Tau Hūhū he Tau Tagata Totou
Tamate kia he tau Isaraela e tau tagata kolokolovao he tautau i luga he tau pou?
Loga e motu he tau vahā i tuai ne tamate e tau tagata kolokolovao he tautau hake he pou po ke akau. Ko e tau Roma ne pipi po ke pao fao hake e tagata pihia ke he pou ke tamate ai, ti moui a ia ke fai aho gahoa ato logona e ia e mamahi, fia inu, hoge, mo e fakatapakupaku ke he matagi mo e laā. Ne onoono e tau Roma ke he fakatautau ko e fakahala fakamā ke lata mo e tau tagata kolokolovao kelea muitui.
Ka e kua e motu ko Isaraela i tuai? Tamate nakai he tau Isaraela e tau tagata kolokolovao he fakatautau a lautolu he tau pou? Ne poaki he Fakatufono faka-Mose: “Kaeke foki kua hala he tagata ke lata ke mate ai a ia, ka hoko kia ia e mate, kua fakatautau e koe a ia ke he akau; Aua neke ahogia hana tino ke he akau, ka kia tanu ni a ia ke he aho ia.” (Teu. 21:22, 23) Ko e mena ia, kua maaliali ai he magahala he tau Tohiaga Tapu Heperu, ko e tagata ka fakahala mate ne tamate mua ai ti tautau hake he pou po ke akau.
Ke he mena nei, pehē e Levitika 20:2: “Kaeke ke ta atu ai he tagata hana fanau kia Moloka, po ke tagata he fanau a Isaraela, po ke tagata kehe kua nofo i Isaraela; to kelipopo ni a ia; to pinimaka he tau tagata he motu a ia ke he tau maka.” Ko lautolu ne ha ha e “agaga talahau tuai” ne lata foki ke kelipopo. Puhala fē? He “pinimaka e lautolu a lautolu ke he tau maka.”—Levi. 20:27.
He Teutaronome 22:23, 24, totou e tautolu: “Kaeke ke [ha] i ai ha tama fifine ko e tamafine . . . kua fakatutane, ti moua he taha tagata a ia ke he maga, mo e mohe mo ia; Ti uta e mutolu a laua ke he gutuhala he maga na, mo e pinimaka ai a laua ke mamate; ko e tama fifine, he nakai fakatutu ai a ia ke he maga; ko e tane foki ha kua fakakelea ai e ia e hoana he tagata ne katofia mo ia; ti tuku kehe ai e kelea ia koe.” Ke he tau Isaraela fakamua, ko e pinimaka ko e puhala ke tamate aki a lautolu ne fakahala ha ko e agahala kelea muitui ne taute. a
Maaliali ai, he magahala he tau Tohiaga Tapu Heperu, ko e tagata ka fakahala mate ne tamate mua ai ti tautau hake he pou po ke akau
He Teutaronome 21:23 ne pehē “ha kua ulāfia he Atua a lautolu oti kua fakatautau.” Ko e fakaaliali ke kitia he toloaga e tagata kelea ne “kua ulāfia he Atua,” to lauia mooli ai e tau Isaraela. Ko e tautau hake e tino he tagata ia ne tamate he pou po ke akau, kua eke ai mo hatakiaga ke he falu.
a Tokologa e tau tagata pulotu ne talia i lalo he Fakatufono, kua tamate e tagata kolokolovao ato tautau haana tino he pou. Ka e fai fakamooliaga he senetenari fakamua, ko e falu tagata kolokolovao ne fakatautau moui he tau lutaia ti mamate he pou.
