Beibele ga e re nee letšatši la maleba la go belegwa ga Jesu Kriste bjalo ka ge dipuku tše di latelago di bontšha:

•   “Letšatši la kgonthe la matswalo a Kriste ga le tsebje.”—New Catholic Encyclopedia.

•   “Letšatši le le nepagetšego la matswalo a Kriste ga le tsebje.”—Encyclopedia of Early Christianity.

 Le ge Beibele e sa arabe ka go lebanya potšišo ya gore: ‘Jesu o belegwe neng?’ e hlalosa ditiragalo tše pedi tšeo di diregilego nakong ya go belegwa ga gagwe tšeo di lebišitšego ba bantši go phetheng ka gore ga se a belegwa ka di-25 tša December.

E be e se marega

1.   Go ngwadišwa. Pejana ga gore Jesu a belegwe, Kesara Augustose o ile a ntšha taelo ya gore “mmušong ka moka go ngwadišwe.” Motho yo mongwe le yo mongwe o be a swanetše go yo ngwadišwa “motseng wa gabo,” e lego seo se bego se ka nyaka gore motho a tšee leeto la beke goba go feta moo. (Luka 2:1-3) Mohlomongwe taelo yeo e be e direlwa go thekga lekgetho le go ingwadiša go tša bohlabani, e lego seo batho ba bego ba ka se se thabele le ge se dirilwe sehleng le ge e le sefe sa ngwaga, eupša ga go bonagale Augustose a be a ka šitela batho ba gagwe ka go gapeletša ba bantši ba bona gore ba tšee maeto a matelele nakong ya marega a go tonya.

2.   Dinku. Badiši ba be ba “dula merakeng ba dišitše mehlape ya bona bošego.” (Luka 2:8) Puku ya Daily Life in the Time of Jesus e bolela gore mehlape e be e dula molaleng go tloga “bekeng ya pele ga Paseka [mafelelong a March]” go fihlela magareng ga November. Ke moka e oketša ka gore: “Mehlape e be e fetša marega e le mo go šireletšegilego; go tšwa go se go bonagala letšatši la Keresemose la marega le sa nepagala ka ge Ebangedi e bolela gore badiši ba be ba le merakeng.””

E be e le mathomong a seruthwane

 Re ka akanyetša gore Jesu o belegwe neng ka go balela morago go tloga letšatšing leo a hwilego ka lona ka Paseka ya Nisani 14 seruthwaneng sa ngwaga wa 33 C.E. (Johane 19:14-16) Jesu o be a na le nywaga e ka bago e 30 ge a be a thoma bodiredi bja gagwe bja nywaga e meraro le seripa, ka gona o belegwe mathomong a seruthwane sa 2 B.C.E.—Luka 3:23.

 Ka ge go se na bohlatse bja gore Jesu Kriste o belegwe ka di-25 tša December, ke ka baka la’ng Keresemose e ketekwa ka letšatši le? Encyclopædia Britannica e re mohlomongwe baetapele ba kereke ba le kgethile gore le “sepedišane le monyanya wa Roma wa boheitene woo o bego o swaya ‘go tswalwa ga letšatši le le sa fenywego,’’’ nakong ya letšatši le lekopana la marega. Go ya ka The Encyclopedia Americana, diithuti tše dintši di dumela gore se se be se diretšwe “gore Bokriste bo be le morero go baheitene bao ba sokologilego.”