Manamanatu la ke he matua taane ne tutala mo e tama taane haana ne fitu e tau he moui. Pehē a ia, “He vahā ia kua leva lahi mahaki, ne tufuga he Atua e fua lalolagi mo e tau mena oti kana ne ha ha i ai, ti tufuga e ia e laā, mahina, mo e tau fetū.” Fai magaaho ne manamanatu e tama taane ke he mena nei ti hūhū, “Tete, ko hai ne tufuga e Atua?”

“Ai fai tagata ne tufuga e Atua,” he tali he matua taane. “Na fai Atua tumau ni tali mai.” Ne fiafia e tama ke he talahauaga mukamuka ia he mogonei. Ka e he lahi hake a ia, ne matutaki a ia ke manamanatu ke he hūhū ia. Ne uka a ia ke maama ko e maeke fēfē ha tagata ke nakai fai kamataaga. Na fai kamataaga foki e lagi mo e lalolagi katoatoa. ‘Tupu mai i fe e Atua?’ he manatu e ia.

Tali fēfē he Tohi Tapu? Tuga ni e tali he matua taane he fakatai ha tautolu. Ne tohi e Mose: “Ko e Iki [Iehova] na e, . . . ko e vaha nakala fanau ai e tau mouga, nakala eke foki e koe e lalolagi mo e atu motu, ko e Atua a koe mai i tuai tigahau, to hoko ke he tukulagi.” (Salamo 90:1, 2) Pihia foki ni he talahau he perofeta ko Isaia: “Nakai kia iloa e koe? Nakai kia logona e koe? Ko e Atua tukulagi, ko Iehova ko ia ne eke e tau motuaga he lalolagi”! (Isaia 40:28) Pihia foki, ne hagaao e tohi ha Iuta ke he Atua kua ha ha he “vaha nai katoa mo e tukulagi.”​—Iuta 25.

Kua fakakite mai he tau kupu tohi ia ki a tautolu ko e Atua ko e “Patuiki tukulagi,” tuga he fakamaama he aposetolo ko Paulo hagaao ki ai. (1 Timoteo 1:17) Kakano e mena nei kua ha ha tumau ni e Atua, pete ko e loa fēfē ka onoono a tautolu ki tua. Mo e to ha ha tumau ni a ia anoiha. (Fakakiteaga 1:8) Ti ko e ha ha i ai tukulagi tukumuitea e Atua ko e vala uho he Malolō Ue Atu.

Ko e ha ne uka ia tautolu ke maama e manatu nei? Ha kua fakakaupā e tau tau moui ha tautolu ti kehe mamao e maamaaga ha tautolu ke he magaaho ka fakatatai ke he ha Iehova. Ha kua tukulagi tukumuitea e Atua, ki a ia ko e afe he tau tau kua tuga ne aho taha. (2 Peteru 3:8) Ke fakatai: Maeke nakai e hē, he mogo ne lahi ai ne 50 ni e aho he moui, ke maama e tau tau moui ha tautolu ko e 70 po ke 80? Ai maeke! Ka e fakamaama he Tohi Tapu kua tuga e tau hē a tautolu ka fakatatai ke he ha tautolu a Tufuga Homo Ue Atu. Kua temotemoai foki e lotomatala ha tautolu ke manamanatu ke he ha Iehova. (Isaia 40:22; 55:8, 9) Ti nakai ofo ha kua ha ha ai e tau vala he aga ha Iehova ne nakai maeke e tagata ke maama katoatoa.

Pete kua uka ke maama e talahauaga he Atua tukulagi, ka kua maeke ia tautolu ke kitia e kakano mitaki. Ane fai tagata ne tufugatia e Atua, ko e Tufuga e tagata ia. Ka kua fakamaama he Tohi Tapu, ko Iehova ne ‘eke e tau mena oti.’ (Fakakiteaga 4:11) Lafi ki ai, na iloa e tautolu kua nakai fai lagi mo e lalolagi katoatoa he taha magaaho. (Kenese 1:1, 2) Puna mai ai i fe? Kua lata ni ke fai Tufuga fakamua. Ne ha ha i ai foki a ia ato fai mena momoui lotomatala, tuga e Tama fuataha haana mo e tau agelu. (Iopu 38:4, 7; Kolose 1:15) Maaliali ai mogoia, ne ha ha tokotaha a ia fakamua. Ane mai nakai tufugatia a ia; nakai fai mena momoui ka tufugatia a ia.

Ha kua momoui a tautolu mo e ha ha i ai e lagi mo e lalolagi katoatoa nukua fakakite na ha ha i ai e Atua tukulagi. Ko Ia ne tufuga e lagi mo e lalolagi katoatoa, ko Ia ne fakatū e tau fakatufono ke puipui aki, nukua ha ha i ai tumau. Ko ia tokotaha maka ne maeke ke fafagu e moui ke he tau mena oti kana.​—Iopu 33:4.