1-2. (a) UJehova uzizwa njani ngabantu abenza izono ezikulu begodu bangafuni ukutjhuguluka? (b) Khuyini uJehova afuna izoni ziyenze?

 AKUSIZO zoke iindlela zokuziphatha uJehova azamukelako begodu usihloyile isono. (Rhu. 5:​4-6) UJehova ulindele bona siphile ngeenkambiso eziseBhayibhelini. Nanyana kunjalo, akakalindeli bona singenzi imitjhapho njengombana sibabantu abanesono. (Rhu. 130:​3, 4) Ngesikhathi esifanako, akabekezeleleli ‘abantu abangamsabiko uZimu, abajika umusa omkhulu kaZimethu bawenze ibanga lokwenza amanyala.’ (Jud. 4) IBhayibheli likhuluma ‘ngokutjhatjalaliswa kwabantu abangamsabiko uZimu’ ngepi ye-Arimagedoni.—2 Pit. 3:7; IsAm. 16:16.

² Nanyana kunjalo, uJehova akafisi namunye atjhatjalaliswe. Njengombana sifundile eenhlokweni ezidlulileko, iBhayibheli litjho ngokukhanyako ukuthi “ufisa bona boke batjhuguluke.” (2 Pit. 3:9) Abadala bebandla balingisa uJehova njengombana baba nesineke begodu basiza abantu abenze isono bona balungise iindlela zabo begodu batjhidelane noJehova godu. Nokho, ngezinye iinkhathi, umuntu owenze isono akatjhuguluki. (Isa. 6:9) Abanye  baragela phambili benza isono nanyana abadala balinga ukubasiza batjhuguluke. Alo, abadala kufuze benzeni nakunjalo?

“SUSANI UMUNTU OBUMBI PHAKATHI KWENU”

3. (a) IBhayibheli lithi kufuze kwenziweni ngezoni ezingatjhugulukiko? (b) Kubayini singathi umuntu owenze isono uzikhethele ukususwa ebandleni?

³ Umuntu owenze isono nakangafuni ukutjhuguluka abadala kufuze balandele isinqophiso esikweyoku-1 kwebeKorinte 5:13 esithi, “Susani umuntu omumbi phakathi kwenu.” Singatjho ukuthi umuntu owenze isono uyazikhethela umphumela loyo, uvuna a akutjalileko. (Gal. 6:7) Kubayini sitjho njalo? Ngombana walile ukutjhuguluka ngitjho nanyana abadala balinge kanengi ukumsiza. (2 Kho. 17:​12-15) Izenzo zakhe zitjengisa ukuthi akafuni ukuphila ngeenkambiso zakaJehova.—Dut. 30:​19, 20.

4. Kubayini ibandla laziswa nakunomuntu osusiweko ngebanga lokuthi angafuni ukutjhuguluka?

⁴ Umuntu owonileko nakangatjhugulukiko ebandleni, kwenziwa isaziso, sokuthi ususiwe ebandleni. Ihloso yesazisweso akusikuhlazisa isoni, kunalokho senziwa ngebanga lokuthi ibandla kufuze lilandele isinqophiso esisemtlolweni, esithi ‘lisani ukuzihlanganisa’ nomuntu loyo. (1 Kor. 5:​9-11) Kunebanga elihle lokunikela isinqophisweso. Umpostoli uPowula watlola wathi, “Isibiliso esincani sibilisa ihlama yoke.” (1 Kor. 5:6) Nange isoni singasuswa ebandleni, abanye bangacabanga ukuthi akutlhogeki balalele iinkambisolawulo zakaJehova.—IzA. 13:20; 1 Kor. 15:33.

5. Kufuze sizizwe njani ngomfowethu namkha udadwethu osusiwe ebandleni begodu kubayini?

⁵ Alo, kufuze sizizwe njani ngomKrestu osusiweko ebandleni? Nanyana singazihlanganisi naye, kufuze simqale njengemvu elahlekileko ingasi umuntu ongeze watjhuguluka. Imvu elahlekileko ingabuya. Khumbula ukuthi imvu elahlekileko le, yazinikela kuJehova. Okudanisako kukuthi nje, ayisaphili ngeenkambiso zakaJehova begodu lokho kubeka ukuphila kwayo engozini. (Hez. 18:31) Nanyana kunjalo, umusa kaJehova nawusese khona, kunethemba lokuthi umuntu loyo angatjhuguluka. Yeke abadala bangamsiza njani umuntu owenze isono?

INDLELA ABADALA ABASIZA NGAYO LABO ABASUSIWEKO

6. Khuyini abadala abazoyenza ukusiza umuntu osusiweko?

⁶ Nange umuntu asusiwe kghani abadala bayalisa ukumsiza bona abuyele kuJehova? Awa, akusinjalo. Abadala nabatjela umuntu bona uzokususwa, bamtjela namagadango ekufuze awathathe bona abuyiselwe. Kodwana abadala bazokwenza okungeziweko. Eenkhathini ezinengi bazokutjela umuntu loyo ukuthi bangathanda ukuhlangana naye ngemva kweenyanga ezimbalwa ukubona ukuthi indlela acabanga ngayo itjhugulukile na. Nange umuntu osusiweko ebandleni avuma ukuhlangana nabadala ngemva kweenyanga ezimbalwa, bazomkhuthaza bona atjhuguluke begodu abuye ebandleni. Nanyana angakatjhuguluki ngesikhatheso, abadala bazokulinga ukuhlangana naye esikhathini esizako ukwenzela bona bamkhuthaze ukuthi atjhuguluke.

7. Nakunomuntu osusiweko abadala bangasilingisa njani isibonelo zakaJehova sokuba nomusa? (Joromiya 3:12)

 ⁷ Abadala balinga ngakho koke ukulingisa umusa kaJehova nakunomuntu osusiweko. Ngokwesibonelo, ekadeni, uJehova akhenge alinde abantu bakhe, ama-Israyeli bona atjhuguluke ngaphambi kobana athome ukubasiza. Kunalokho wathatha igadango lokuthoma lokubasiza. Ngitjho nangaphambi kobana batjengise amatshwayo wokutjhuguluka. Njengombana sibonile esihlokweni sesibili sesiThalesi, uJehova watjengisa indlela anomusa ngayo ngokutjela umphorofidakhe uHosiya bona alibalele umkakhe obekenza isono. (Hos. 3:1; Mal. 3:7) Abadala balingisa uJehova, bafuna umuntu owenze isono atjhuguluke begodu abakwenzi kube budisi bona abuye kuJehova.—Funda uJoromiya 3:12.

8. Umfanekiso kaJesu wendodana elahlekileko, usitjengisa njani ngokungeziweko indlela uJehova anomusa nezwela ngayo? (Lukasi 15:7)

⁸ Khumbula indlela ubaba wendodana elahlekileko enza ngayo. Kwathi nakabona indodanakhe isesekude, ibuya ekhaya “wayigijimela, wayisingatha bese wayimanga.” (Luk. 15:20) Tjheja ukuthi ubaba lo akhenge alindele indodanakhe bona imncenge ayilibalele. Kunalokho wagijimela kiyo ngombana bekayithanda. Abadala nabo balinga ukwenza ngendlela efanako kilabo abalahlekileko. Bafuna imvu elahlekileko ibuye ekhaya. (Luk. 15:​22-24, 32) Isoni nasibuyako uJehova, uJesu neengilozi bayathaba nebandla liloke liyathaba.—Funda uLukasi 15:7.

9. Khuyini uJehova akhuthaza abantu abonileko ukuthi bayenze?

⁹ Kilokhu esikufundileko bekube nje, kukuthi uJehova akavumelani nomuntu owenza isono angatjhuguluki. Kodwana akabalahleli izandla abantu abonileko. Ufuna babuye. Indlela uJehova azizwa ngayo ngabantu abonileko ihlathululwa kuHosiya 14:​4, “Ngizokulapha ukungathembeki kwabo. Ngizobathanda ngokusuka ehliziyweni ngombana ilaka lami lisukile kuye.” Ngebanga lokuthi bayayazi indlela uJehova azizwa ngayo, abadala baqala nanyana ngiliphi itshwayo elitjengisa ukuthi umuntu lo, uthoma ukutjhuguluka. Begodu lokho kufuze kwenze abasusiweko babuye kuJehova, bangamotjhi isikhathi.

10-11. Abadala bangabasiza njani esele kusikhathi eside basusiwe?

¹⁰ Kuthiwani ngabantu esele kusikhathi eside basusiwe? Kungenzeka sebalisa ukwenza izinto ezibenze basuswa. Kobunye ubujamo, kungenzeka abasakhumbuli nokuthi benzani. Kunganandaba ukuthi sekusikhathi eside kangangani umuntu loyo asusiwe, abadala kufuze balinge ukumfumana. Nababavakatjhelako, abadala bazobathandazela bebabakhuthaze ukuthi babuye ebandleni. Nasele kudlule iminyaka eminengi umuntu asusiwe, angezi esifundweni, kuzokutlhogeka afunde ngoJehova namaqiniso aseBhayibhelini godu ngombana ubuhlobo bakhe noJehova sele bubogaboga khulu. Yeke nakathi ufuna ukubuya ebandleni, abadala bazokukhetha othileko bona afunde naye iBhayibheli, ngitjho nanyana angakabuyiselwa ukuthi abe lilunga lebandla godu. Abadala ngibo abazokuhlela bona afundelwe iBhayibheli.

¹¹ Abadala balinga ukulandela isibonelo sakaJehova sokuba nethando. Yeke bazokufuna boke abatjhiye uJehova, babakhuthaze bona babuyele kuye. Umuntu owenze  isono nakatjengisako bona utjhugulukile, ngokurhabako uzokubuyiselwa ebandleni.—2 Kor. 2:​6-8.

12. (a) Ngibuphi ubujamo obufuna abadala batjhejisise? (b) Kubayini kungakafuzi sicabange ukuthi kunezinye izono uJehova ekungakafuzi azilibalele? (Funda nomtlolo waphasi.)

¹² Kobunye ubujamo abadala ekufuze batjhejisise khulu kibo ngaphambi kokubuyisela umuntu ebandleni. Ngokwesibonelo, nange umuntu ahlunguphaze abantwana, abesihlubuki namkha enze amano wokuqeda umtjhado, abadala kufuze batjhejisise khulu ukuthi umuntu onjalo utjhugulukile na. (Mal. 2:14; 2 Thim. 3:6) Kufuze bavikele ibandla. Ngesikhathi esifanako,  kufuze sizwisise ukuthi uJehova uzokwamukela nanyana ngisiphi isoni esitjhuguluke kwamambala nasilisa ukwenza isono. Nanyana abadala batjhejisisa nabasingatha indaba yomuntu ophethe abanye ngelunya, akukafuzi bathi kunezono uJehova angeze azilibalela. b—1 Pit. 2:10.

KHUYINI IBANDLA EKUFUZE LIYENZE

13. Ngimuphi umehluko okhona endleleni esiphatha ngayo umuntu okhalinyiweko nomuntu osusiweko?

¹³ Njengombana sicocile esihlokweni esidlulileko, ngezinye iinkhathi kwenziwa isaziso sokuthi, umuntu othileko ukhalinyiwe, ebujamweni obunjalo, singaragela phambili sizihlanganisa naye, njengombana sazi ukuthi utjhugulukile walahla nomukghwa omumbi ebekawenza. (1 Thim. 5:20) Akakasuswa begodu utlhoga ukukhuthazwa bafowethu nabodadwethu bona aragele phambili enza okulungileko. (Heb. 10:​24, 25) Kodwana ubujamo buhlukile naziza emuntwini osusiweko. ‘Siyalisa ukuzihlanganisa’ nomuntu onjalo begodu ‘asidli nomuntu onjalo.’—1 Kor. 5:11.

14. UmKrestu angawusebenzisa njani unembezakhe obanduliweko lokha umuntu osusiweko eza esifundweni? (Qala nesithombe.)

¹⁴ Kghani esikufundileko kutjho ukuthi kufuze singamkhulumisi ngokupheleleko umuntu osusiweko? Awa akusinjalo. Siyazi ukuthi akukafuzi sizihlanganise naye. Kodwana nangabe sihlobene naye namkha bekamngani ebesitjhidelene naye ngaphambi kobana asuswe, singamumema bona eze emhlanganweni. Kuthiwani nangabe uyeza? Kade besingamkhulumisi umuntu onjalo. Nanyana kunjalo, umKrestu ngamunye kufuze asebenzise unembezakhe obandulwe ngeBhayibheli endabeni enjalo. Abanye bangakhetha ukumlotjhisa nokumamukela emihlanganweni. Nanyana kunjalo, angekhe sisolo sikhuluma naye ngezinye izinto namkha sizithabise naye.

15. Ngiziphi izoni ezihlathululwa kweyesi-2 kaJwanisi 9-11? (Funda ibhoksi elithi, “ Kghani UJwanisi NoPowula Bebakhuluma Ngezono Ezifanako?”)

 ¹⁵ Omunye angazibuza, ‘Kghani iBhayibheli alitjho ukuthi umKrestu olotjhisa umuntu onjalo, ungumhlanganyeli emsebenzinakhe ekhohlakeleko?’ (Funda yesi-2 kaJwanisi 9-11.) Nanyana kunjalo, umongo okweyesi-2 kaJwanisi 9:11 utjengisa bona umuntu lo angaba sihlubuki namkha alinge ukwenza abanye benze izinto iBhayibheli ethi azikalungi. (IsAm. 2:20) Yeke, nange umuntu athuthukisa ifundiso yokuhlubuka namkha akhuthaza abanye bona benze izinto ezimbi, abadala angekhe bamvakatjhele. Iye khona ithemba lokuthi angatjhuguluka likhona. Kodwana bekube sikhatheso, angekhe simlotjhise namkha simumeme bona eze emihlanganweni.

LINGISA UMUSA NESIRHAWU SAKAJEHOVA

16-17. (a) Khuyini uJehova afuna izoni ziyenze? (Hezekiyeli 18:32) (b) Abadala bangatjengisa njani bona basebenzisana noJehova nabalinga ukusiza izoni?

¹⁶ Sifundeni esiThalenesi? UJehova akafuni namunye bona atjhatjalaliswe. (Funda uHezekiyeli 18:32.) Ufuna izoni zibuyisane naye. (2 Kor. 5:20) Kungebangelo kusukela kade uJehova bekasolo akhuthaza abantu abamlotjhako esele bamtjhiyile bona babuyele kuye. Abadala bebandla basebenza noJehova bona basize abantu abenze izono ezikulu ukuthi batjhuguluke.—Rom. 2:4; 1 Kor. 3:9.

¹⁷ Kunethabo elikhulu ezulwini isoni sinye nasitjhugulukako. Kumthabisa khulu uJehova qobe imvu elahlekileko nayibuya ebandleni. Sizizwa simthanda khulu uJehova nasicabanga ngomusa nesirhawu sakhe.—Luk. 1:78.