Umthandazo

5 Kunendaba Bona Sithandaza Sikuphi Begodu Nini?

AKUNAKUZAZA bona utjhejile bonyana iinkolo ezinengi ezihleliweko ziphakamisa izindlu zeemthandazo eziphambili begodu zitjho neenkhathi zelanga umthandazo ongenziwa ngazo. IBhayibhili ithi kufuze sithandaze eendaweni ezithileko nangeenkhathi ezithileko?

IBhayibhili iyatjho bona kunezenzakalo ezikhethekileko okufuzwe kuthandazwe kizo. Isibonelo, ngaphambi kokudla nabalandeli bakhe, uJesu wathokoza uZimu ngomthandazo. (Luka 22:17) Abafundi bakhe nebahlangana ngomnqopho wokukhulekela, bathandaza ndawonye. Ngalokho baragela phambili ngendlela ebekwenziwa ngayo esikhathini eside esinagogeni lamaJuda netempeleni eJerusalema. UZimu wenzela itempeli bona libe ‘yindlu lapha kuzakuthandaza zoke iintjhaba.’—Mar. 11:17.

Iinceku zakaZimu nezihlangene begodu zithandaza ndawonye, iimbawo zazo zingaba neemphumela emihle. Nengabe isiqhema sibumbene ekucabangeni kwaso, nomthandazo owenziwa ngebanga laso utjengisa iinkambisolawulo zoMtlolo, uZimu uyathaba. Umthandazo ungamenza enze nento egade angakamedi ukuyenza. (KumaHebheru 13:18, 19) AboFakazi BakaJehova bathandaza qobe emihlanganwenabo. Umenywa ngokufuthumeleko bona uze eWolweni labo LoMbuso eliseduze nawe uzizwele iimthandazo leyo ngokwakho.

Nokho, iBhayibhili ayitjho bona sithandaze ngesikhathi esithileko esikhethekileko namtjhana endaweni ethileko. EBhayibhilini, sifumana umlando weenceku zakaZimu zithandaza ngananyana ngisiphi isikhathi. UJesu wathi: “Newuthandazako, ngena ngendlini yakho, uvale ibadi, uthandaze kuyihlo ongabonwako.”—Matewu 6:6.

Qala bona lokho kusimemo esithembisa kangangani! Eqinisweni ungakghona ukutjhidela kuMbusi wendawo yoke ngananyana ngisiphi isikhathi, usemsithelweni, begodu qiniseka bona uzokulalela. Kusepakameni bona kubayini uJesu kanengi bekafuna ukuba yedwa bona athandaze! Ngesinye isikhathi, wathandaza ubusuku boke kuZimu, ngokukhanyako afuna isinqophiso sokwenza isiqunto esiqakatheke khulu.—Luka 6:12, 13.

Amanye amadoda nabafazi emlandweni weBhayibhili bathandaza nebaqalene neenqunto ezibudisi namtjhana iintjhijilo ezisabisako. Ngezinye iinkhathi bebathandaza ngokuzwakalako ngasikhathi buthule; bebathandaza baziinqhema nalokha babodwa. Into eqakathekileko, kukobana bebathandaza. UZimu umema ngitjho neenceku zakhe: “Thandazani njalo.” (1 KwebeTesalonika 5:17) Uzimisele ukubalalela ngokungapheliko labo abenza intando yakhe. Qala bona lokho kusimemo sethando kangangani!

Kuliqiniso, ephasini elingathembisiko lanamhlanjesi, abanengi bazibuza ngokuqakatheka komthandazo. Ungazibuza, ‘Uzongirhelebha kwamambala na?’

[Umkhangiso osekhasini 9]

Singathandaza ngesinye nesinye isikhathi nanyana kukuphi