Ko e Mena ne Ako e Tautolu Mai ia Iesu

Puhala ke Moua e Fiafia

Ko e heigoa e kei ke he fiafia?

▪ Ne totoku e Iesu e fiafia he tau kupu fakamua he lauga mahuiga haana he mouga. Ne pehē a ia: “Fiafia a lautolu ne manamanatu ke he tau mena fakaagaaga kua lata ma lautolu.” (Mataio 5:3, NW) Ko e heigoa e kakano haana? Ko e heigoa e tau mena fakaagaaga kua lata mo tautolu?

Ke moui, kua lata ia tautolu ke fafagu, inu, mo e kai, tuga ni ne taute he tau manu. Ka ke fiafia, ha ha ia tautolu e mena kua lata ne nakai moua he tau manu—ko e lata ke maama e kakano he moui. Ko e Tufuga ni he moui kua maeke ke fakapuke e mena ia kua lata. Ati pehē a Iesu: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mataio 4:4) Ko lautolu ne manamanatu ke he tau mena fakaagaaga ha lautolu kua fiafia ha kua fakatata atu a lautolu ki a Iehova, ko e ‘Atua fiafia,’ mo e foaki e ia ki a lautolu taha mena aoga ma e fiafia—ko e amaamanakiaga.—1 Timoteo 1:11.

Foaki fēfē e Iesu e amaamanakiaga?

▪ “Uhoaki [po ke, fiafia] a lautolu ne mahani molu; ha ko e mena to eke ma lautolu e motu,” he talahau e Iesu. (Mataio 5:5) Ne foaki e Iesu e amaamanakiaga ke he tau tagata he fakamalolō e tau tagata gagao mo e fakatūtū mai e tau tagata mamate ke momoui he lalolagi. Ne hau foki a ia mo e fekau he amaamanakiaga. Ne fakamaama e ia: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ko e tau tagata ne omaoma ke he Atua to olioli e moui tukulagi he lalolagi. Maeke nakai a koe ke manamanatu kua nofo a koe mo lautolu ne loto molū ti nakai fuakau? Kakano ia ati pehē e Kupu he Atua: “Kia fiafia ke he amaamanaki.” (Roma 12:12) Ne fakatutala foki a Iesu ke he puhala ke moua e fiafia mogonei.

 Ko e heigoa e puhala moui fiafia ne fakaako e Iesu?

▪ Ne foaki e Iesu e fakatonuaga aoga ke he tau mena tuga e tau fakafetuiaga fakatagata, fakamauaga, mahani fakatokolalo, mo e onoonoaga kua lata ke he tau koloa fakatino. (Mataio 5:21-32; 6:1-5, 19-34) He muitua ke he tomatomaaga ha Iesu ka lagomatai a koe ke moua e fiafia.

Tamai he mahani fakamokoi e fiafia. (Gahua 20:35) Ma e fakatai, ne pehē a Iesu: “Ka taute e koe e kaiaga mena, ati ui a e koe ke he tau nonofogati, mo e tau kunekune, mo e tau kulikuli, mo e tau matapouli; ti monuina [po ke, fiafia] ai a koe, ha ko e mena nakai maeke ia lautolu ke taui mai kia koe.” (Luka 14:13, 14) Ko e fiafia, kua nakai moua e lautolu ne kumi ni ma lautolu, ka e ki a lautolu ne kumi ai ma e falu.

Ko e heigoa e punaaga lahi mahaki he fiafia?

▪ He taute e tau mena ma e falu tagata ka fakafiafia a koe, ka e ka taute e tau mena ma e Atua to fakafiafia lahi a koe. Ko e fiafia foki he tau matua matalahi ne ofania e fanau ha lautolu kua nakai maeke ke fakatatai ki ai. Kua kitia maaliali ai mai he mena ne tupu he taha magaaho ne fakaako atu a Iesu ke he tau tagata. “Ti ui fakalahi mai ai e taha fifine mai he moto tagata, kua pehe kia ia, Uhoaki [po ke, fiafia] e manava ne fanau mai ai a koe, mo e tau huhu foki ne kai e koe. Ka e tala age a ia, Ko e moli; ka e mua e monuina [po ke, fiafia] he tau tagata ka fanogonogo ke he kupu he Atua mo e omaoma ki ai.”—Luka 11:27, 28.

Ne moua e Iesu e mauokafua mo e fiafia he taute e finagalo he haana Matua he lagi. Ko e finagalo he Atua ke logona he tau tagata e amaamanakiaga ke he moui tukulagi. Lagataha, he mole e fakamaama e amaamanakiaga nei ke he taha tagata fanogonogo, ne pehē a Iesu: “Ko e haku a mena kai hanei, kia eke e au e finagalo hana ne fakafano mai au.” (Ioane 4:13, 14, 34) Maeke foki ia koe ke iloa e fiafia he taute taha mena ne fakafiafia e Atua he fakamatala e kupu mooli he Tohi Tapu ke he falu.

Ma e falu vala tala foki, kikite e veveheaga 1 he tohi nei, Ko e Heigoa ne Fakaako Moli He Tohi Tapu? ne tohi fakailoa he Tau Fakamoli a Iehova.

[Fakatino he lau 16]

Kua moua e fiafia mooli he fakamakona ha tautolu a mena kua lata ke maama e kakano he moui