HE TOTOU e koe e tau talahauaga ua ia, talahauaga fe ne fakamaama e onoonoaga haau? Tokologa ne mafanatia he tau kupu ha Saulo ko e Taso, ne higoa foki ko e aposetolo ko Paulo. (Gahua 17:26, 27) Haia foki he Tohi Tapu e falu kupu mafanatia tuga e tau kupu ia. Ma e fakatai, ne talahau e Iesu e liogi mafanatia mo e mauokafua ke iloa he tau tutaki haana e Atua ti fakamonuina foki e ia.​—Ioane 17:3.

Ka ko e tau pulotu tuga a Philo ne kehe e onoonoaga. Pehē a lautolu kua nakai maeke a tautolu ke maama katoatoa e Atua. Ti moua mai i fe e tala mooli?

Talahau fakamaaliali he Tohi Tapu to fai talahauaga hagaao ke he Atua ka uka he tau tagata ke maama. Ma e fakatai, fiha e leva he ha hā i ai e Tufuga, kua mitaki ue atu e fioiaaga haana, nakai maeke foki ke maama mo e iloa po ke fuafua e hokulo he pulotu haana. Kua tokoluga lahi mahaki ni ke maeke e tagata ke maama. Ka e nakai taofi he tau tutuaga ia he Atua a tautolu mai he iloa a ia. Ti ka manamanatu fakahokulo ke he tau mena ia to lagomatai a tautolu ke ‘fakatata atu ke he Atua.’ (Iakopo 4:8) O mai la ke kumikumi ke he falu fakatai he tau mena ia ne nakai maeke ke maama. Ti onoono mogoia ke he tau tuaga he Atua kua maeke ia tautolu ke maama mooli.

ATUA MAI HE TUKULAGI KE HOKO KE HE TUKULAGI: Fakaako he Tohi Tapu ko e Atua kua “mai i tuai tigahau, to hoko ke he tukulagi.” (Salamo 90:2) Kakano, kua nakai fai kamataaga mo e to nakai fai fakaotiaga e Atua. Mai he onoonoaga he tagata, “nakai maeke foki ke totou hana tau tau po ke fiha.”​—Iopu 36:26.

Puhala ka aoga ki a koe: Mavehe mai e Atua to moua e koe e moui tukulagi ka iloa mooli e koe a ia. (Ioane 17:3) To falanaki fēfē ke he maveheaga ia ka nakai moui tukulagi e Atua? Ko e “Patuiki tukulagi” ni ka fakamooli e maveheaga pihia.​—1 Timoteo 1:17.

MANAMANATUAGA HE ATUA: Fakaako he Tohi Tapu ko e Atua kua “nakai maeke ke kumikumi hana pulotu” ha kua tokoluga lahi e tau manatu haana ke he tau manatu ha tautolu. (Isaia 40:28; 55:9) Ti felauaki tonu e hūhū he Tohi Tapu: “Ko hai kua iloa e finagalo he Iki ke fakaako atu a ia?”​—1 Korinito 2:16.

Puhala ka aoga ki a koe: Maeke e Atua ke fanogonogo ke he miliona e tau liogi he magaaho taha. (Salamo 65:2) Mailoga foki e ia e tau manu lele ikiiki oti ne mokulu ke he kelekele. To lavelave lahi kia e manamanatuaga he Atua ti nakai mailoga a koe mo e fanogonogo ke he tau liogi haau? Nakai, ha kua ai fai kaupaaga e haana a manamanatuaga. Lafi ki ai, ko e “mena mua a mutolu ke he tau manu ikiiki loga.”​—Mataio 10:29, 31.

TAU PUHALA HE ATUA: Fakaako he Tohi Tapu to “nakai kitia he tagata e gahua kua eke he Atua tali mai he kamataaga ke hoko ke he fakahikuaga.” (Fakamatalaaga 3:11) Ko e mena ia, to nakai iloa e tautolu e tau mena oti hagaao ke he Atua. Ko e pulotu he tau puhala he Atua “kua nakai maeke foki ke iloa hana tau haeleaga.” (Roma 11:33) Pete ia, kua makai e Atua ke fakakite haana tau puhala ke he tau tagata kua manako ke fakafiafia a ia.​—Amosa 3:7.

Puhala ka aoga ki a koe: Ka totou mo e fakaako tumau a koe ke he Tohi Tapu, to nakai oti e fakaako haau ke he tau mena foou hagaao ke he Atua mo e haana tau puhala. Kakano, to maeke ia tautolu ke fakatata lahi tukulagi ke he ha tautolu a Matua he lagi.

Ha kua nakai maama katoatoa ia tautolu e falu tuaga pauaki he Atua, ai kakano e mena ia to nakai iloa e tautolu a ia. Loga e vala tala he Tohi Tapu ka lagomatai a tautolu ke iloa mitaki e Atua. Hanei falu fakatai:

HIGOA HE ATUA: Fakaako he Tohi Tapu a tautolu na fai higoa e Atua ma haana ni. Pehē a ia: “Ko au ko Iehova, ko e haku a higoa haia.” Ne kavi laga 7,000 e kitia e higoa he Atua he Tohi Tapu, nakai fai higoa foki ne loga pihia he Tohi Tapu.​—Isaia 42:8.

Puhala ka aoga ki a koe: He liogi a Iesu ne pehē a ia: “Ha mautolu a Matua na e, ha ha he lagi, kia tapu hau a higoa.” (Mataio 6:9) Maeke nakai a koe ke fakaaoga foki e higoa he Atua he tau liogi haau? Kua makai a Iehova ke fakamomoui a lautolu oti kana ne fakalilifu mooli e higoa haana.​—Roma 10:13.

KO E HAELEAGA HE ATUA: Fakaako he Tohi Tapu na ua e fakatokaaga​—ko e lagi ko e haeleaga he tau mena momoui fakaagaaga mo e ko lalo nei ne ha hā e fua lalolagi ha tautolu. (Ioane 8:23; 1 Korinito 15:44) I loto he Tohi Tapu, ko e kupu “lagi” kua fa hagaao ke he nonofoaga he tau mena moui fakaagaaga. Ko e matakavi ne “haele ai” e Tufuga ko e “lagi” haia.​—1 Tau Patuiki 8:43.

Puhala ka aoga ki a koe: To moua e koe e maama maaliali ke he Atua. Ko e Tufuga nakai ko e malolō  fakagalogalo ne haia he tau matakavi oti mo e i loto he tau mena oti. Kua mooli a Iehova ne nofo he matakavi pauaki. Ti kua, “nakai fakai foki ha mena taha kua galo ki mua hana.”​—Heperu 4:13.

TAU MAHANI HE ATUA: Fakaako he Tohi Tapu na ha hā ia Iehova e tau mahani fakaalofa hofihofi. “Ko e Atua ko e fakaalofa a ia.” (1 Ioane 4:8) Nakai maeke a ia ke pikopiko. (Tito 1:2) Nakai fakamailoga tagata a ia, ka e fakaalofa noa, fakaalofa hofihofi, mo e fakatuai haana ita. (Esoto 34:6; Gahua 10:34) To liga ofo e tokologa, ha kua manako e Tufuga ke “fakafetui” mo e tau tagata ne fakalilifu ki a ia.​—Salamo 25:14.

Puhala ka aoga ki a koe: Maeke foki a koe ke eke mo kapitiga ha Iehova. (Iakopo 2:23) He iloa fakahaga e koe e mahani ha Iehova, to maeke ia koe ke maama atu foki e tau tala he Tohi Tapu.

Kua maaliali e fakamaamaaga he Tohi Tapu hagaao ki a Iehova ko e Atua. Kua maeke ke maama a ia. Ti manako e Tufuga ke iloa e tautolu a ia. Mavehe mai he haana Kupu ko e Tohi Tapu: “Kaeke ke kumi e koe a ia, ti moua e koe a ia.” (1 Nofoaga he Tau Patuiki 28:9) Kane hā he totou mo e manamanatu fakahokulo ke he tau tala he Tohi Tapu ke iloa e Atua? Ka taute pihia e koe, kua mavehe mai e Tohi Tapu ko e Atua to “fakatata mai ai a ia kia mutolu.”​—Iakopo 4:8.

Liga manamanatu a koe, ‘Ha kua nakai maeke au ke maama e tau mena oti hagaao ke he Tufuga, maeke fēfē au ke eke mo kapitiga haana?’ Manamanatu ke he mena nei: Lata nakai e kapitiga uho he ekekafo iihi ke moua e tikulī ekekafo? Nakai! Liga kehe mamao e gahua he kapitiga he ekekafo iihi. Ka e maeke agaia a laua ke kapitiga tata. Ko e mena ne mua, ke iloa he kapitiga e mahani he ekekafo iihi mo e tau mena ne fiafia mo e nakai fiafia a ia ki ai. Pihia foki, maeke ia koe ke iloa mai he Tohi Tapu hagaao ki a Iehova​—ko e tau mena ia kua latatonu ke iloa e koe ke eke mo kapitiga haana.

Kua fakakite mai he Tohi Tapu e talahauaga maaliali ke he Tufuga, haia foki i loto e tau vala tala ma tautolu ke maeke ke iloa e Atua. Manako nakai a koe ke iloa atu foki hagaao ki a Iehova ko e Atua? Kua foaki he Tau Fakamoli a Iehova e fakaholoaga fakaako Tohi Tapu nakai fai totogi he kaina. Uiina e mautolu a koe ke matutaki atu ke he Tau Fakamoli he matakavi haau po ke fakakia ha mautolu a faahi kupega hila, www.mt1130.com.