Okubuzwa Bafundi Bakamagazini Lo . . .

UZimu Uthanda Isitjhaba Esisodwa Ngaphezu Kwezinye?

▪ Awa, akusinjalo. IBhayibhili ikubeka ngokukhanyako: “UZimu uphatha boke abantu ngokulingana. Loyo omesabako, enze koke okulungileko wamukelekile kuye.”—IZenzo 10:34, 35.

Umbono kaZimu malungana nendaba le uphakeme khulu kunowabantu abanesono. Abantu abanengi bakholelwa bona esinye isitjhaba (ngokuvamileko sabo) singcono kunezinye. Ibandlululo elinjalo litjengisa ukucabanga kwakaCharles Darwin, owatlolako: “Esikhathini esizako, . . . iintjhaba eziphucukileko ngokuqinisekileko zizokupheze ziqede, bezijamiselele iintjhaba ezingakaphucuki.” Ngokudanisako, inengi lazo libe bongazimbi beentjhaba ezizibona ziphakamile kunazo.

Ukuzizwa uphakeme ngendlela leyo kuyafaneleka? Isibonelo, isayensi iyakufakazela na bona ukwakheka kwezakhi zefuzo kutjengisa bonyana ezinye iintjhaba ziphakamile kunezinye? Ngokuhlukileko, isazi sezakhi zefuzo esinguphrofesa e-Oxford uBryan Sykes sithi: “Nesiqala izakhi zefuzo alikho ibanga lokuhlukanisa iintjhaba ngefuzo. . . . Ngihlale ngibuzwa bona kune-DNA yamaGirigi namtjhana yamaTariyana, awa, ayikho. . . . Soke siyafana.”

Imininingwana le ivumelana nalokho esikufunda eMitlolweni. IBhayibhili ifundisa bona uZimu wabumba indoda eyodwa nomfazi oyedwa, lapho kuvela khona boke abantu. (Genesisi 3:20; IZenzo 17:26) Nokho, emehlweni kaZimu, kunesitjhaba esisodwa kwaphela—ihlanga lesintu.

UJehova akakhethi ibala lomuntu namtjhana indlela akheke ngayo. Kunalokho, Uqala into eqakatheke khulu—ihliziyo yethu engokomfanekiso, namtjhana umuntu esinguye ngaphakathi. Uthi: “Abantu bahlulela abanye ngendlela ababonakala ngayo, kodwana mina ngahlulela abantu ngalokho okuseenhliziyweni zabo.” (1 Samuweli 16:7, Contemporary English Version) Ukukhumbula iqinisweli kungaba sikhuthazo kithi. Njani?

Kungakhathaliseki iimvelaphi yethu, inengi lethu alaneliseki ngendlela elibonakala ngayo, nanyana kunjalo, kuncani khulu esingakwenza ngalokho. Nokho, singathuthukisa okuqakatheke khulu—iimcabango nendlela esizizwa ngayo. (KwebeKholose 3:9-11) Nengabe sithembekile kithi ngokwethu, sizokutjheja bona sitjhigamele ekuzizweni siphezulu, namtjhana siphasi ebantwini bezinye iinhlanga. Njengombana umbono loyo ungakhambisani newakaZimu, kufuze sisebenze budisi bona sikhiphe nanyana ngimaphi amazizo anjalo eenhliziyweni zethu.—IRhalani 139:23, 24.

Njengombana silwela ukuziqala nokuqala abanye ngendlela uJehova abaqala ngayo, singaqiniseka ngesizo lakhe. ILizwi lakhe liyasikhumbuza: “Malungana noJehova, amehlwakhe aqalaqala ephasini loke bonyana atjengise amandlakhe kilabo abanehliziyo epheleleko kuye.” (2 IMilando 16:9) Lokhu kuliqiniso kungakhathaliseki bonyana singabasiphi isitjhaba.