Le ge Beibele e sa bolele ka go lebanya mabapi le maemo a gagwe a lenyalo, e bolela ka mo go kwagalago gore Jesu o be a se a nyala. a Ela hloko dintlha tše di latelago.

1.   Gantši Beibele e bolela ka lapa labo Jesu le ka basadi bao ba bego ba sepela le yena bodireding bja gagwe le bao ba bego ba e na le yena ge a bolawa, eupša ga e bolele ka gore o be a e na le mosadi. (Mateo 12:46, 47; Mareka 3:31, 32; 15:40; Luka 8:2, 3, 19, 20; Johane 19:25) Lebaka le le kwagalago la gore Beibele e se bolele ka taba ye ke gore o be a se a nyala.

2.   Ge Jesu a be a bolela le barutiwa ba gagwe ka bao ba sego ba tsena lenyalong e le gore ba dire ka mo go oketšegilego tirelong ya Modimo, o itše: “Yo a ka amogelago seo [go se be lenyalong] a a se amogele.” (Mateo 19:10-12) O beetše bao ba kgethago go se tsene lenyalong mohlala ge ba nyaka go ikgafa ka mo go feletšego go Modimo.—Johane 13:15; 1 Bakorinthe 7:32-38.

3.   Pele ga ge Jesu a ehwa, o ile a dira dithulaganyo tša gore mmagwe a hlokomelwe. (Johane 19:25-27) Ge e ba Jesu a be a nyetše goba a be a na le bana, gona o be a tla kgonthišetša gore ditho tše tša kgauswi tša lapa le tšona di a hlokomelwa.

4.   Beibele e diriša Jesu e le mohlala bakeng sa banna bao ba nyetšego, eupša ga e bolele ka tsela yeo a ilego a swara mosadi wa kgonthe ka yona. Go e na le moo, e re: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafa ka baka la yona.” (Baefeso 5:25) Ge e ba Jesu a be a nyetše ge a sa le mo lefaseng, na mohlala wa gagwe o phethagetšego wa monna wa kgonthe yo a nyetšego o be o ka se dirišwe temaneng ye?

 Ee, Jesu o be a na le bana babo ba tshelelago. Ba ba akaretšago barwarragwe e lego Jakobo, Josefa, Simone le Judase gaešita le dikgaetšedi tše ka bago tše pedi. (Mateo 13:54-56; Mareka 6:3) Bana bao babo Jesu e be e le bana ba mmago Jesu e lego Maria le monna wa gagwe Josefa. (Mateo 1:25) Beibele e bitša Jesu gore ke “leitšibulo” la Maria seo se bolelago gore Maria o be a na le bana ba bangwe.—Luka 2:7.

 Batho ba bangwe ba ile ba hlalosa polelwana e rego “barwarragwe” ka ditsela tše fapanego e le ge ba thekga kgopolo ya gore Maria e be e le kgarebe bophelo bja gagwe ka moka. Ka mohlala, ba bangwe ba nagana gore bana babo Jesu ge e le gabotse e be e le barwa ba Josefa bao a bilego le bona lenyalong la gagwe la mathomo. Lega go le bjalo, Beibele e bontšha gore Jesu o ile a hwetša tshwanelo ya gagwe ya bogoši yeo e bego e holofeditšwe Dafida. (2 Samuele 7:12, 13; Luka 1:32) Ge e ba Josefa a be a na le barwa bao ba fetago Jesu, gona morwa yo mogolo go barwa bao e be e tla ba yena mojabohwa yo a swanelegago wa Josefa.

 Na polelwana ye e be e šupa go barutiwa ba Jesu goba bana babo ba moya? Kgopolo ye e ganetšana le Mangwalo ka ge lekgeng le lengwe Beibele e bontšha gore “bana babo ba be ba sa dumele go yena.” (Johane 7:5) Beibele e bontšha phapano magareng ga bana babo Jesu le barutiwa ba gagwe.—Johane 2:12.

 Kgopolo e nngwe e fošagetšego ke ya gore bana babo Jesu ge e le gabotse e be e le bomotswala’gwe. Lega go le bjalo, Mangwalo a Segerika a diriša mantšu ao a fapanego bakeng sa ‘ngwanabo,’ “metswalo” le ‘motswala.’ (Luka 21:16; Bakolose 4:10) Diithuti tše dintši tša Beibele di dumela gore bana babo Jesu le dikgaetšedi tša gagwe ge e le gabotse e be e le baratho ba gagwe. Ka mohlala, The Expositor’s Bible Commentary e re: “Tsela e kaone ya go kwešiša bao go thwego ke bana babo ... ke gore polelwana ye e šupa bana ba Maria le Josefa bao ka go rialo e lego bana babo Jesu ka Maria.” b