Batho ba bangwe ba tšea nako go ithuta dilong tše di sa kgahlišego tšeo di ba diragaletšego. Ke be ke swana le bona. Ke belegetšwe Barcelona gomme ka golela gona moo. Barcelona ke toropo ya bobedi ka bogolo kua Spain. Ka gešo re be re dula tikologong yeo e bitšwago Somorrostro, yeo karolo ya yona e kgolo e bego e le kgauswi le lewatle. Tikologo ya Somorrostro e be e tumile ka gore e tletše botsotsi le go rekiša dihlaretagi.

 Batswadi ba ka ba be ba na le bana ba senyane, gomme ke be ke le wa mathomo. Ka ge ka gae re be re diila kudu, tate o ile a re ke yo šoma mo go bapalelwago tennis. Ke be ke šoma go latela dibapadi di tennis ge di wetše kgole. Ke be ke na le mengwaga e lesome gomme letšatši le lengwe le lengwe ke be ke šoma diiri tše lesome. Ka baka leo, ke ile ka se kgone go tsena sekolo go swana le bana ba bangwe. Ge ke be ke na le mengwaga e 14, ke ile ka thoma go šoma ka metšhene lefelong leo go šongwago ka tšhipi.

 Ka 1975 ke ile ka bitšwa gore ke tle bošoleng, ka ge lesogana le lengwe le le lengwe le be le swanetše go ya bošoleng nageng ya gabo rena. Ke be ke nyaka go šoma mošomo o sa tlwaelegago, ka gona ke ile ka ithaopela go šoma le sehlopha sa mašole seo se bitšwago Spanish Foreign Legion kua Melilla, e lego toropo ya Spain yeo e lego ka Leboa la Afrika. Ka yona nako yeo, ke ile ka itahlela mokgweng o mobe wa go diriša dihlaretagi gampe le go nwa kudu.

 Ge ke tloga sehlopheng seo sa mašole, ke ile ka boela Barcelona gomme ka hlama sehlopha sa disenyi. Re be re utswa selo le ge e le sefe seo re se hwetšago. Re be re rekiša dilo tšeo gore re kgone go ithekela dihlaretagi. Ke ile ka thoma go diriša dihlaretagi tšeo di bitšwago LSD le tše dingwe tša go nea motho matla, gomme ka phelela thobalano, bjala le go petšha. Go phela ka tsela yeo go ile gwa dira gore ke rate dintwa le go feta. Ke be ke phela ke swere thipa, selepe goba mphaka o mogolo, gomme ke be ke sa tšhabe go diriša se sengwe sa dilo tše ge e ba go nyakega.

 Ka letšatši le lengwe, nna le sehlopha sa ka re ile ra utswa koloi gomme maphodisa a re kitimiša. O be okare motho o bogetše mmubi. Re ile ra sepela ka koloi yeo bokgole bja dikhilomithara tše e ka bago tše 30, go fihlela maphodisa a thoma go re thuntšha. Mafelelong, yo a bego a otlela koloi yeo o ile a thula ka yona gomme ka moka ga rena ra tšwa ra tšhaba. Ge tate a ekwa taba yeo, o ile a nthaka ka gae, eupša go be go kwagala.

 Mengwageng e latetšego e mehlano ke be ke dula diterateng. Ke be ke robala mejakong ya meago, ka ditherakeng, dipankeng tša diphakeng le mabitleng. Le gona nkile ka dula nakonyana ka leweng. Bophelo bja ka bo be bo se na morero le ganyenyane, ka gona ke be ke no bona go se na taba gore ke a phela goba ke a hwa. Ke gopola ka nako e nngwe ge ke be ke kgogile dihlaretagi ke itshega diatla le matsogo. Ke sa na le mabadi a gona le lehono.

 Ge ke be ke na le mengwaga e 28, mma o ile a tla go nnyaka gomme a nkgopela gore ke boele gae. Ke ile ka dumela gomme ka mo tshepiša gore ke tla lokiša mesepelo ya ka, eupša go ntšere nako e telele gore ke dire seo ke mo tshepišitšego sona.

 Ka letšatši le lengwe, Dihlatse tša Jehofa tše pedi di ile tša re etela. Ge ke dutše ke di theeditše, tate o ile a goeletša a le ka ntlong a re ke tswalele mojako mo pele ga tšona. Ka ge ke be ke sa rate go dira seo motho yo mongwe a ntaelago sona, ke ile ka no thiba ditsebe. Dihlatse tšeo di ile tša nnea dipuku tše tharo tše dinyenyane, gomme ka di tšea. Ke ile ka di botšiša gore di swarela kae diboka tša tšona, ke moka ka morago ga matšatši a sego kae ke ile ka ya Holong ya Mmušo.

 Selo sa pele seo ke ilego ka se lemoga ke kamoo batho ka moka ba bego ba apere gabotse ka gona. Eupša nna ke be ke na le meriri e metelele, ditedu tša go hlakahlakana e bile ke apere diaparo tša go onala. Go be go no bonagala gore ga ke swane le batho ba moo, ka gona ke ile ka no itulela ka ntle gomme ka se tsene ka holong. Eupša ke ile ka makala kudu ge ke bona Juan yoo nkilego ka phela le yena sehlopheng setee sa disenyi a apere sutu. Ka morago ke ile ka tla ka kwa gore o šetše a na le ngwaga e le Hlatse ya Jehofa. Ge ke mmona ke ile ka ba le sebete sa go tsena ka Holong ya Mmušo gore ke theetše diboka. Go tloga ka yona nako yeo ke ile ka thoma go fetoga.

 Ke ile ka dumela go ithuta Beibele gomme kapejana ka lemoga gore ge e ba ke nyaka gore Modimo a nkamogele, ke swanetše go fetoša mekgwa ya ka yeo e sa kgahlišego. Go be go se bonolo gore ke dire diphetogo tše. Ke ile ka ithuta gore e le gore ke kgahliše Jehofa Modimo, ke be ke swanetše go ‘fetoga ka go fetola monagano wa ka.’ (Baroma 12:2) Ke be ke kgomilwe kudu ke kgaugelo ya Modimo. Le ge ke be ke dirile diphošo tše dintši, ke ile ka lemoga gore o be a mphile sebaka sa gore ke fetoše bophelo bja ka. Seo ke bego ke ithuta sona ka Jehofa Modimo se ile sa nwelela ka pelong ya ka. Ke ile ka kgona go bona gore go na le Mmopi yo a nago le taba le nna.​—1 Petro 5:6, 7.

 Se se ile sa dira gore ke thome go dira diphetogo. Ka mohlala, ge ke be ke ithuta ka taba ya motšoko thutong ya ka ya Beibele, ke ile ka ipotša gore: ‘Ge e ba Jehofa Modimo a nyaka gore ke dule ke hlwekile e bile ke se na bosodi, gona ke swanetše go no lahla motšoko wo!’ (2 Bakorinthe 7:1) Ka morago ga moo ke ile ka o lahla.

 Ke be ke swanetše go tlogela go diriša dihlaretagi le go di rekiša. Seo se ile sa ntšea nako le gona ka swanelwa ke go dira maiteko a magolo. E le gore ke fihlelele pakane yeo, ke be ke tseba gore ke swanetše go kgaogana le batho bao ke bego ke gwerane le bona. Mekgwa ya bona e be e sa nthuše gore ke matlafatše tswalano ya ka le Modimo. Lega go le bjalo, ge nako e dutše e eya, ke ile ka thoma go ithekga kudu ka Modimo le ka thušo yeo ke bego ke e newa ke bagwera ba ka ba bafsa ba ka phuthegong. Lerato la mohuta woo ke be ke sa le tsebe. Ge dikgwedi di dutše di eya, ke ile ka kgona go tlogela dihlaretagi gomme ka ‘apara semelo se sefsa,’ seo se bego se tlo nthuša gore Modimo a nkamogele. (Baefeso 4:24) Ka August 1985, ke ile ka kolobetšwa gomme ka ba Hlatse ya Jehofa.

 Beibele e fetošitše bophelo bja ka. E nthušitše gore ke se sa phela bophelo bja go ikgobatša le bja go ntheoša seriti. Ge e le gabotse, batho ba ka godimo ga ba 30 bao ke bego ke phela le bona ba hwile e sa le ba banyenyane, ba bolawa ke AIDS goba malwetši a mangwe ao a bakwago ke go diriša dihlaretagi gampe. Ke leboga kudu gore go diriša melao ya motheo ya Beibele go nthušitše go phema ditlamorago tše di sa kgahlišego.

 Ga ke sa swara dithipa le dilepe tšeo ke bego ke di swara ge ke be ke sa le lesogana la go rata dintwa. Ga sa nka ka nagana gore ka letšatši le lengwe ke tla be ke swara Beibele ke e diriša go thuša batho. Lehono, nna le mosadi wa ka re šoma go ruta batho Beibele ka mehla.

 Batswadi ba ka ga sa nka ya ba Dihlatse tša Jehofa, eupša ba ile ba leboga gore go ithuta Beibele go nkhotše kudu. Ge e le gabotse, tate o ile a ba a emelela Dihlatse tša Jehofa ka pele ga batho ka moka bao a bego a šoma le bona. O be a kgona go bona gore bodumedi bjo ke sa tšwago go bo hwetša bo dirile gore ke fetoge motho yo mokaone. Mma o be a fela a re nkabe ke thomile go ithuta Beibele kgale. Ke be ke dumelelana le yena.

 Dilo tšeo ke fetilego go tšona bophelong di mpontšhitše gore go nyaka go ikgotsofatša ka dihlaretagi le mekgwa e mengwe e gobogilego ke bošilo. Gona bjale ke kgotsofala kudu ge ke ruta ba bangwe seo se lego ka Lentšung la Modimo, ke ba ruta dilo tšeo di phološitšego bophelo bja ka.