafano e fekau ke he matakau ne lolomi e mekasini nei mo e mena fakaalofa haana: “He tau tau loga kua mole ne nakai maeke au ke foaki fakalahi ka ko e tupe tote  ni ne fa tuku he Fale he Kautu.” Ka e matutaki e ia: “Lahi mahaki e mena kua foaki mai e Iehova ko e Atua ki a au ke fakatatai ke he mena kua foaki e au. . . . Fakaaue he fakamukamuka ati maeke au ke foaki e mena fakaalofa nei—kua mafanatia mooli ki a au.”

Ka kua nakai fakakaupā ni e aga foaki ke he tau tupe. Loga atu foki e puhala ke foaki.

Pehē e Tohi Tapu: “Ko e tagata totonu kua eke fakamitaki atu e ia a ia ni; ka ko e tagata favale kua fakamamahi e ia hana ni a tino.” (Tau Fakatai 11:17) Kua fakamokoi e tau tagata totonu, ti makai ke foaki e lautolu ha lautolu a tau magaaho, malolō, aga leveki, mo e loga atu foki. Kua aoga lahi ki a lautolu e puhala moui pihia, ti mua atu foki e fakamokoi pihia he mitaki ma e malolō tino ha lautolu.

Fakakite mai he tau kumikumiaga ko e tau tagata ne foaki noa ke lagomatai e falu kua gahoa e tau matulituli mo e tau mamahi he tino ti nakai lahi e fakaatukehe. Fa moua e lautolu ia e malolō tino mitaki. Ko e foaki fakamokoi kua fakaholo ki mua foki e malolō tino ha lautolu ne matematekelea ha ko e tau gagao hololoa, tuga e multiple sclerosis po ke HIV. Fakakite mai foki ko e tau tagata ne lali ke tiaki e hufia kelea ke he kava ne lagomatai e falu, kua tote hifo lahi e fakaatukehe mo e holo ki mua e tuaga ha lautolu ke nakai liu hufia kelea foki.

Ke he kakano ati pihia ai, kua talahau mai ko e “logonaaga fakaalofa noa, fakaalofa hofihofi mo e totonu kua fakatote e tau logonaaga kelea.” Ko e aga foaki kua maeke foki ke fakatote e tupetupe mo e toto tokoluga. Mo e tau tagata ne mamate e tau hoa kua moua e lautolu e fakatotoka mafiti mai he fakaatukehe ka foaki e lautolu e lagomatai ke he falu.

Moolioli e mena ia. Ko e aga foaki kua mitaki ma haau.

Fakamafana e Iesu e tau tutaki haana: “Kia foaki atu e mutolu, ti foaki mai ai kia mutolu; to foaki mai e lautolu ke he tapulu ha mutolu ko e fafatiaga mitaki, kua fofota mo e lulululu ai, ke puke mo e puā ki tua. Ha ko e fafati ke fafati atu ai e mutolu, to fafati mai ai kia mutolu.” (Luka 6:38) Ka foaki atu e koe, to liga makai e tau tagata ke loto fakaaue ke he fakamokoi haau ti fakamokoi foki a lautolu. Ko e aga foaki kua fakaholo ki mua e kaufakalataha mo e fekapitigaaki.

Ko e tau tagata kumikumi ne fakaako ke he tau fakafetuiaga he tau tagata ne mailoga ko e “tau tagata ne fakakite tumau e foaki fakalahi kua omoomoi e falu ke taute pihia.” Ko e “totou noa ke he tau aga totonu ofoofogia kua taute foki e tau tagata ke lahi atu e fakamokoi.” Ko e mena ia, hagaao ke he taha kumikumiaga, “igatia e tagata he matakau mo e maeke ke fakaohooho e tokogahoa po ke tokoteau he tau tagata, ko e falu ia lautolu ne nakai iloa po ke nakaila feleveia mo ia.” Kakano ai, ko e taha e aga fakamokoi kua maeke ke kamata ke omoomoi e taha tagata ke fakamokoi ke he taha tagata he matakavi katoa. Manako nakai a koe ke nofo he matakavi pihia? Ē, maeke ke loga e tau mena aoga ka moua ka tokologa e tagata kua aga foaki.

Fakakite mai he taha mena ne tupu e lauiaaga mitaki he mena nei  i Florida, U.S.A. Taha e matakau gahua foaki noa he Tau Fakamoli a Iehova ne makai ke lagomatai he mole e afā lahi. He fakatali a lautolu ke hoko mai e tau koloa ke fakafoou aki e fale ne gahua a lautolu ki ai, ne mailoga e lautolu kua malona e pā he taha he tau katofia ti foaki noa e lautolu ke fakafoou. “Nakai oti e fakaaue haaku,” he tohi atu he katofia ke he matapatu ofisa he Tau Fakamoli a Iehova he fai magaaho he mole. “Ko e tau tagata nei ko e falu he tau tagata kua mua atu e mitaki ne feleveia mo au.” Omoomoi he loto fakaaue haana a ia ke fakafano atu e mena fakaalofa lahi ke fakaaoga ke he mena ne fakahigoa e ia ko e matagahua ofoofogia he Tau Fakamooli.

Ko e mouaaga ofoofogia mai he kumikumiaga fakasaienetisi kua “tuga ko e fakavēaga he tagata ke fakamakamaka ke lagomatai e falu.” Pehē e kumikumiaga, ko e tau fanau ne “mahani fakamokoi lahi ato kamata a lautolu ke vagahau.” Ko e ha? Talahau he Tohi Tapu e tali he pehē ko e tau tagata kua tufugatia ke he “fakatai he Atua,” kakano ai, kua moua e lautolu e tau mahani faka-Atua pihia foki.—Kenese 1:27.

Ko e fakamokoi e taha aga homo ue atu he ha tautolu a Tufuga ko Iehova ko e Atua. Ko ia ne foaki mai ki a tautolu e moui mo e tau mena oti kua lata ke moua e tautolu e fiafia. (Gahua 14:17; 17:26-28) Maeke ia tautolu ke iloa e ha tautolu a Matua he lagi mo e haana finagalo fakaalofa ma tautolu he fakaako e haana Kupu, ko e Tohi Tapu. Fakakite mai foki he tohi ia na taute he Atua e tau foakiaga ke fiafia a tautolu anoiha. * (1 Ioane 4:9, 10) Ha ko Iehova ko e Atua ko e punaaga he fakamokoi mo e kua tufuga a koe ke he haana fakatai, kua nakai ofo ai ko e aga foaki—he fifitaki ke he Atua—to mitaki ma haau mo e moua e koe e taliaaga haana.—Heperu 13:16.

Manatu nakai e koe a Alexandra ne totoku he kamataaga he vala tala nei? Fakaoti fēfē e tala haana? Pete kua pehē e taha tagata ne fakatauō mo ia he pasi kua tolo e ia e tau tupe haana ke he vao, ka ko e tagata Saina ne lagomatai e ia ne matutaki ke he tau kapitiga haana he taone ne fina atu e pasi ke tū ai, ti kua totogi age mafiti e $20 ne kaitalofa e ia. Lafi ki ai, ne talia he tagata Saina e tomatomaaga ha Alexandra ti kamata ke fakaako e Tohi Tapu. Tolu e mahina he mole ne fiafia lahi a Alexandra ke liu feleveia mo ia he fonoaga he Tau Fakamoli a Iehova i Peru. Ke fakakite e loto fakaaue haana ke he tau mena oti ne taute e Alexandra ma haana, ne uiina e ia a Alexandra mo lautolu oti ne fenoga mo Alexandra ke he fonoaga ke o atu ke he fale kai haana.

Ko e aga foaki mo e lagomatai e falu kua tamai e fiafia lahi. Mua atu ka taute ai ti lagomatai e koe e tau tagata ke iloa mitaki e Punaaga he tau mena fakaalofa mitaki oti kana—ko Iehova ko e Atua! (Iakopo 1:17) Kua moua nakai e koe e tau fua mitaki he aga foaki pihia?