Dipapadi tša Baswa tša Olympic tšeo di bilego gona ka Marega a 2024, di be di swaretšwe ditoropong tše nne tša South Korea go thoma ka January 19 go fihla February 1, 2024. Diketekete tša boramabelo, boraditaba le bao ba tlilego go bogela dipapadi tšeo, ba be ba etšwa dinageng tša ka godimo ga tše 70. Dihlatse tša Jehofa tša ka godimo ga tše 2 600 di tšere karolo lesolong le le kgethegilego nakong ya ge go bapalwa dipapadi. Go be go ena le diteroli tšeo di bego di swere dikgatišo mafelong a 34, gomme batho ba be ba kgona go hwetša boitsebišo bjo bo theilwego Beibeleng ka maleme a mane.

Lesogana la moswa leo le bolelago Semandarin o ile a ya go bana ba borena gomme a ba botša gore o dula a bona diteroli tša rena mafelong a fapafapanego ka toropong. Ka morago ga go bona sehlogo seo se bego se bolela ka lethabo la lapa go e nngwe ya diteroli, o ile a ema gore a ithute kamoo go oketšegilego. Bana ba borena ba mmontšhitše kamoo a ka taoneloutago ka gona poroutšha ya Lapa la Gago le ka Thaba ka Semandarin go jw.org. Kapelapela monna yoo o ile a tsena wepesaeteng ya rena a diriša founo ya gagwe gomme a leboga bana ba borena gore ba mo thušitše.

Banyalani ba bangwe ba Dihlatse ba ile ba thoma poledišano le monna yo a tšwago Ukraine. Ka ge ba be ba sa bolele leleme la go swana ba ile ba diriša translation app go boledišana le yena ka leleme la gabo. Ge ba dutše ba boledišana, monna yoo o ile a bontšha banyalani bao senepe sa toropo ya gabo yeo e sentšwego ke dipomo. Banyalani bao ba ile ba bontšha gore ba mo kwela bohloko mathateng ao a mo wetšego, gomme ba mmontšha temana ya Beibele yeo e hlalosago gore e se kgale dintwa di tlo fela. Go bala tshepišo ya Lengwalo le ka leleme la gabo go ile gwa mo kgothatša kudu. Ba ile ba dira ditokišetšo tša gore ba mo founele gore ba tšwetše pele poledišano ya bona.

Kgaetšedi In-Sook o ile a thoma poledišano ka Seisemane le ramabelo wa moswa le mmagwe bao ba tšwago Europe.Ge ba dutše ba boledišana kgaetšedi ya bo rena o ile a hlalosa ka dihlogo tšeo di lego gona wepesaeteng ya rena tšeo di lego ka tlase ga karolo ya “Go Godiša Baswa.” Mmago ramabelo yoo o kgahlilwe ke taba ye gomme a bolela gore o tla etela wepesaete ya rena gape.

Re thabela gore bana ba borena le dikgaetšedi ba kua South Korea ba bile le sebaka sa go fihlelela batho ba bantši moletlong woo wa ditšhabatšhaba gomme ba ‘tumiša leina la Jehofa.’—Psalme 148:13.