To fakaatā nakai he Atua e tau tagata ke pule kelea mo e fakakelea e vahā anoiha he tagata? Nakai, tuga he kitia e tautolu, to fakaoti e ia e matematekelea mo e tau pehiaaga ne kua hoko ke he loga e tau senetenari. Ko e Tufuga he tau tagata mo e lalolagi ne manako ke iloa e koe kua tata mai e magaaho haana ke tamai e fakaotiaga. Puhala fe ne fakakite e ia e iloaaga aoga nei?

Manamanatu la ke he fakataiaga nei: Magaaho ka fano a koe he motoka, liga fakakia mua e koe e Initanete, tau mepe, mo e tau tohi lagomatai. He kitia mogoia e koe e tau fakamailoga mo e fonua ne tatai mo e tau talahauaga he tohi lagomatai haau, ti mauokafua ai kua tata ke he matakavi ne fano a koe ki ai. Pihia foki, kua foaki mai he Atua e Kupu haana, ne talahau ai e tau aga ofogia he lalolagi. He kitia e tautolu e tau fakamailoga nei, talitonu mooli a tautolu kua nonofo a tautolu he magaaho kua tata mai e fakaotiaga.

Fakamaama mai he Tohi Tapu to ha ha e magaaho pauaki mo e aoga lahi ma e lalolagi, to hoko mai e fakaotiaga. Ko e magaaho ia ka kitia ai e tau mena tutupu mo e tau tuaga he lalolagi katoa ne nakai la pihia tali mai. Manamanatu la ke he falu mena ne talahau he Kupu he Atua.

1. TAU MENA KELEA LAHI KA TUTUPU HE LALOLAGI KATOA Ko e perofetaaga ne fakamau ia Mataio veveheaga 24 ne talahau e tau mena tutupu he lalolagi kua felauaki mo e fakamailoga. Ko e fakamailoga ia he “fakaotiaga he lalolagi” ka takitaki atu ke “hoko mai ai e fakaotiaga.” (Kupu 3,  14) Ko e tau mena nei kua putoia ai e tau felakutaki lalahi, hoge, tau mafuike ke he taha mena mo e taha mena, holo ki mua e mahani kelea, ai fai fakaalofa, mo e tau lagatau kelea he tau takitaki lotu ke fakahehē e tau tagata. (Kupu 6-26) Mooli ai, kua fa tutupu e tau mena ia he tau senetenari kua mole. Ka e he tata mai e fakaotiaga, ko e tau mena nei to tutupu oti ai he taha e vahā. To putoia foki tolu e fakamailoga hataki ka mui mai.

2. KO E TAU MAHANI HE TAU TAGATA Pehē mai e Tohi Tapu ko e “tau aho fakamui”​—magaaho ia to hoko mai e fakaotiaga​—to kitia ai ke he au atu e kelea he tau mahani he tagata. Totou e tautolu: “Ko e mena ke ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea, To nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, To afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua.” (2 Timoteo 3:1-4) Mooli, ko e nakai fakalilifu ke he taha tagata kua nakai ko e mena foou, ka ko e “tau aho fakamui” kua mahomo atu e kelea he aga nei ti felauaki tonu mo e talahauaga “to hohoko mai ai e tau aho uka.” Mailoga nakai e koe e tau hihiga teteki nei he tau mahani he tagata?

3. KUA MOUMOU E LALOLAGI Talahau mai he Tohi Tapu to “moumou ai foki [he Atua] a lautolu kua moumou e lalolagi.” (Fakakiteaga 11:18) Moumou fēfē he tau tagata e lalolagi? Ne talahau pihia ni ke he vahā ha Noa: “Ne kelea ni e lalolagi ki mua he Atua; ti puke ni e lalolagi ke he favale. Kua kitekite e Atua ke he lalolagi, kitiala, kua kelea tuai.” Ti pehē e Atua ke he lalolagi matahavala ia: “To fakaotioti ni e au a lautolu katoa.” (Kenese 6:11-13) Mailoga nakai e koe e tau fakamooliaga loga kua puke e lalolagi ke he aga favale? Lafi ki ai, hoko mai tuai e tau tagata ke he magaaho matakehe pauaki: Ha hā ia lautolu e malolō ke tatafi kehe e tau tagata oti he lalolagi. Ha hā he tau lima ha lautolu e tau kanavaakau tau ke taute ai. Ti fai puhala foki ne kua moumou e lalolagi. Ko e tau fakatokaaga ke lata mo e moui he lalolagi​—ko e matagi ne fafagu e tautolu, ko e fakatokaaga he tau manu mo e tau akau, ko e  tau moana​—kua malona fakahaga ai he kaumahala e tau tagata ke leveki ai.

Hūhū ki a koe ni, ‘He kavi taha e senetenari kua mole, fai malolō nakai e tau tagata ke moumou katoatoa a tautolu?’ Ka e mogonei, kua eketaha e tau tagata ke fakaaoga fakalahi e malolō ia he talaga e tau kanavaakau kua mua atu e malolō mo e he moumou e takatakaiaga. Ko e holo ki mua he tau koloa foou kua mua atu e mafiti ke he lotomatala he tau tagata ke maama po ke tautaofi e tau fua kelea mai ai. Pete ia, ko e fakahikuaga he fua lalolagi kua nakai ko e matagahua he tau tagata ke fifili po ke tautaofi. Fakamua to moumou e tau mena momoui oti he lalolagi nei, to moumou he Atua a lautolu oti kua moumou e lalolagi. Pihia e maveheaga haana!

4. KO E GAHUA FAKAMATALA HE LALOLAGI KATOA Ko e taha vala foki he fakamailoga he fakaotiaga ne talahau tuai e gahua kua mua e aoga hane taute: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Ko e gahua fakamatala nei to kehe lahi mai he tau gahua fakamatala ne taute he laulahi he tau lotu he tau senetenari kua mole. He tau aho fakamui, to peehi atu ki mua e fekau pauaki, ko e “tala mitaki nai he kautu.” Iloa nakai e koe e taha matakau fakalotu ne fakamaama e fekau pauaki ia? Ti pete ne liga fakamatala he falu e fekau ia, fakakaupā kia a lautolu ke he taha ni e matakavi, po ke fakamatala e lautolu e tala mitaki ke he “lalolagi oti, ke eke mo talahau ke he tau atu motu oti”?

Ko e faahi Kupega Hila www.mt1130.com kua hagaaki ke he “tala mitaki nai he kautu.” Fakakite he faahi nei e tau tohi ne fakamaama e fekau ia ke molea 700 e vagahau. Iloa nakai e koe ha fakatokaaga foki ne kua fakapuloa e tala mitaki he Kautu ke he lalolagi katoa? Leva ato fai Initanete, ne talahaua e Tau Fakamoli a Iehova ma e tau laliaga ha lautolu ke fakapuloa e tala mitaki hagaao ke he Kautu he Atua. Tali mai he 1939, ko e kili he tau fufuta takitaha he mekasini The Watchtower ne ha hā e tau kupu “Announcing Jehovah’s Kingdom.” Ko e tohi hagaao ke he tau lotu ne talahau ko e gahua fakamatala he Tau Fakamoli a Iehova ne kua “makutu mo e laulahi ti nakai fai fakatataiaga.” Ko e gahua fakamatala nei ne fakapuloa ai e tala mitaki to nakai leva “ti hoko mai ai e fakaotiaga” puhala he Kautu he Atua.

Mailoga nakai e koe ko e tau fakamailoga hatakiaga oti nei ne fā he Tohi Tapu ne fakamaama he vala tala nei kua kitia maaliali ai he moui katoa haau? Kua molea e taha teau tau he foaki mai he mekasini nei ke he tau tagata totou e tau vala tala hagaao ke he tau mena tutupu he lalolagi, ke lagomatai a  lautolu fakatagata ke iloa mooli kua tata a tautolu ke he fakaotiaga. Mooli, ko e falu ne nakai talia he pehē ko e tau vala tala mo e tau numera kua fakakaupā ni mo e maeke ke hikihiki. Talahau foki a lautolu kua au atu ni e kelea he tau tutuaga he lalolagi ha kua fakatolomaki ki mua e tau puhala matutakiaga he lalolagi katoa. Pete ia kua loga fakahaga e tau fakamooliaga ko tautolu he matahiku he magahala pauaki he moui he tagata tali mai.

Falu pulotu ne logona hifo kua ha hā i mua ha tautolu e tau hikihikiaga lalahi ke he fua lalolagi nei. Ma e fakatai, he 2014, ko e Science and Security Board he Bulletin of the Atomic Scientists ne hataki atu ke he United Nations Security Council hagaao ke he tau fakahagahagakelea lalahi ke he tau momoui he tau tagata oti. Ko e tau saienetisi ia ne talahau: “Ko e kumikumiaga fakamatafeiga ke he tau mena fakamatakutakuina nei ne omoi a mautolu ke mauokafua to tupu fakalutukia e matematekelea lahi.” Tokologa e tagata ne mauokafua foki kua hoko a tautolu ke he magaaho kua mua e aoga he lalolagi. Ko e tau taute fakailoa he mekasini nei mo e tokologa he tau tagata ne totou ai kua mauokafua katoatoa ko e magahala pauaki nei ko e tau aho fakamui mooli ti kua tata lahi e fakaotiaga. Ka e he nakai matakutaku ke he vahā i mua, maeke a koe ke fiafia he manamanatu ki ai. Ko e ha ne pihia ai? Ha kua maeke ia koe ke hao mai he fakaotiaga!