Go thoma ka December 2012, Dihlatse tša Jehofa di ile tša swara lesolo le le kgethegilego kua Thailand e le go thuša bana ba sekolo gore ba atlege sekolong. Dihlatse tša Jehofa tše 20 di ile tša etela dikolong tša Bangkok. Dihlatse tše di ile tša ba le seboka le balaodi ba sekolo se sengwe le se sengwe gomme ba nea barutiši le bana ba sekolo tokollo ya Phafoga! ya October 2012 (ya Seisemane) yeo e bego e na le sehlogo seo se rego “How to Succeed at School.”

Lesolo le le ile la atlega gomme Dihlatse di ile tša le katološa nageng ka moka. Ngwageng o latetšego le seripa di ile tša ya dikolong tše 830 tša hwetša barutwana le barutiši bao ba bego ba fagahletše go hwetša tokollo ye ya Phafoga! moo e lego gore e ile ya swanelwa go phrinthiwa gararo gore batho ka moka ba e hwetše. Lekgeng la pele go be go dirilwe dikgopelo tša dikopi tše ka bago 30 000 tša tokollo ye ya Phafoga! ya October 2012. Lega go le bjalo, sehlogo se se ile sa kgahla batho ba bantši moo go ilego gwa sepetšwa dikopi tše 650 000 tša makasine wo!

Balaodi ba sekolo le barutiši ba ile ba lemoga kapejana mohola wa Phafoga! ye. Morutiši yo mongwe o itše: “Makasine wo o tla thuša barutwana ba rena go ba le tswalano ya kgauswi le malapa a gabo tšona le go ipeela dipakane tša go šoma ka thata.” Dikolo tše dingwe di dirišitše makasine wo lenaneong la tšona la thuto. Tše dingwe di dirišitše makasine wo go tlwaetša barutwana go bala. Sekolong se sengwe, bana ba be ba laetšwe go ngwala ka makasine wo gomme bao ba hweditšego dimaraka tša godimo ba ile ba hwetša sefoka.

Morutwana yo mongwe o ile a leboga sehlogo se sengwe makasineng wo seo se rego “Winning the War Against Obesity in the Young.” O ile a hlalosa gore go nona kudu ke bothata bjo bo atago kudu le gore bagwera ba gagwe ga ba rate go boledišana le ba bangwe ka taba ye, ke leboga keletšo e kwešišegago le yeo go lego bonolo go e diriša.”

Batswadi le bona ba tloga ba leboga makasine wo. Mma yo mongwe o ile a leboga Dihlatse tšeo di bego di tlile legaeng la gagwe ka gore: “O na le dintlha tše holago tšeo di ka thušago morwedi wa ka go kaonefatša sekolong.”

Mna. Pichai Petratyotin, e lego mmoleledi wa Dihlatse tša Jehofa kua Thailand, o itše: “Mengwaga ye ka moka Phafoga! e be e dutše e bontšha gore bohlale bjo bo lego ka lentšung la Modimo ke bja bohlokwa. Dihlatse tša Jehofa di tšeela godimo kudu bohlokwa bja thuto, ka gona re be re thabišitšwe ke gore re kgonne go dira gore batho ka moka ba hwetše tokollo ye mahala.”