“NGINGAKWEHLULA koke ngaphandle kwesilingo.” Ihlaya elidumilekweli liyihlathulula kuhle indlela abanye abantu abasiqala ngayo isilingo—ngaphakathi liyabakara. Abanye godu baqala isilingo njengenaba elibeleselako abangathanda ukulehlula. Ucabangani wena? Nawuqalene nesilingo, kghani kufuze usivumele nofana ulwisane naso?

Kuliqiniso, akusizo zoke iinlingo ezingabangela umraro omkhulu. Ngokwesibonelo, ukunande ugomojela amakuka ngemsithelweni, angeze kwakumosela ipilo kangako. Kodwana ukuvumela ezinye iinlingo—khulukhulu ezibizela ekuziphatheni kumbi ngokomseme—kungabangela imiphumela ebuhlungu khulu. IBhayibheli iyasikhalima: “Umuntu ohlobongako, uswela ingqondo; owenza njalo uyazibhubhisa.”—IzAga 6:32, 33.

Nangabe isilingo sokuziphatha kumbi ngokomseme sikukhukhuthela, kufuze usabele njani? IBhayibheli iyaphendula: “Lokho kuyintando kaZimu; ukucwengiswa kwenu; khambelani kude nobufebe; omunye nomunye wenu akwazi ukulawula umzimbakhe, kube ngokucwenga nangokuhlonipha.” (1 Thesalonika 4:3, 4) Singakuhlawulela njani ukuzimisela okunjalo? Cabangela amagadango amathathu angasiza.

Ukubukela iinthombe ezisilapheleko kumane kubasela iimfiso ezingakalungi. Ahlobanisa phakathi kokubona nokufisa, uJesu wayelelisa: “Nanyana ngubani oqala umfazi amkhanuke sele ahlobonge naye ngehliziywenakhe.” Asebenzisa irhwala ukukhanyisa indaba le wathi: “Nakube ilihlo lakho langesigomeni likwenza wone, ligobhodlhe ulilahle.” (Matewu 5:28,  29) UJesu bekalinga ukusifundisani? Nasizakwehlula isilingo, kufuze sizikhalime begodu singafunzi amehlwethu ngeenthombe ezivusa ikanuko.

Ukufanekisa: Akhe sithi nakho uzithela phezu komkhanyo ohlabako wetotjhi yokutjhiselela. Bewungasolo uyiqalile na? Akubuzwa! Bowungajikisa amehlwakho msinyana uzisithe. Ngendlela efanako, nawubona iinthombe ezisilapheleko kungaba sephepheni, esikrinini, namkha uzibone zenzeka kwamambala—zisithe msinyana. Vikela ingqondwakho ekusilaphalenokhu. UJuan owakhe waba likghoba lokubukela iinthombe zomseme ezisilapheleko ngaphambilini, uthi: “Nangibona umma oqalekako, bengizizwa ngasuthi nginganande ngimrhedlula. Bengikatelela ukususa amehlwami ngiqale eqadi, bese ngithi: ‘Thandaza kuJehova! Utlhoga ukuthandaza njenganje!’ Kuzakuthi ngemva kokuthandaza, msinyana ikanuko leyo ifadalale.—Matewu 6:9, 13; 1 Korinte 10:13.

Omunye esingacabanga ngaye godu, nguJobho indoda ethembekileko owathi: “Ngenze isivumelwano namehlwami, kobana ngingaqali itlawu ngokulikhanukela.” (Jobho 31:1) Kubayini nawe ungasebenzisi into efanako?

Linga naku: Nangabe ubona iinthombe ezisilapheleko, msinyana balekisa amehlwakho. Lingisa umtloli weBhayibheli owathandaza wathi: “Fulatheza amehlwami ekuqaleni ilize.”—IRhubo 119:37.

Ngebanga lokuthi sinesono, ngasikhathi singakurakurana neemfiso izimbi. IBhayibheli iyatjho: “Loyo naloyo ulingwa, adoswe ziinkanuko zakhe abe ayengeke. Yeke ikanuko nasele ibambile, izala isono, kuthi isono nasele sikhulile sizale ukufa.” (Jakopo 1:14, 15) Ungabubalekela njani ubujamo obuthuwelelako obuzakwenza kube budisi ukuphunyurha kibo?

Nawuqalene neemfiso ezimbi, khumbula bona ungakwazi ukuzikhethela ukuthi uzokusabela bunjani kizo. Lwisana nazo. Zikarabhe engqondwenakho. Ubalekele nokusolo uzindla ngazo. Indoda ebizwa ngoTroy, ogade ilikghoba lokubukela iinthombe zabantu ababulanzi ku-Inthanethi, uthi: “Ngakurakurana nemizindlo emimbi engqondwenami ngokuthi ngihlale ngicabanga ngezinto ezihle. Kodwana bekungasilula. Benginande ngibuyela emva kanengi.  Ekugcineni ngabe ngafunda ukuyilawula ingqondwami.” Umma obizwa ngo-Elsa, owakhe watshwenywa ziinlingo zokuziphatha kumbi ngokomseme ebutjheni bakhe, uyakhumbula, “Ngokuhlala ngimajadu ngapha ngithandaza kuJehova, ngakghona ukulawula imizindlo emimbi.”

Linga naku: Nawugandelelwe mizindlo emimbi, zibambe uthandaze msinyana. Lwisana nemizindlo emimbi ngokuzalisa ingqondwakho “ngananyana yini eliqiniso, ehloniphekako, elungileko, emsulwa, ethokozisako, eyazisako, iye, nakukhona ubuhle begodu nakukhona nanyana yini efanele idunyiswe.”—Filipi 4:8.

Lokha isifiso, isilingo, nethuba kuhlangana, kungabalula ukungena emrarweni. (IzAga 7:6-23) Ungakubalekela njani ukuba ngungazimbi?

Ngokuhlakanipha iBhayibheli iyasiyelelisa: “Ovuthiweko nabona ingozi uyabhaca, kodwana abanangalwazi bayaragalala, bahlupheke.” (IzAga 22:3) Ngalokho tjheja amagadangwakho. Cabanga kusesengaphambili ngobujamo obungakufaka emrarweni, bewububalekele. (IzAga 7:25) Indoda ebizwa ngo-Filipe, eyahlula ukuba likghoba lokubukela iinthombe zabantu ababulanzi ithi: “Ngabeka ikhomphyutha epepeneneni ngafaka ne-Internet filter software. Bengingena ku-inthanethi kwaphela nengabe abanye bakhona.” Ngokufanako, uTroy, ekhe kwakhulunywa ngaye ngaphambilini, uthi: “Angiwabukeli amabhayisikobho avusa ikanuko, angizihlanganisi nabantu abakhuluma izinto ezihlaza ngezomseme. Angifuni ukudlala ngomlilo.

Linga naku: Ngokuthembeka hlola ubuthakathaka bakho, uzilungiselele kusesengaphambili ukuthi uzobubalekela njani ubujamo obulingako.—Matewu 6:13.

Kuthiwani ngitjho naphezu kwemizamakho engaka, uba buthakathaka, isilingo sikubambe godu? Ungapheli ihliziyo bese uyanghala. IBhayibheli ithi: “Nanyana olungileko angawa kalikhomba, uyavuka azithathe.” (IzAga 24:16) Kunjalo, uBabethu osezulwini usikhuthaza bona ‘sivuke sizithathe.’ Uyalimukela na isizo lakhe? Nakunjalo-ke ungadinwa kuthandaza kuye. Yakha ukukholwa kwakho ngokufunda iliZwi lakhe. Uqinise ukuzimisela kwakho ngokuya emihlanganweni yobuKrestu. Dzimelelisa ihliziywakho esithembisweni sakaZimu nakathi: “Ngiyakuqinisa bengiyakusiza.”—Isaya 41:10.

UCody ekhe kwakhulunywa ngaye ngaphambilini, uthi: “Kwatlhogeka ngisebenze budisi ukwehlula umukghwami wokubukela iinthombe zabantu ababulanzi. Bengiwa kanengi, kodwana ngesizo lakaZimu, ngabe ngayilwa. UDylan, naye ekhe kwakhulunywa ngaye, uthi: “Bekungaba lula ngami ukuya emsemeni nomuntu engisebenza naye. Kodwana ngabetha phasi ngenyawo ngamtjela ukuthi ‘Awa!’ Kumnandi khulu ukuba nesazela esihlwengileko. Okuqakatheke khulu, ngiyazi ukuthi ngenze uJehova wathaba ngami.”

Nawubetha phasi ngenyawo uhlule iinlingo, ungaqiniseka bona uZimu uzokuthaba ngawe!​—IzAga 27:11.