Tali mai he tufugatia e tau tagata, ko e ha tautolu a Tufuga kua matutaki mo e tau tagata puhala he tau agelu mo e tau perofeta. Lafi ki ai, fifili a ia ke tohi hifo haana a tau fekau mo e tau monuina ne mavehe. Ko e tau maveheaga nei mai he Atua kua lauia e vahā i mua haau. Ti moua e koe i fe he vahā nei e tau maveheaga he Atua?

Ko e fekau he Atua ki a tautolu kua moua i loto he tau Tohiaga Tapu. (2 Timoteo 3:16) Fakaaoga fēfē he Atua e tau perofeta ke tohi hifo e fekau haana? (2 Peteru 1:21) Tuku he Atua e tau manatu haana ke he tau loto he tau tagata tohia ke maeke a lautolu ke fakamau hifo. Pihia foki he vahā nei. Ka fakaaoga he tagata pisinisi e tohikupu ke fakamau hifo e fekau, to talia agaia e tautolu ko e tagata pisinisi ne tohia e fekau. Pete he fakaaoga he Atua e tau tagata taane ke fakamau e fekau haana, ko e Atua ne tohia e tau Tohiaga Tapu.

Uho lahi e fekau he Atua ti manako a ia ke he tau tagata oti ke totou mo e maama ai. He vahā nei ko e “vagahau [tala] mitaki tukulagi” haana kua moua fakalaulahi ke he “tau motu kehe oti, mo e tau magafaoa, mo e tau vagahau kehekehe.” (Fakakiteaga 14:6) Ha ko e fakamonuinaaga he Atua, kua moua e tau Tohiaga Tapu he tohi katoa po ke vala ke molea e 3,000 he tau vagahau, kua mua atu e loga ke he tau tohi he lalolagi katoa.