Manamanatu ke he taha he tau fakafetuiaga tata lahi he tau tagata​—ko e tau mahaga ne tatai. Kua tata lahi e pipiaga ha laua. Ko e falu mahaga “kua iloa e kakano he talahau taha mena ke he taha ti maama katoatoa ai ka e nakai lata ke fakamaama,” he talahau e Nancy Segal, ko e takitaki he Twin Studies Center ti ko e mahaga foki a ia. Taha e fifine ne fakamaama e fakafetuiaga haana mo e mahaga haana ne tatai, ke he puhala nei: “Na iloa oti e maua e tau mena hagaao ki a maua.”

Ko e heigoa ati tupu e femaamaaki uho nei? Talahau he tau kumikumiaga kua pihia ha ko e takatakaiaga mo e feaki fakamatua, ka e mua atu ko e fetataiaki e tau talagaaga (genes) he tau mahaga ne tatai kua aoga lahi.

MANAMANATU: Ko e Tufuga he talagaaga ofoofogia nei kua maama mooli e puhala ne tufugatia a tautolu takitokotaha. Talahau ai he salamo ko Tavita: “Ne ufiufi e koe au ke he manava he haku a matua fifine. Kua nakai galo haku tino kia koe, ka kua eke au ke he mena galo. . . . Ne fioia he na fofoga hāu haku a tino oti ka e nakai la mau; kua tohi oti foki ke he hāu a tohi.” (Salamo 139:13, 15, 16) Ko e Atua ni tokotaha ne iloa mo e maama katoatoa e talagaaga ha tautolu mo e tau mena oti ne tutupu he tau momoui ha tautolu ati pihia e tau aga ha tautolu. Ko e iloaaga uho he Atua ki a tautolu mo e talagaaga ha tautolu ti mafanatia a tautolu kua maama katoatoa e ia a tautolu.

Ne liogi a Tavita: “Iehova na e, kua kumikumi e koe au, ti kua fioia ni e koe au. Ko koe ni kua fioia haku a nofo ki lalo mo e haku a tu mai ki luga; kua fioia fakamamao e koe haku a manamanatu. Nakai fakai ha kupu ke he gutu haku, kitiala, Iehova na e kua fioia fakaoti ai e koe.” (Salamo 139:1, 2, 4) Lafi ki ai, kua iloa e Iehova e tau logonaaga hokulo ha tautolu mo e “fioia foki e ia e tau fatuakiloto oti he tau manatu.” (1 Nofoaga he Tau Patuiki 28:9; 1 Samuela 16:6, 7) Ko e heigoa ne fakakite he tau kupu nei hagaao ke he Atua?

Pete he nakai talahau oti e tautolu e tau manatu mo e tau logonaaga ha tautolu ke he liogi, kua kitia he Tufuga e tau mena ne taute e tautolu mo e maama foki e kakano ne taute e tautolu. Maama foki e ia e tau mena mitaki ha tautolu kua manako ke taute, pete ka fai fakakaupāaga ti nakai maeke ke fakamooli e manako ha tautolu. Ha ko e Atua ne tuku e fakaalofa ke he tau loto ha tautolu, kua makai mo e fiafia foki a ia ke kitia mo e maama e manatu fakaalofa mo e tau fatuakiloto ha tautolu.​—1 Ioane 4:7-10.

 Fakamafana he Tohi Tapu a tautolu

• “Kua hagao e na fofoga he Iki [Iehova] ke he tau tagata tututonu, kua fanogonogo mai foki hana tau teliga ke he tau liogi ha lautolu.”​—1 PETERU 3:12.

• Mavehe mai he Atua: “To fakaako e au a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.”​—SALAMO 32:8.

He iloa na maama he Atua e tau tuaga mo e tau logonaaga ha tautolu, to lagomatai nakai ki a tautolu ke fakauka ke he tau mena vihi? Manamanatu ke he mena ne tupu ki a Anna, mai i Nigeria. “Fakauaua au na aoga nakai e moui ha ko e tuaga matematekelea lahi haaku,” he fakamaama e ia. “Ko e takape au ne leveki e tama fifine haaku he fale gagao ne moua he hydrocephalus (molea e lahi e vai he uhoulu), mo e kenesā foki e huhu haaku ti lata ke iihi, taute e chemotherapy, mo e radiotherapy. Uka lahi mahaki e tuaga haaku he nofo he fale gagao ka e gagao lahi haaku tama fifine.”

Ko e heigoa ne lagomatai a Anna ke fahia? “Manamanatu au ke he tau kupu Tohi Tapu tuga e Filipi 4:6, 7, ne pehē ‘ko e monuina [mafola] foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu.’ He tau magaaho oti ka manatu e au e kupu tohi nei, ne logona e au e tata lahi ki a Iehova he iloa kua maama mitaki e ia au ke he iloa e au a au. Lahi mahaki foki e fakamafana mai he tau matakainaga fakahele haaku i loto he fakapotopotoaga Kerisiano.

“Pete he taufetului agaia au mo e malolō tino, kua laukauka mai e tuaga haaku ti pihia mo e tama fifine. Ha ko Iehova mo tautolu, kua fakaako a tautolu ke ua manamanatu ke he tau mena kelea ka feleveia mo e tau tutūaga vihi. Fakamafana mai he Iakopo 5:11: ‘Kua talahau e tautolu kua monuina [fiafia] a lautolu kua fakauka; kua fanogonogo a mutolu ke he fakauka a Iopu, kua iloa foki e mutolu e fakahikuaga ha he Iki [Iehova], kua fakaalofa fakalahi mai e Iki [Iehova] mo e hofihofi noa.’” Maama moolioli e Iehova e tuaga ha Iopu ti maeke foki a tautolu ke mauokafua kua maama e Ia e tau tutūaga vihi ne fehagai mo tautolu.