TAU VALA TALA I MUA | MOUI HE MOLE E MATE—MAEKE NAKAI?
Fai Amaamanakiaga Nakai ma Lautolu ne Mamate?
To liliu momoui nakai a lautolu ne mamate?
TALI HE TOHI TAPU: “Ko e mena hoko ke he aho ke logona ai ke he hana [Iesu] leo a lautolu katoa ha he tau tukuaga, mo e o mai ai.”—Ioane 5:28, 29.
Ne talahau tuai e Iesu hagaao ke he vahā anoiha ka pule e Kautu haana, to gatigati e Tukuaga. “Ne ofo lahi au he magaaho fakamua ne totou e au e Ioane 5:28, 29,” he manatu e Fernando, ne totoku he vala tala fakamua. “Ne moua e au e amaamanakiaga mooli, ti kamata au ke manamanatu fiafia hagaao ke he vahā anoiha.”
He tau vahā i tuai, ko e tagata tua fakamooli ko Iopu ne amanaki, he mole e mate haana to hoko e magaaho ka fakaliu tu mai he Atua a ia. Ne hūhū a Iopu: “Ka mate e tagata to liu moui mai kia a ia?” Ti tali ai e ia mo e mauokafua: “To tatali atu au he tau aho oti ne kotofa ke tau ai au [magaaho i loto he Tukuaga], ato hoko mai a ia ke hukui aki au. Kia ui mai a koe, ti tali atu au kia koe.”—Iopu 14:14, 15.
Ko e fakaliu tu mai ha Lasalo kua moua e tautolu e amaamanakiaga ma e anoiha
Ko e liu tu mai kua nakai ko e manatu foou ki a Mareta ko e mahakitaga ha Lasalo. He mole e mate ha Lasalo, ne talahau e Iesu ki a Mareta: “To tu mai ni hau a tugane.” Ti tali a Mareta: “Kua iloa e au, to tu mai ni a ia ke he tutuaga he aho fakamuiaki.” Ti pehē a Iesu ki a ia: “Ko au nai ko e liu tu mai, mo e moui; ko ia ke tua mai kia au, pete ni he mate a ia, ka to moui ni a ia.” (Ioane 11:23-25) Ti fakaliu tu mai agataha e Iesu a Lasalo ke he moui! Ko e fakamauaga ofoofogia ia ko e fakatai ke he tau mena ne mua e mitaki he vahā anoiha. Manamanatu ke he tau liliu tu mai pihia ka fakahoko ke he lalolagi katoa!
To fakaliu tu mai kia e falu ke he lagi?
TALI HE TOHI TAPU: Fakakite he Kupu he Atua ko e liu tu mai ha Iesu kua kehe ai he tau liu tu mai ne valu ne fakamau he Tohi Tapu. Ko e tau tagata tokovalu ia ne liu momoui he lalolagi. Ka e hagaao ke he liu tu mai ha Iesu, totou e tautolu: “[Ko] Iesu Keriso . . . Ko ia kua haele tuai ke he lagi, ha he fahi matau he Atua a ia.” (1 Peteru 3:21, 22) Ko Iesu tokotaha ni kia ne fakaliu tu mai ke he lagi? Ne fitā e talahau e Iesu ke he tau aposetolo haana: “Kaeke foki ke fano au mo e taute taha mena ke nonofo ai a mutolu, to liu mai au, ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au.”—Ioane 14:3.
Haele atu ai e Keriso ke he lagi mo e tauteute ma e falu tutaki haana ka hohoko ki ai. Ko lautolu ka fakaliu tu mai ke he lagi to katoa ai ke he 144,000. (Fakakiteaga 14:1, 3) Ka ko e heigoa he tau tutaki tata ia ha Iesu ka taute i ai?
To lavelave lahi a lautolu! Talahau mai e Tohi Tapu: “Kua monuina mo e tapu a ia ha i ai e tufaaga he liu tu mai fakamua; to nakai hoko kia lautolu e pule he mate ne ua, ka e eke a lautolu mo tau ekepoa he Atua mo Keriso, ti eke foki a lautolu mo tau patuiki fakalataha mo ia ke he tau tau ne taha e afe.” (Fakakiteaga 20:6) Ko lautolu ka fakaliu tu mai ke he lagi to pule ko e tau patuiki-ekepoa mo Keriso ke he lalolagi.
Ko hai ka fakaliliu tu mai fakamui?
TALI HE TOHI TAPU: Ne fakamau he Tohi Tapu e lauga nei he aposetolo ko Paulo: “Ha ha ia au e amaamanaki ke he Atua, kua taofi foki e lautolu nai, ke liu foki tutu mai a lautolu kua mamate, ko lautolu ne tututonu katoa mo lautolu ne hepehepe.”—Gahua 24:15.
Ko e Kupu he Atua kua mauokafua ai a tautolu, ko e totou piliona kua mamate to liu momoui
Ko hai he matakau ne hagaao atu a Paulo ki ai, “ko lautolu ne tututonu”? Manamanatu ke he taha fakataiaga. Ko e tagata tua fakamooli ko Tanielu ne tala age ki ai he fakahikuaga he moui haana: “Ha ko e mena to okioki a koe, to tu mai foki a koe ke he tufaaga hau ka hoko ke he tau aho ke fakahiku ai.” (Tanielu 12:13) To ala mai i fe a Tanielu he mohe haana he mate? “To eke ni e motu ma e tau tagata tututonu, to nonofo muatua ai a lautolu.” (Salamo 37:29) Ti talahau tuai foki a Iesu: “Uhoaki a lautolu ne mahani molu; ha ko e mena to eke ma lautolu e motu.” (Mataio 5:5) Ko Tanielu mo e falu tagata taane mo e falu fifine ne tua fakamooli to fakaliu tu mai ke liu momoui foki he lalolagi, mo e ke he tukulagi.
Ko hai he matakau ia ne fakahigoa e Paulo ko “lautolu ne hepehepe”? Ko lautolu mai he tau piliona tagata ne kua momoui ti mamate, tokologa ne nakai moua e magaaho ke maama mo e fakagahua e kupu mooli he Tohi Tapu. He mole e liu tu mai, to maeke a lautolu ke o mai ke iloa mo e loto fakaaue ki a Iehova * mo Iesu. (Ioane 17:3) Ko lautolu oti ne fifili ke fekafekau ke he Atua to amaamanaki ke momoui loloa tuga a Iehova—tukulagi.
Ko lautolu oti ne fifili ke fekafekau ke he Atua to amaamanaki ke moui tukulagi mo e tino malolō mo e fiafia
To fēfē e tau tutūaga he lalolagi?
TALI HE TOHI TAPU: To “holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 21:4) “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua.”—Isaia 65:21.
Manamanatu la ka momoui ai he tau tutuaga pihia mo e tau fakahele haau ka liliu tu mai! Ka e tumau agaia e hūhū, Maeke fēfē ia koe ke iloa mooli to fai liu tu mai?
^ para. 15 Ko Iehova e higoa he Atua ne fakakite i loto he Tohi Tapu.
