He fakaako a koe mai he porosua nei, ha hā i loto he Tohi Tapu loga e tau matapatu fakaakoaga ke lagomatai a koe mo e magafaoa haau. Manako a Iehova ke fiafia a koe. Kua mavehe e ia ka tuku fakamua e koe e tapuakiaga haana, to “lafi atu ai e tau mena oti ia kia mutolu.” (Mataio 6:33) Kua manako mooli a ia ki a koe ke eke mo kapitiga haana. Fakaaoga fakamitaki e tau magaaho oti ke feaki e tuaga kapitiga haau mo e Atua. Ko e kotofaaga anei kua mua atu e mitaki ke moua he tagata.—Mataio 22:37, 38.

PEHĒ E TOHI TAPU: “To eke foki au mo Matua ha mutolu, to eke foki a mutolu mo e haku a tau tama tane mo e haku a tau tama fifine, kua pihia mai ai e Iki [Iehova].” (2 Korinito 6:18) Kua manako a Iehova ki a koe ke eke mo kapitiga tata haana. Ko e liogi ko e taha puhala ke taute ai. Uiina e Iehova a koe ke “liogi nakai noa.” (1 Tesalonia 5:17) Kua manako lahi a ia ke logona e tau fatuakiloto mo e tau tupetupe haau. (Filipi 4:6) Ka liogi a koe mo e magafaoa haau, to kitia e lautolu kua moolioli e Atua ki a koe.

Lafi ke he tutala ke he Atua, kua lata ia koe ke fanogonogo ki a ia. Maeke ia koe ke taute pihia he kumikumi ke he Kupu haana mo e tau tohi ne fakavē ke he Tohi Tapu. (Salamo 1:1, 2) Manamanatu fakahokulo ke he tau mena ne fakaako e koe. (Salamo 77:11, 12) He fanogonogo ke he Atua, kua lata foki a koe ke fina atu tumau ke he tau feleveiaaga Kerisiano.—Salamo 122:1-4.

Ko e tutala ke he falu hagaao ki a Iehova ko e puhala aoga foki ke fakamalolō e fakafetuiaga haau mo ia. Ka taute fakalahi ai e koe, to tata lahi a koe ki a ia.—Mataio 28:19, 20.

KO E MENA HA MUA KA TAUTE:

• Fakatoka e magaaho he tau aho takitaha ke totou e Tohi Tapu mo e liogi

• Ko e magafaoa, tuku fakamua e tau matagahua fakaagaaga ki mua he fakafiafiaaga mo e okiokiaga

PEHĒ E TOHI TAPU: “Kia fakatata atu a mutolu ke he Atua, ti fakatata mai ai a ia kia mutolu.” (Iakopo 4:8) Kua lata a koe ke fakatoka e fakaholoaga he tapuakiaga magafaoa ti muitua tumau ki ai. (Kenese 18:19) Ka e nakai koenaia. Kua lata ke fakaatā e Atua ke omoi a koe he moui haau he tau aho takitaha. Fakamalolō e fakafetuiaga he magafaoa haau mo e Atua he tutala hagaao ki a ia “ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ka matike ai a koe.” (Teutaronome 6:6, 7) Kia eke ai mo foliaga haau ke tuga a Iosua, ne pehē: “Ka ko au mo e haku a magafaoa, to fekafekau a mautolu kia Iehova.”—Iosua 24:15.

KO E MENA HA MUA KA TAUTE:

• Kia fakatumau e fakaholoaga he fakaakoaga magafaoa mo e manamanatu ke he tau manako he tau tagata takitaha he magafaoa haau