Ko e liogi kia ko e vala he moui haau? Pihia ma e tau tagata tokologa, putoia foki a lautolu ne nakai talitonu ke he Atua. Ka ko e ha ne liogi e tau tagata? Hagaao ke he kumikumiaga i Falani, hafa he puke tagata Falani ne liogi po ke manamanatu fakahokulo he falu magaaho “ke moua e logonaaga mitaki.” Tuga e tokologa he tau tagata Europa, ne nakai liogi a lautolu ha ko e kakano fakalotu. Ka kua kumi a lautolu ke he “tau lauiaaga fakatotoka he liogi.” He taha faahi, ne kumi atu falu ne talitonu ke he Atua he tau magaaho matematekelea ni, ti amanaki ke moua vave e tau tali ke he tau ole ha lautolu.​​—⁠Isaia 26:16.

Ka e kua a koe fakatagata? Manatu nakai a koe ko e liogi ko e puhala noa ni ke fakatokatoka aki haau a tau manatu? Ka talitonu a koe ke he Atua, kua kitia nakai e koe he moui haau e tau lauiaaga he liogi? Po ke ki a koe ne tuga kua nakai tali e tau liogi haau? Maeke e Tohi Tapu ke lagomatai a koe ke onoono ke he liogi, nakai ke moua e logonaaga mitaki, ka ko e puhala uho ke fakatata atu ke he Atua.