1-2. King so se makang gore malata ya Modimo ma jabole? (Jakobo 1:​22-25)

 PHELA Jehova le Morwayi wage ba di nyaka ka matla gore re jabole. Ye a ngwadiyeng Pisalema 119:2 o re: “Go jabola bo ba theetselang tso a ba yetetsang ka tsona, ba gore ba mo nyakela ka dipelo tsa bona ka moka.” Jeso o tokegele ka go hlaya gore: “Go jabola ba gore ba kwa lentsu la Modimo, ba maka tso le di hlayang!”—Luk. 11:28.

² Rune malata ya Jehova re batho ba gore ba jabodiye. Ke ntaba mara? Ke dilo tsa go tlala tso di makang gore re be ka mokgonone mara sa go napa se di phala ka moka ke gore re bala Lentsu la Modimo ka moka matšatši re boya re liketsa ka mokgo re ka kgonang gore re di make tso re di tšhutang.—Bala Jakobo 1:​22-25.

3. Di re berekela ka mokgo mang mo re berekisa tso re di balang ka Lentsung la Modimo?

³ Di re berekela ka mekgwa ya go tladisa mehlolo mo re ‘maka tso lentsu le di hlayang.’ Se sengwana ke gore mo re berekisa tso re di tšhutang, re di tšiba gabutši gore re ba re jabodisa Jehova. Ke mokane tsotsone di maka gore le rune re jabole. (Mmo. 12:13) Mo re latelela tso Lentsu la Modimo le re yetetsang ka tsona, senghana sa rune le bo re dulang nabo ka ho mutšing se napa se hluhlutela fote re napa re ba le senghana sa go tiya ka matla le magageru ya ka ho phutegong. Tsotsone o yye wa di bona di makega mo o kene o phela. Go tokegela gana hone, re kganela kgole le mathatha ya go tlala ya gore ma tlela bo ba gore a ba nyake go theetsela tso Jehova a di hlayang. Phela di fo ba lekgwaying gore re yema le Kgoši Dafita. Ga koša yage, mo a šele a bolabodiye ka molawo wa Jehova, tso a re yetetsang ka tsona le ka mokgo a yahlulang, o notelele ka gore: “Mo motho a yi berekisa, o rufega ka matla.”—Pis. 19:​7-11.

4. Ke ntaba go se taba ya go kgana go maka tso Lentsu la Modimo le di hlayang?

⁴ Go fo bolabola nnete nje, a di lula gore re dule re maka tso Lentsu la Modimo le di hlayang. Le mo re le batho ba go dula re yemayema,  di nyaka re tipeyela nako ya gore re bale re boye re tšhute Bhayibele gore re thogo kwisisa gabutši gore king so Jehova a nyakang re se maka. Byalo, tla re lebeleleneng tse dingwana tsa gore di ka re gelepa gore re thogo bala Bhayibele ka moka matšatši. Re nyoko boya re lebelela gore king so se ka re gelepang gore re nagane ka tso re di balang le mekgwa yo yi ka re gelepang gore re make tsotso re di tšhutang mo re kene re phela.

TIPEYELE NAKO YA GO BALA LENTSU LA MODIMO

5. Ke dilo difeng tsa gore di maka gore re dule re tshwaraganne?

⁵ Malata ya Jehova ya go tlala ma tshwaraganne la go sa hlayisegi. Re fetsa nako ya go tlala re maka mebereko ya mehlobohlobo ga tso tsa Modimo. Mo re beyisa, ba go tlala ba rune re ya thewogela gore re thogo tipasopa re boye re pasope ba mitši ya rune. (1 Thim. 5:8) Makreste ya go tlala ma tshwaraganne ka go pasopa ba gore a ba titsose kela mašaga ya bona ya gore ma šele ma tsofele. Fote di sa nyaka nako gore re pasope le la rune lephelo. Go tokegela ga mebereko yone, re sa na le mebereko ye mengwana ka ho phutegong. Sa go di phala ka moka ke gore, di nyaka re be le matšato ga taba ya go tšhela letsogo ga mmereko wa go tšhomayela. Ga mebereko ka mokana ga yona yo o nang nayo, o ka yi kota kaye mara nako ya go bala Bhayibele ka moka matšatši, o ghayela ka tso o di badiyeng o boya o di berekisa?

6. O ka maka byang gore tsa go bala Bhayibele go be tsona tso o di yetisang ka ku mahlong? (Lebelela le sethombhe.)

⁶ Rune Makreste selo sengwana ga “tso di tshwaneleng go yeta mahlong” ke go bala Bhayibele, byalo di nyaka re hlupege ka matla ka taba yone. (Mafil. 1:10) Ga taba ya go bolabola ka motho wa go jabola, mo pisalema yi sa thomisa yi re: “O jabodisa ke molawo wa Jehova, fote o bala molawo Wage ka lentsu la tlase motshegare le bošego.” (Pis. 1:​1, 2) Di fo ba lekgwaying gore di nyaka motho a tipeyela nako ka thooko ga taba yone ya go bala. Mara mong yona nako ya go bala Bhayibele go ka ba yifeng? Ga yone taba o ka kraya re sa tshwane ka phetolo. Mara gore di sa hlupe, o ka tipeyela nako ya gore o nyoko maka ka mokgonone ka moka matšatši. Mogageru ye ba reng ke Victor o re: “Nna ke kwana le go bala  Bhayibele mo go sa le ka bošego. Le mo tsa go tsoga ka bošego go se layini yaka mara tsa gore di ka šitisa motho mo go sa le ka bošego a di ya tlala. Monagano waka wo sa f’lo re paa fote a ke hlupe ke selo.” Ayitsano le gago di fo ba ka mokgonone? Tiputsise gore, ‘Ke yifeng nako yo nna yi ka mperekelang gore ke bale Bhayibele?’

GHAYELA KA TSO O DI BALANG

7-8. King tso di ka parakang gore tso re di balang di re berekele mong go re berekela? Beyisa.

⁷ Ke nnete gore o ka kraya re dula re bala dikgatiso tsa go tlala mara le mong go kota selo ka ssoši dho. Ayitsano di yye dya go makegela tsa gore o bale se sengwana mara ka nthago o sa sa gopola le gore ne o bala ka ying? Ka moka ga rune di fela di re makegela. Sa go babisa pelo ke gore tsotsone di ka re makegela le ga taba ya rune ya go bala Bhayibele. Di ka makega gore re tipeyele gore re nyaka go segelela taba ya go bala ditema tse dingwana tsa Bhayibele letšatši le lengwana le lengwana. Phela yone ke taba ya go bafala stereka. Di nyaka re tipeyele tso re nyakang go di segelela re boye re karakare ka matla gore re di segelele. (1 Makor. 9:26) Mara mo re nyaka gore tso re di balang ka ho Bhayibeleng di re berekele, re sa fo yi balela moyano.

⁸ O fo nagana ka mokgo ba tshwanisiyeng taba ke yowa: Ga go tlala pula ke yona yi re neyang meetši fote mo go se na meetši a go na lephelo. Mara mo go ka na pula ye kgolo ka matla, ka go yakgoswa o ko kraya meetši ma šele ma dhamme ho fase. Phela mo go makega tsotsone, pula yone ye kgolo yi ko ba yi sa gelepi ka selo. Mobu wo nyaka nako gore wo thogo goga meetši ya pula ma kenelele ho fase fote le dimelane di thogo ma kraya. Byalo, le rune a di nyake re bala Bhayibele nkare ba ro re lelekisa la go šinya re šitega go kota se sengwana kela go gopola tso re di badiyeng re boya re ro di berekisa.—Jak. 1:24.

9. Re ka maka byang mo nkare re thomisiye mokgwa wa go bala Bhayibele ka go taboga?

⁹ Ayitsano o šele o di bonne gore go na le nako ye nngwana ya gore o fela o bala Bhayibele ka go taboga? O ka maka ying mara? O sa jage. Karakara ka matla gore o nagane ka tso o di balang kela tso o šeleng o di badiye. Tsotsone a di nyake go napa go ba taba ya go tshosa. Mo nkare taba ya go ghayela ya go thathafela, nakwenngwana o ka tseya taba ya go ghayela go le fo nagana ka tso o  di badiyeng. O ka kgeta go tipeyela nako ya go lefanyana mo o tšhuta gore o thogo ghayela ka tso o di tšhutiyeng. Go gongwana o ka kgeta go bala ditemanyana tsa go sa tlala gore o thogo berekisa nako yo yi šeleng gore o thogo ghayela ka tso o di badiyeng. Victor yela re šeleng re bolabodiye ka yene o re, “Mo ke bala Bhayibele a ke bale dilo tsa go lefa, nka fo re ke dula ke bala tema ka yyoši. Ka taba la gore ke bala go sa le ka bošego, motshegare wowa ka mokana ga wona ke kgona go dula ke nagana ka tso ke di badiyeng.” Ga mokgwa wo mongwana le wo mongwana wa gore wa wo berekisa, di ka ba gabutši ka matla gore o bale ka mokgo wene o ka di kgonang gore o thogo botha tsa go tlala mo o kene o bala.—Pis. 119:97; lebelela lebhokisi la gore, “ Diputsiso Tso di Nyakang o sa di Takisi Maahlo.”

10. Re beyisele ka mokgo o ka berekisang tso o di tšhutang. (1 Mathesalonika 5:​17, 18)

¹⁰ Tsa gore o bala nako mang Bhayibele le gore o fetsa nako ya go lefa go segela kaye, a di nape di hlupa mara tso di nyakang o hlupega ka matla ka tsona ke gore o berekise tso o di balang. Mo o kene o bala Lentsu la Modimo, tiputsise gore, ‘Taba yowa nka yi berekisa ka mokgo mang gana byalo kela ku mahlong?’ Mo re beyisa, o fo nagana o badiye 1 Mathesalonika 5:​17, 18. (Bala.) Ka nthago ga mo o badiye ditemanyana tsone ka dipedi, o ka yema ke mokane wa nagana gore wene o rapela ga kaye fote o rapela o kenelela go segela kaye. Fote o ka nagana ka dilo tso o di lebogang. Nakwenngwana o ka kgeta go leboga Jehova ka kararo ya dilo. Le mo o ka sa tseyi nako ya go lefa o nagana ka dilo tsone, phela tsotsone di nyoko go gelepa gore o kwisise Lentsu la Modimo o boye o make tso le di hlayang. O fo nagana nje gore di nyoko go berekela go segela kaye mo letšatši le lengwana le le lengwana o berekisa tso o di balang ka ho Bhayibeleng! Eya, o ko fo ba o komatela ga taba ya go maka tso Lentsu la Modimo le di hlayang. Byalo, o nyoko maka byang mo nkare go sa na le dilo tsa go tlala tso o tshwaneleng o berekele ga tsona?

O SA NAPE O TIYIMETSA GA TSO O NYAKANG GO DI SEGELELA

11. Ke ntaba ka dinako tse dingwana o fo kwa o kgongwela? Beyisa.

¹¹ Ka dinako tse dingwana o ka fo kwa di go kgongwetsa mo o bala Bhayibele ka taba la gore go na le moririmane wa dilo wo di nyakang wo wo ghobolla. Nagana ka taba ke yowa: Lekgono mo o balang Bhayibele gona go kena le taba ya go wolola ga tsa go šupetsa go hlawolana. (Jak. 2:​1-8) Wa di bona gore di nyaka o potolla-potolle ka mokgo o tshwarang ba bangwana ka gona ke mokane o fetsa ka gore o tšhentšhe. Wa tšiba re go teyela matsogo! Byalo, ka motshwana wa gona o bala ditemanyana tse dingwana tsa gore di šihlela ka mokgo o tshwaneleng o titshware mo o bolabola. (Jak. 3:​1-12) Wa di bona gore ka dinako tse dingwana o fela o bolabola mantsu ya go hlaba. Byalo, o fetsa ka gore o nyaka go bolabola tsa go tseya gabutši fote tsa gore di ya yagisa. Ke mokane letšatši la go latela mo o kene o bala Bhayibele o  kraya tsa go go pasopisa ga taba ya go nghanelana le lefase. (Jak. 4:​4-12) O napa o di bona gore di nyaka o ntshe maahlo dikwakweng ga taba ya go kgeta tsa go tijabodisa ka tsona. Ka letšatši la go latela, mo o lebelela dilo ka mokana ga tsona tso o tshwaneleng o berekele ga tsona o ka šinya o hlaya le gore a wa bolaya ngwana wa lekgowa.

12. Ke ntaba o sa tshwanela go kgongwela mo nkare mo o balang gona Bhayibele go wunyulla taba ya gore di nyaka o tšhentšhe maphelelo? (Lebelela le setwaba.)

¹² Mo nkare o nyaka go tšhentšha kela go potolla ga dilo tsa go tlala, tsotsone di sa nape di go kata fase ka go kgongwela. Di fo šupetsa gore pelo yago yi sa pompa madi gabutši. Motho wa gore o tinyanafatsiye fote wa tshepega mo a bala Bhayibele, o lebelela mo di nyakang a berekela gona. a O sa lebale gore go ba le “mekgwa ya nyuwane” a yi selo sa go gagarela poleke ka yyoši, ke sa go ya mahlong. (Makol. 3:10) O ka gelepa king gore o dule o maka tso Lentsu la Modimo le di hlayang?

13. Ke mokgwa wofeng wa gabutši wa gore o ka berekisa tso o di tšhutiyeng? (Lebelela le sethombhe.)

¹³ O sa kraye o tiyimetsa o re o liketsa go maka dilo tso o di badiyeng ka mokana ga tsona ka nako ka yyoši, mara tšiba mo o kgerang ke mokane o kikirisane le tso o ka kgonang go di segelela. (Diy. 11:2) Liketsa tsowa ša: Ngwala letheto la tso o nyakang go berekela ga tsona, o kgete ka ssoši kela ka dipedi ga tso o nyakang go thomisa ka tsona, ke mokane tse dingwana tsowa o nyoko berekela ga tsona mo nako yi kene yi ya. O ka thomisa kaye mara?

14. Ke dilo difeng tso di nyakang o thomisa ka tsona go di segelela?

¹⁴ Thomisa ka tsa gore di lula gago gore o di segelele. Kela o ka kgeta go berekela ga tsa gore wa di bona gore di nyaka o di potolle o sa kgane. Mo o šele o se bonne so o nyakang go se segelela, nyakolla ka dikgatisong tsa rune nakwenngwana  o ka berekisa Watch Tower Publications Index kela Tlhahlo ya go Dira Nyakišišo ya Dihlatse tša Jehofa. Rapela Jehova o mo kgopele a go gelepe o “nabele go maka mmereko … le matšhika ya go wo maka.” (Mafil. 2:13) Ke mokane o kene fase ka go maka tso o di tšhutiyeng. Mo o ka teya o tshwarelele ga ya mathomo, ga tse dingwana tsowa go ko fo moroba. Gabutšibutši, mo o hluhlutela ga se sengwana sa maphelelo ya Sekreste kela ga wo mongwana wa mekgwa ya Sekreste, o nyoko fo teya mowalawala ga tso tse dingwana.

LISETSA LENTSU LA MODIMO GORE LE ‘BEREKE HO GAGO’

15. Batho ba Jehova ba fapana ka mokgo mang le ba go tlala ba gore baa yi bala Bhayibele? (1 Mathesalonika 2:13)

¹⁵ Batho ba bangwana ba re bona Bhayibele ba yi badiye gatleletlele. Mara ayitsano ba yi tshepa Bhayibele? Ayitsano baa di maka tso yi di hlayang kela baa yi dumelela yi ba yetetsa mo ba kene ba phela? Sa go babisa pelo ke gore ga go tlala phetolo ke awwa. Mara batho ba Jehova ba fapanne kgole nabo! Go fo tshwana le Makreste ya ku botala re yamogela Lentsu lowa “ka mokgo le leng ka gona, go le lentsu la Modimo.” Go tokegela gana hone, re karakara ka matla gore re šupetse ka tso re di makang mo re kene re phela gore ke mong lona.—Bala 1 Mathesalonika 2:13.

16. King so se ka re gelepang gore re make tso Lentsu le di hlayang?

¹⁶ Phela a go dule go le mothebenene go bala Lentsu la Modimo o boya o maka tso le di hlayang. O ka kraya le nako ya go bala o sa yi kraye. Kela o kraya Bhayibele ya gona o yi bala ka go bhanghulela o boya o sa koti tsa go tlala ga tso o di badiyeng. Kela o ka kraya di go kgongwetsa mo o lebelele dilo ka mokana ga tsona tso di nyakang o di potolla. Di tšibe tsa gore le mo ntshitshire go ka ba ya mošaga mang, mara go nyoko thulega lešuba. Jehova o nyoko go gelepa gore o thogo hlula. Nkare re ka tikemisela go maka so re ka se kgonang gore re mo lisetse a re gelepe fote re sa be batho ba go nanankela ga taba ya go kwa mara re make tso Lentsu le di hlayang. Phela a re kamake gore, mo re ka fo bala Lentsu la Modimo ra boya ra maka tso le di hlayang mo re kene re phela, a go jiki, re nyoko jabola la go sa hlayisegi.—Jak. 1:25.