Nakai fili tagata e Atua ti manako ke fakamonuina e tau tagata oti kana.

Mavehe e Atua ki a Aperahamo “to monuina foki ia koe e tau faoa oti ni he lalolagi.”​—Kenese 12:3.

Ko e heigoa kua fakaako e tautolu? Fakaalofa lahi mahaki e Atua ki a tautolu ti manako ke fakamonuina e tau magafaoa oti kana​—tau tagata taane, tau fifine, mo e tau fanau kua omaoma ki a ia.

Fakaalofa hofihofi noa ti fakamonuina he Atua a lautolu ne lali lahi ke iloa a ia.

Foaki he Atua Malolō Ue Atu ke he perofeta ko Mose e malolō ke taute e tau mana lalahi. Ka e liogi a Mose: “Kia fakailoa mai e koe kia au hau a puhala, kia iloa ai e au a koe, kia ofania ai e koe au.” (Esoto 33:13) Talia he Atua e ole ha Mose ti fakamonuina a ia he foaki age fakalahi e lotomatala mo e maama ke he tau puhala mo e tau aga Haana. Ma e fakatai, iloa e Mose ko e Tufuga “ko e Atua fakaalofa hofihofi, mo e fakaalofa noa.”​—Esoto 34:6, 7.

Ko e heigoa kua fakaako e tautolu? Manako e Atua ke fakamouina a tautolu oti kana​—tau tagata taane, tau fifine, mo e tau fanau kaeke kua eketaha a tautolu ke iloa mitaki a ia. Fakakite mai e ia he tau Tohiaga Tapu e puhala ke tapuaki a tautolu ki a ia ti makai a ia ke foaki ki a tautolu haana a taliaaga mo e fakamonuina.

Moua e tautolu e tau monuina tukulagi he Atua kaeke ke fakaako a tautolu hagaao ki a Iesu mo e tau gahua mo e tau fakaakoaga haana.

Ha ha he Kupu he Atua e tau vala tala loga lahi ke he moui mo e tau fakaakoaga ha Iesu. Age he Atua e malolō ki a Iesu ke taute e tau mana loga lalahi, tuga e fakamaulu e tau matapouli, teligatuli, mo e kulikuli. Liu fakatu mai foki e ia e tau tagata ne mamate. Fakakite e Iesu e tau monuina ka tamai he Atua ke he tau tagata oti kana he vahā i mua. Fakamaama e ia e puhala ka moua e tautolu oti e tau monuina ia: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”​—Ioane 17:3.

Fakaalofa hofihofi noa, fakaalofa hohofi, mo e totonu a Iesu. Ko e tau tagata taane, tau fifine, tau fanau mo e tau fuakau ne o mai ki a Iesu ha ko e uiina mafanatia haana: “Fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu.” (Mataio 11:29) Nakai tuga falu tagata he vahā ha Iesu ne nakai taute fakamitaki e tau fifine, ka ko Iesu ne totonu, nava, mo e fakalilifu e tau fifine.

Ko e heigoa kua fakaako e tautolu? Fakakite e Iesu e fakaalofa lahi mahaki ke he tau tagata, ti fakatoka e ia e fakafifitakiaga uho lahi ke he puhala kua lata a tautolu ke taute ke he falu tagata.

Fakaako he tau Tohiaga Tapu “ha ha ia tautolu e Atua tokotaha ni” ti ko Iesu Keriso e utafekau fakatokolalo he Atua. (1 Korinito 8:6) Talahau fakamaaliali e Iesu kua tokoluga mua ue atu e Atua ki a ia ti ko e Atua ne fakafano mai a ia ke he lalolagi.​—Ioane 11:41, 42; 14:28. *