Aowa, ga di o thekge. Dihlatse tša Jehofa ke Bakriste bao ba theago ditumelo tša bona Mangwalong. Gaešita le ge madumedi a mangwe a ruta gore go bokana ga Bajuda kua Palestina go tswalana le boporofeta bja Mangwalo, Dihlatse tša Jehofa ga di dumelelane le pono ye. Ga di dumele gore tlhabollo ye ya sepolotiki e be e boletšwe e sa le pele ka Mangwalong. Ge e le gabotse, Mangwalo ga a godiše mmušo o itšego wa batho goba go phagamiša morafo o mongwe gare ga e mengwe. Morokami, e lego makasine wa Dihlatse tša Jehofa o ile wa bolela ka go se pepetletše gore: “Ga go na moo Mangwalo a thekgago mokgatlo wa go hlabollwa ga Bajuda.”

Encyclopædia Britannica e hlalosa mokgatlo wo e le “mokgatlo wa setšhaba sa Bajuda woo morero wa wona e lego go thea le go thekga mmušo wa Bajuda kua Palestina.” Modu wa wona ke wa bodumedi le bopolotiki. Dihlatse tša Jehofa ga di thekge taba ya gore mokgatlo wa go hlabollwa ga Bajuda ke thuto ya bodumedi, le gona di tloga di sa tšee karolo dipolotiking tša Bajuda.

Mokgatlo wa Dihlatse tša Jehofa ke wa bodumedi le gona ga o thekge dipolotiki le ge e le dife, tšeo di akaretšago mokgatlo wa go hlabollwa ga Bajuda. Go se tšee karolo ga Dihlatse tša Jehofa dipolotiking go tsebja gohle, e bile dinageng tše dingwe di ile tša tlaišwa o šoro ka ge di sa tsenele dipolotiki. Re kgodišegile gore Mmušo wa Modimo wa legodimong ke wona feela o tlago go tliša khutšo ya ka mo go sa felego mo lefaseng; ga go na mmušo goba mokgatlo wa batho wo o ka kgonago go dira seo.

Go sa šetšwe gore Dihlatse tša Jehofa di dula kae, di dumela gore di swanetše go kwa melao ya mebušo ya batho. Ga di rabele go balaodi ba mmušo goba tša tšea karolo dintweng.