Sebata sa dihlogo tše šupago seo se lego go Kutollo 13:1 se emela tshepedišo ya dipolotiki ya lefase ka bophara.

•   Se na le taolo, matla le sedulo sa bogoši go bontšha gore ke sa bopolotiki.—Kutollo 13:2.

•   Se buša “meloko le batho le maleme le ditšhaba ka moka,” ka gona se feta mmušo wa setšhaba setee.—Kutollo 13:7.

•   Se na le dibopego tše di swanago le tša dibata tše nne tšeo di hlalositšwego boporofeteng bjo bo lego go Daniele 7:2-8, tše di nago le sebopego sa lepogo, maoto a bere, molomo wa tau le dinaka tše lesome. Dibata tše tšeo di lego boporofeteng bja Daniele di emela dikgoši tše itšego goba mebušo ya bopolotiki, yeo e bušago mebušong e megolo ka go hlatlamana. (Daniele 7:17, 23) Ka go re’alo, sebata seo se lego go Kutollo kgaolo 13 se emela mokgatlo o tee woo o bopšago ke dikarolo tše di fapafapanego tša bopolotiki.

•   Se rotoga “lewatleng,” e lego mašabeng a ferekanego a batho ao mebušo ya batho e tšwelelago go wona.—Kutollo 13:1; Jesaya 17:12, 13.

•   Beibele e re sebata se na le leina, gomme leina leo ke palo 666, e lego “palo ya motho.” (Kutollo 13:17, 18) Polelwana yeo e bontšha gore sebata sa Kutollo kgaolo 13 se bonagatša mekgwa ya motho, e sego ya moya goba ya batemona.

 Gaešita le ge ditšhaba di sa kwane ka dilo ka moka, di ikemišeditše go dula di na le taolo go e na le gore di ikokobeletše Mmušo wa Modimo. (Psalme 2:2) Le gona, di tla tlatšana gore di lwantšhane le madira a Modimo ao a etelelwago pele ke Jesu Kriste ntweng ya Haramagedone, ka gona ntwa ye e tla feleletša ka gore ditšhaba tšeo di fedišwe.—Kutollo 16:14, 16; 19:19, 20.

“Dinaka tše lesome le dihlogo tše šupago”

 Ka Beibeleng, go dirišitšwe dipalo tše itšego tša seswantšhetšo. Ka mohlala, palo ya lesome le šupa di emela go phethega. Seo se re thušago gore re kwešiše taba yeo e bolelwago ke “dinaka tše lesome le dihlogo tše šupago” tša sebata seo se lego go Kutollo kgaolo 13 ke “seswantšho sa sebata” seo go bolelwago ka sona ka morago go Kutollo, e lego sebata sa mmala o mohwibidu seo se nago le dihlogo tše šupago le dinaka tše lesome. (Kutollo 13:1, 14, 15; 17:3) Beibele e re dihlogo tše šupago tša sebata se se sehwibidu di swantšhetša “dikgoši tše šupago,” goba mebušo.—Kutollo 17:9, 10.

 Ka mo go swanago, dihlogo tše šupago tša sebata seo se lego go Kutollo 13:1 di emela mebušo e šupago, e lego mebušo e megolo ya bopolotiki yeo e bušitšego historing ka moka le yeo e eteletšego pele gore e gatelele batho ba Modimo—Egipita, Asiria, Babilona, Bamede le Baperesia, Gerika, Roma le Mmušo wa Maisemane le Maamerika. Ge e ba re phetha ka gore dinaka tše lesome di emela mebušo ka moka, e megolo le e menyenyane, gona mphapahlogo woo o lego lenakeng le lengwe le le lengwe o bontšha gore setšhaba se sengwe le se sengwe seo se bušago se buša gotee le mmušo o mogolo wa nako yeo.