ISIHLOKO ESINGAPHANDLE | INGA-KGHANI UZIMU UNENDABA NAWE?
UZimu Uzenza Afumaneke Kuwe
“Akakho ongeza kimi nakube uBaba ongithumileko akamdoseli kimi.” —JWANISI 6:44.
OKWENZA ABANTU ABANENGI BAZAZE: Abantu abanengi abakholelwa kuZimu bazizwa bakude naye. UChristina, umma othileko we-Ireland ogade aya esondweni qobe veke uthi, “Bengimqala njengoZimu obumbe zoke izinto. Kodwana bengingamazi. Akhenge nakanye ngizizwe ngitjhidelene naye.”
OKUFUNDISWA LILIZWI LAKAZIMU: Nesidurhako, uJehova akalisi ukusisiza. UJesu ufanise itlhogomelo kaZimu nganasi indlela: “Nakube umuntu unezimvu ezilikhulu, kuthi eyodwa idurhe, akazukutjhiya ezimatjhumi alithoba nethoba emibundwini ayokufuna edurhileko na?” Sifundani kilokhu? “Ngokunjalo-ke noYihlo ezulwini akathandi bona kudurhe ngitjho noyedwa wabancancanaba.”—Matewu 18:12-14.
Boke ‘babancancanaba’ baqakathekile kuZimu. UZimu ‘ubafuna njani abadurhileko’? Ngokuya komtlolo odzujulwe ekuthomeni, uJehova udosela abantu kuye.
Bobani namhlanjesi abavakatjhela abantu emizinabo, neendaweni zomphakathi bona bacoce nabo ngomlayezo weBhayibheli omalungana noZimu?
Cabanga ngendlela uZimu athatha ngayo igadango lokudosela abantu abathembekileko kuye. Ngekhulu lokuthoma leminyaka, uZimu wathumela umfundi omKrestu uFlebhe bona ayokuhlangana nesikhulu seTopiya bacoce ngesiphorofido seBhayibheli isikhulu ebesisifunda. (IzEnzo 8:26-39) Ngokukhamba kwesikhathi uZimu wanqophisa umpostoli uPitrosi emzini wesikhulu samaRoma esibizwa ngokobana nguKorneliyasi egade sithandaza begodu sizimisele ukukhulekela uZimu. (IzEnzo 10:1-48) Godu uZimu wanqophisa umpostoli uPowula nabakhambisani bakhe emlanjeni ongaphandle kwedorobho leFilipi. Bahlangana nomma ‘ogade alotjha uZimu’ ibizo lakhe nguLidiya ‘uJehova wavula ihliziywakhe bona alalelisise.’—IzEnzo 16:9-15.
Ebujamweni ngabunye, uJehova bekaqinisekisa bona abantu abamfunako bayalifumana ithuba lokumazi. Bobani namhlanjesi abavakatjhela abantu emizinabo, neendaweni zomphakathi bona bacoce nabo ngomlayezo weBhayibheli omalungana noZimu? Abanengi bangaphendula ngokuthi, “boFakazi bakaJehova.” Zibuze, ‘Kghani kungenzeka usebenzisa bona bonyana beze kimi?’ Sikukhuthaza bona uthandaze kuZimu umbawe akusize usabele emizamwenakhe yokukudosela kuye. *
^ isig. 8 Bona ufumane imininingwana engeziweko, bukela ividiyo ethi Kubayini Kufuze Ufunde IBhayibheli? ku-www.mt1130.com/nr.
Okhunye Ongakuthabela
UKWAZI NGATHI
Kubayini Kufuze Ufunde IBhayibheli?
IBhayibheli selisize iingidigidi zabantu zafumana iimpendulo zemibuzo ethinta ipilo yazo. Angekhe wathanda ukuba ngomunye wabantwabo?
