Ka 2017, Dihlatse tša Jehofa tše lesomepedi tšeo di tšwago Mosquito (Miskito) Coast kua Nicaragua, di ile tša tšea leeto ka sekepe seo se bitšwago Sturi YamniI. Stephen yoo e lego yo mongwe wa Dihlatse tšeo o re: “Re be re yo kgothatša Dihlatse tša Jehofa le go di thuša go bolela ditaba tše dibotse lefelong la gabo tšona.”

 Dihlatse tšeo tša Jehofa tše 12 di ile tša tšea leeto la dikhilomithara tše 200 (125 mi) go tšwa Lagoon go ya Río Grande Matagalpa. Di be di sa tsebe gore leina la sekepe sa bona ka leleme la Semiskito le be le e ra gore “Ditaba tše Dibotse,” e lego selo seo ba bego ba tlo se direla batho bao ba bego ba dula kgauswi le noka. Ka morago ga gore Dihlatse tšeo tša Jehofa di sepele diiri tše e ka bago tše 12, di ile tša fihla La Cruz de Río Grande. Dihlatse tša Jehofa tša moo tše tshela di ile tša ba amogela.

 Bošegong bjoo, go ile gwa direga selo se sengwe se sešoro kudu. Go ile gwa tsoga ledimo le legolo gomme gwa na pula e kgolo yeo e ilego ya tlatša dinoka tša kua Río Grande de Matagalpa ka metsotso e sego kae. Go ile gwa feta matšatši a mabedi dinoka tšeo di sa tletše. Diholo tša Dihlatse tša Jehofa le dintlo tše dintši tša kua La Cruz were di be di tletše ka meetse. Dihlatse tša Jehofa tšeo di bego di etetše moo di ile tša thuša batho gore ba tšwe ka dintlong tša bona. Batho ba bantši ba ile ba fetša matšatši a mantši ba robala ka ntlong ya mabato a mabedi, ya Hlatse ya Jehofa ya moo.

 Nakong ya ge Dihlatse tša Jehofa di na le matšatši a mararo di le La Cruz, mmeyara wa moo o ile a ya a di kgopela thušo bošego. Ka ge sekepe sa Sturi Yamni e be e le sona feela seo se bego se ka kgona go sepela dinokeng tšeo dibego di tletše meetse, mmeyara o be a nyaka gore se iše batho bao ba ka yago go thuša batho bao ba bego ba dula metseng yeo le yona e bego e hlasetšwe ke ledimo. Dihlatse tša Jehofa di be di thabetše go thuša.

 Bošegong bjo bo latelago Dihlatse tša Jehofa di ile tša sepela le batho ba go thuša batho. Stephen o re: “Ka nako yeo noka e be e kwatile kudu e bile e gogola le mehlare e megolo. Noka yeo e be e elela ka lebelo la dikhilomithara tše fetago tše 18 ka iri.” Le ge go be go se bonolo gore sekepe se sepele nokeng yeo, eupša se ile sa kgona go fihla metseng e meraro.

 Dihlatse tša Jehofa di ile tša diriša sebaka seo go kgothatša batho bao ba dulago metseng yeo. Dihlatse tšeo tša Jehofa di ile tša fa batho dikopi tša Phafoga! ya 2017 yeo e rego “Megato Yeo e ka Phološago Maphelo—Ge go Eba le Kotsi.”

 Batho bao ba bego ba dula kgauswi le noka ba ile ba leboga kudu gore Dihlatse tša Jehofa di ile tša ba thuša le go ba kgothatša. Ba bangwe ba itše: “Dihlatse tša Jehofa di ikemišeditše go thuša batho ge ba wetšwe ke mathata.” Mola ba bangwe ba re: “Dihlatse tša Jehofa di rata batho kudu.” Ka morago ga gore batho ba bantši ba bone gore Dihlatse tša Jehofa di thušitše Bakristegotee le tšona le batho ba bangwe, ba ile ba theetša molaetša o mobotse woo o tšwago ka Beibeleng.