Batho ba bantši ba lebelela sefapano e le leswao la Bokriste. Gaešita le ge rena Dihlatse tša Jehofa re le Bakriste, ga re diriše sefapano borapeding bja rena. Ka baka la’ng?

Lebaka le lengwe ke gore Beibele e bontšha gore Jesu ga se a hwela sefapanong eupša o hwetše koteng. Go feta moo, Beibele e lemoša ka go tia gore Bakriste ba ‘tšhabe borapedi bja medimo ya diswantšho,’ e lego seo se bolelago gore ba se ke ba šomiša sefapano borapeding bja bona.—1 Bakorinthe 10:14; 1 Johane 5:21.

Sa bohlokwa ke gore, Jesu o itše: “Bohle ba tla tseba ka se gore le barutiwa ba ka, ge e ba le ratana.” (Johane 13:34, 35) Ka gona, Jesu o bontšhitše gore lerato leo le nago le boikgafo, e sego sefapano goba seswantšho le ge e le sefe—le be le tla hlaola balatedi ba gagwe ba therešo.