Funda ELizwini LakaZimu

Ngubani UJesu Krestu?

Isihlokwesi siphakamisa iimbuzo okungenzeka wazibuza yona, bese sikutjengisa bona ungazifumanaphi iimpendulo eBhayibhilinakho. AboFakazi BakaJehova bangakuthabela ukucoca nawe ngeempendulwezi.

1. Ngubani UJesu Krestu?

Ngokungafani nomunye umuntu, uJesu waphila ezulwini njengomuntu womoya ngaphambi kobana abelethwe ephasini. (Jwanisi 8:23) Bekasibunjwa sokuthoma sakaZimu, begodu warhelebha ekubumbeni zoke ezinye izinto. Nguye kwaphela obunjwe nguJehova ngokunqophileko ngalokho ubizwa ngokobana ‘yiNdodana kaZimu eyodwa tere.’ UJesu wakhonza njengoMkhulumeli kaZimu, kungalokho godu abizwa ngokobana ‘nguLizwi.’—Jwanisi 1:1-3, 14; funda Iziyema 8:22, 23, 30; KwebeKholose 1:15, 16.

2. Kubayini uJesu eza ephasini?

UZimu wathumela iNdodanakhe ephasini ngokudlulisela ukuphila kwakhe kusuka ezulwini kuya esibelethweni sentombi emJuda uMariya. Ngalokho uJesu gade anganaye ubaba omumuntu wenyama. (Luka 1:30-35) UJesu weza ephasini bona (1) azokufundisa iqiniso ngoZimu, (2) azokubeka isibonelo sokwenza intando kaZimu, begodu (3) anikele ngokuphila kwakhe okupheleleko bona kube [“sihlengo,” NW.]—Funda uMatewu 20:28; Jwanisi 18:37.

3. Kubayini sitlhoga isihlengo?

Isihlengo yintengo ebhadalelwa ukutjhaphulula umuntu ekubotjhweni. Ukufa nokuluphala bekungasiyingcenye yehloso kaZimu yekuthomeni ngabantu. Sikwazi njani lokho? UZimu watjela umuntu wokuthoma, u-Adamu, bona nekangenza lokho iBhayibhili ekubiza ngokobana sisono, uzokufa. Okutjho bona ngathana u-Adamu zange enze isono, bekangekhe afe. Ngitjho namtjhana u-Adamu aphila amakhulu weemnyaka, wathoma ukufa ngelanga athoma ngalo ukungalaleli uZimu. (Genesisi 2:16, 17; 5:5) U-Adamu wadlulisela isono nomphumela waso, ukufa, kiyo yoke inzalo yakhe. Yeke, ukufa ‘kweza’ ebantwini ngo-Adamu. Kungakho sitlhoga isihlengo.—Funda KwebeRoma 5:12; 6:23.

  4. Kubayini uJesu afa?

Ngubani obekangabhadela isihlengo sokusitjhaphulula ekufeni? Nesifako, sibhadala isigwebo sezono zethu kwaphela. Akunamuntu ongakapheleli ongabhadalela izono zabanye abantu.—Funda IRhalani 49:7-9.

Njengombana uJesu angazange azuze ukungapheleli kubaba omumuntu wenyama, wafa, ingasi ngebanga lezono zakhe, kodwana ngebanga lezono zabanye. Ngokuthumela iNdodanakhe bona izosifela, uZimu watjengisa ithando Lakhe elikhulu ngabantu. UJesu watjengisa ithando lakhe ngathi ngokulalela uYise nokunikela ngokuphila kwakhe ngebanga lezono zethu.—Funda uJwanisi 3:16; KwebeRoma 5:18, 19.

5. UJesu wenzani nje?

Ngokuphulukisa abagulako, ukuvusa abafileko, nokunikela ngokuphila kwakhe ukuhlangula abantu esonweni nekufeni, uJesu watjengisa lokho azokwenzela boke abantu abalalelako emaswapheleni. (Luka 18:35-42; Jwanisi 5:28, 29) Ngemva kokufa kwakaJesu, uZimu wamvusela ekuphileni njengomuntu womoya. (1 Pitrosi 3:18) Ngemva kwalokho uJesu walinda ngesigomeni sakaZimu bekwaba kulapho uJehova amnikela amandla wokubusa njengeKosi ephasini loke. (Hebheru 10:12, 13) Nje uJesu uyiKosi ebusako ezulwini, begodu abalandeli bakhe barhuwelela iindaba ezimnandi ephasini loke.—Funda uDanyela 7:13, 14; Matewu 24:14.

Msinyana, uJesu uzokusebenzisa amandlakhe njengeKosi ukuqeda woke umtlhago nalabo abawubangelako. Iingidi ezilalela begodu zibe nekholo kuJesu zizokuthabela ukuphila eparadeyisini ephasini.—Funda IRhalani 37:9-11.

Ukufumana ilwazi elingeziweko, qala isahluko-4 sencwadi le, Khuyini Kwamambala Okufundiswa YiBhayibhili?, egadangiswe boFakazi BakaJehova.

[Isithombe ekhasini 11]

Iingidi ezilalela begodu zibe nekholo kuJesu zizokuthabela ukuphila eparadeyisini ephasini